រាជធានីភ្នំពេញ ៖ នៅក្នុងកិច្ចប្រជុំកំពូលធុរកិច្ចមហាអនុតំបន់មេគង្គលើកទី៦ នៅទីក្រុងហាណូយ លោក ង្វៀន សួនហ្វុ៊ក នាយករដ្ឋមន្ត្រីវៀតណាម បានលើកឡើងថា ប្រទេសចំនួន៣ក្នុងមហាអនុតំបន់មេគង្គ ទទួលបានទឹកប្រាក់ចំនួន៦៦ពាន់លានដុល្លារសម្រាប់កិច្ចសហប្រតិបត្តិការចំនួន៥ឆ្នាំ ចាប់ពីឆ្នាំ២០១៨ ដល់ឆ្នាំ២០២២ខាងមុខ ពីស្ថាប័នអន្តរជាតិនានា ។
លោកបន្តថា ទំហំទឹកប្រាក់នេះបានកើនឡើងជាង៣ដង ពីចំនួន២១ពាន់លានដុល្លារអាមេរិក ដែលប្រើប្រាស់សម្រាប់អភិវឌ្ឍន៍តំបន់នេះ ចាប់តាំងពីកម្មវិធីអភិវឌ្ឍន៍មហាអនុតំបន់មេគង្គ ត្រូវបានដាក់ឲ្យដំណើរការដោយធនាគារអភិវឌ្ឍន៍អាស៊ី (ADB) នៅក្នុងឆ្នាំ១៩៨២ ។ លោកថា ៖« កិច្ចព្រមព្រៀងហិរញ្ញវត្ថុប្រកបដោយមហិច្ឆតានេះ គ្រោងនឹងចុះហត្ថលេខាដោយបណ្តាមេដឹកនាំមហាអនុតំបន់មេគង្គ ក្នុងកិច្ចប្រជុំកំពូលមហាអនុតំបន់មេគង្គ លើកទី៦នេះ » ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា បញ្ហាមហាអនុតំបន់មេគង្គមានសក្ដានុពលខ្ពស់សម្រាប់បង្កើតបណ្ដាញផលិតកម្មពីតំបន់មួយទៅតំបន់មួយប្រកបដោយភាពប្រកួតប្រជែង និងប្រសិទ្ធភាព ដែលអាចបែងចែកប្រយោជន៍សមស្របដល់ប្រទេសសមាជិក ។ ដូចនេះ តទៅមុខ សមាជិកទាំងអស់គួរបង្កើនការយកចិត្តទុកដាក់លើការតភ្ជាប់ផ្នែកធនធាន ដើម្បីទាញយកអត្ថប្រយោជន៍ឲ្យបានពេញលេញពីការវិនិយោគ ។
សម្ដេចមានប្រសាសន៍បន្តថា ក្នុងនាមជាតំណាងប្រទេសកម្ពុជា សូមស្នើដល់ប្រទេសសមាជិកទាំងអស់ពន្លឿនការអនុវត្តឲ្យបានពេញលេញនូវកិច្ចព្រមព្រៀងសម្រួលការដឹកជញ្ជូនស្របតាមព្រំដែន តាមរយៈការធ្វើបច្ចុប្បន្នភាព នីតិវិធីអនុវត្ត និងជំរុញការអនុវត្តគំនិតផ្ដួចផ្ដើមនេះឲ្យមានប្រសិទ្ធភាព ។
លោក វ៉ាង យី រដ្ឋមន្ត្រីការបរទេសចិន មានប្រសាសន៍ថា ប្រទេសចិននៅតែបន្តជំរុញដល់កំណើនរបស់ប្រទេសតំបន់មេគង្គ ។ លោកថា ៖« ចិនបើកចំហ និងបង្កើតនូវឱកាសសម្រាប់ប្រទេសតំបន់មេគង្គ ពោលគឺទ្វាររបស់ចិនបើកចំហជានិច្ច និងបើកកាន់តែធំឡើងៗ ។ ជាក់ស្ដែង នៅខែវិច្ឆិកា ឆ្នាំ២០១៨នេះ ចិននឹងធ្វើជាម្ចាស់ផ្ទះពិព័រណ៍នាំចេញដ៏ធំមួយនៅសៀងហៃ » ។
លោកបន្តថា ចិននឹងធ្វើជាដៃគូដ៏ធំនៃប្រទេសមហាអនុតំបន់មេគង្គ ដើម្បីជំរុញកំណើននិងការអភិវឌ្ឍ ជាពិសេស ជំរុញការកាត់បន្ថយភាពក្រីក្ររបស់ប្រជាពលរដ្ឋក្នុងប្រទេសមហាអនុតំបន់មេគង្គ ដែលជាប្រទេសជិតខាងរបស់ចិន ។
បើតាមលោក Takehiko Nakao ប្រធានធនាគារអភិវឌ្ឍន៍អាស៊ីថា បច្ចុប្បន្ននេះ ប្រទេសក្នុងមហាអនុតំបន់មេគង្គ គឺមានសេដ្ឋកិច្ចរីកចម្រើនឆាប់រហ័សជាងគេនៅអាស៊ី និងក្នុងពិភពលោក ។ លោកថា ៖« ប្រទេសទាំងនេះទទួលស្គាល់ពីអត្ថប្រយោជន៍នៃសមាហរណកម្មថ្នាក់តំបន់ និងការតភ្ជាប់ទំនាក់ទំនងជាមួយប្រទេសដទៃទៀតក្នុងសកលលោកទាំងមូល។ ADB នឹងបន្តសម្របសម្រួលកម្មវិធីមហាអនុតំបន់ ដោយឈរលើមូលដ្ឋាននៃការជឿទុកចិត្តគ្នាទៅវិញទៅមក និងអក្សរCចំនួនបី ដែលតំណាងឱ្យការតភ្ជាប់ទំនាក់ទំនង (connectivity) ភាពប្រកួតប្រជែង (competitiveness) និងសហគមន៍ (community) » ។
បើតាមសេចក្តីប្រកាសរបស់ធនាគារអភិវឌ្ឍន៍អាស៊ីថា ធនាគារបានអនុម័តថវិកាចំនួន៧ពាន់លានដុល្លារអាមេរិកសម្រាប់កិច្ចសហការរវាងប្រទេសក្នុងមហាអនុតំបន់មេគង្គ (កម្ពុជា ឡាវ និងវៀតណាម) ៕
ចែករំលែកព័តមាននេះ