រាជធានីភ្នំពេញ ៖ ស្ត្រីជនជាតិហ៊្វីលីពីនស្រស់ស្អាតម្នាក់ត្រូវកម្លាំងនគរបាលក្រសួងមហាផ្ទៃ សហការជាមួយព្រះរាជអាជ្ញាអមសាលាដំបូងរាជធានីភ្នំពេញ ធ្វើការឃាត់ខ្លួនកាលពីវេលាម៉ោង១១និង៣០នាទីព្រឹកថ្ងៃទី២១ មីនា ២០១១ ខណៈស្ត្រីនោះចុះពីលើយន្តហោះដែលចូលសំចតនៅព្រលានអន្តរជាតិភ្នំពេញ បន្ទាប់ពីឆែកឆេររកឃើញគ្រឿងញៀនប្រភេទមេតំហ្វេតាមីនជាង៣គីឡូក្រាម ។
ប្រភពព័ត៌មានបានឱ្យដឹងថា កាលពីវេលាម៉ោងជាង១១ព្រឹកថ្ងៃទី២១ មីនា នគរបាលក្រសួងមហាផ្ទៃ សហការជាមួយមន្ត្រីតុលាការ បានឃាត់ខ្លួនស្ត្រីម្នាក់ឈ្មោះបុកស៊ីឡូ ដេយ៉ាណា អាយុ២៦ឆ្នាំ ជនជាតិហ្វីលីពីន ខណៈធ្វើដំណើរតាមជើងយន្តហោះពីឌូបៃ-ម៉ាឡេស៊ី-ភ្នំពេញ ។សមត្ថកិច្ចឆែកឆេររកឃើញគ្រឿងញៀនប្រភេទមេតំហ្វេតាមីនជាង៣គីឡូក្រាម លាក់ជាប់នឹងខ្លួន ។ ពុំមានព័ត៌មានណាមួយបញ្ជាក់ថា ស្ត្រីរូបនោះមានគោលបំណងយកគ្រឿងញៀនទាំងនេះទៅកាន់ប្រទេសណាមួយនោះទេ ហើយនេះក៏ជាលើកទី១ផងដែរ ក្នុងរយៈពេល៣ខែដើមឆ្នាំ២០១១ ដែលសមត្ថកិច្ចបង្ក្រាបការជួញដូរគ្រឿងញៀនឆ្លងដែនកាត់តាមព្រលានយន្តហោះអន្តរជាតិភ្នំពេញ គឺឃាត់ខ្លួនស្រីហ៊្វីលីពីនម្នាក់នេះឯង។
សមត្ថកិច្ចប្រចាំព្រលានយន្តហោះបានខ្សឹបប្រាប់ថា ការបង្ក្រាបការជួញដូរគ្រឿងញៀននេះគឺមានកិច្ចសហការពីនគរបាលអាំងទែរប៉ូលនៅក្រៅប្រទេស ទើបក្របួចមិនឱ្យខុសមុខសញ្ញាហើយក៏ពុំមានការភ្ញាក់ផ្អើលដល់ភ្ញៀវជាតិ និងអន្តរជាតិដែលធ្វើដំណើរក្នុងព្រលានយន្តហោះនោះទេ។ បច្ចុប្បន្ននារីសង្ស័យខាងលើត្រូវបានឃុំខ្លួនបណ្តោះអាសន្ននៅក្រសួងមហាផ្ទៃក្រោមការយាមកាមយ៉ាងប្រុងប្រយ័ត្ន និងកសាងសំណុំរឿងបញ្ជូនទៅតុលាការនៅរសៀលថ្ងៃទី២៣ មីនា ២០១១ ៕
ចែករំលែកព័តមាននេះ