រាជធានីភ្នំពេញ ៖ នៅវេលាយប់ថ្ងៃសៅរ៍ទី៧ មេសា ស្អែកនេះ សង្វៀនអន្តរជាតិរបស់ទូរទស្សន៍អាស៊ីអាគ្នេយ៍ត្រូវគេកត់សម្គាល់ថាមានលក្ខណៈពិសេសតែម្ដង ដោយសារកីឡាករជើងខ្លាំងកម្ពុជា២រូបត្រូវបានគេផ្គូផ្គងឱ្យជួបប្រកួតជាមួយកីឡាករបរទេសដើម្បីបានលុយចូលឆ្នាំ ។ ការប្រកួតដែលនឹងចាប់ផ្ដើមឡើងពីម៉ោង៨យប់ស្អែកនេះ មានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ…
រាជធានីភ្នំពេញ ៖ នៅវេលាយប់ថ្ងៃសៅរ៍ទី៧ មេសា ស្អែកនេះ សង្វៀនអន្តរជាតិរបស់ទូរទស្សន៍អាស៊ីអាគ្នេយ៍ត្រូវគេកត់សម្គាល់ថាមានលក្ខណៈពិសេសតែម្ដង ដោយសារកីឡាករជើងខ្លាំងកម្ពុជា២រូបត្រូវបានគេផ្គូផ្គងឱ្យជួបប្រកួតជាមួយកីឡាករបរទេសដើម្បីបានលុយចូលឆ្នាំ ។
ការប្រកួតដែលនឹងចាប់ផ្ដើមឡើងពីម៉ោង៨យប់ស្អែកនេះ មានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារប៉ុស្តិ៍អាស៊ីអាគ្នេយ៍មានអ្នកទស្សនាកកកុញស្រាប់ ហើយការប្រកួតត្រូវចំយប់ថ្ងៃសម្រាកនោះផង ។ កីឡាករកម្ពុជា២រូប គឺជើងខ្លាំង ប៉ោ ភារិទ្ធ ធ្លាប់ប្រើឈ្មោះ យ៉េន ឌីណា ល្បីខាងប្រើកណ្ដាប់ដៃផ្ដួលគូប្រកួត និងកីឡាករជើងចាស់ ផុន ផាន់ណា នឹងក្លាយជាគូប្រកួតស៊ីសាច់ហុតឈាមជាមួយកីឡាករបរទេស២រូបនៅលើសង្វៀន ។ លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា២រូបដែលមានឈ្មោះឡើងប្រកួតមិត្តភាពអន្តរជាតិនោះ កីឡាករ ប៉ោ ភារិទ្ធ គឺជាជើងខ្លាំងម្នាក់ដែលលោករំពឹងខ្ពស់ដោយសារតែគេទើបផ្ដួលកីឡាករជើងខ្លាំងថៃជាច្រើនរូបនិងបានស្នើសុំគ្រូបង្វឹកឡើងរេញយកលុយត្រៀមចូលឆ្នាំ ។
លោកថា ជើងខ្លាំងរូបនេះ ស្នើមិនឡើងរេញអន្តរជាតិកៀកនឹងចូលឆ្នាំពេកនោះទេយ៉ាងហោចមុនចូលឆ្នាំមួយអាទិត្យដើម្បីកុំឱ្យខូចមុខខូចមាត់ដើរលេងចូលឆ្នាំ ។ បើទោះជាគេត្រូវប្រឈមនឹងកីឡាករថៃល្អសម្រាប់ការប្រកួតលើកនេះ តែម្នាក់ៗនៅតែមានទំនុកចិត្តចំពោះសមត្ថភាពរបស់កីឡាករកម្ពុជារូបនេះភាគច្រើន ។ គេត្រូវប៉ះប្រកួតជាមួយកីឡាករថៃឈ្មោះ សុ៊ន តិភាព ក្នុងនាមជាគូឯកសម្រាប់ប្រដាល់អន្តរជាតិនៅយប់ស្អែក ។
លោកថាជំនួបរវាងពួកគេគឺជារឿងសំខាន់ ដោយសារអ្នកណាឈ្នះក្រៅពីបានមុខមាត់ និងទឹកប្រាក់តម្លៃខ្លួនក្នុងនាមជាអ្នកឈ្នះ ក៏បានទទួលទំនុកចិត្តពីអ្នកគាំទ្រជាងមុនច្រើនដង ។ ផ្ទុយទៅវិញ បើចាញ់ការប្រកួត គឺមិនខុសពីត្រូវបាក់មុខ និងមានការរិះគន់ពីអ្នកគាំទ្រនោះទេ ។ កីឡាករ ប៉ោ ភារិទ្ធ លោកនៅតែយល់ឃើញថា នឹងធ្វើឱ្យកក្រើកសង្វៀនប្រដាល់អន្តរជាតិរបស់ទូរទស្សន៍អាស៊ីអាគ្នេយ៍នាពេលនោះ បើទោះការប្រដាល់អន្តរជាតិកន្លងមករបស់គេ គឺមានធ្លាក់ដៃម្ដងម្កាលក្ដី ។ លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថា ជំនួបរវាង ប៉ោ ភារិទ្ធ ដែលទើបវាយថៃឈ្នះថ្មីៗ ជាមួយកីឡាករថៃជាដៃគូនឹងមិនធម្មតាសម្រាប់ការប្រកួតទាំងមូល ។
កីឡាករកម្ពុជាលោកថាធ្លាប់ប្រកួត៧០លើក ឈ្នះ៥៨លើក ចាញ់១២លើក និងមិនដែលស្មើ ក្នុងពេលកីឡាករថៃធ្លាប់ប្រកួតដល់៨៣លើក ឈ្នះ៧១លើក ចាញ់១២លើក និងមិនធ្លាប់ស្មើដូចគ្នា ។
សម្រាប់កីឡាករជើងចាស់ ផុន ផាន់ណា ក៏ត្រូវគណៈកម្មការប្រដាល់បង្ហើបថា សុំឡើងរេញដើម្បីយកលុយចូលឆ្នាំផងដែរ ដោយគេត្រូវប៉ះប្រកួតជាមួយកីឡាករមួយរូបមកពីប្រទេសប្រេស៊ីលតែជាសិស្សហ្វឹកហាត់ក្នុងប្រទេសថៃឈ្មោះថាកូ អាកាសតូ ក្នុងនាមជាគូរងឯក ។ លោកថា ការប្រកួតរបស់ពួកគេ នៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលកីឡាករកម្ពុជាក៏រាងធ្លាក់ដៃជាងមុន ។ កីឡាករកម្ពុជារូបនេះគេឈ្នះជាប្រចាំស្ទើរគ្រប់ពេលគេឡើងប្រកួតជាមួយកីឡាករបរទេសនាពេលកន្លងមកមុនពេលបាត់មុខ និងដោយសារតែមានការស្នើពីគ្រូបង្វឹក ទើបកីឡាកររូបនេះត្រូវបានផ្គូផ្គង។ លោកថា កីឡាករប្រេស៊ីលជាដៃគូគេគឺជាជើងខ្លាំងម្នាក់ តែគេមិនទាន់ប្រាកដដូចគ្នាថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះទេ ។
សម្រាប់គូនេះអ្នកគាំទ្រម្ខាងៗមិនហ៊ានជឿជាក់នោះឡើយ ដោយប្រកាសថាត្រឹមតែរង់ចាំអ៊ុតមើលប៉ុណ្ណោះ ។
កីឡាករប្រេស៊ីលធ្លាប់ប្រកួតទើបតែបាន២៨លើក ឈ្នះ១៨លើក ចាញ់១០លើក និងមិនធ្លាប់ស្មើប៉ុណ្ណោះ តែល្បីថាគេក្លាហាន និងឡើងសន្ទុះទើបឱ្យប៉ះប្រកួតជាមួយកីឡាករកម្ពុជា ដែលធ្លាប់ប្រកួតដល់៩០លើក ឈ្នះ៦៧លើក ចាញ់២០លើក និងស្មើ៣លើក ។
នៅសប្ដាហ៍នេះព្រឹត្តិការណ៍ប្រដាល់ពេលព្រឹក និងពេលរសៀលនៅលើសង្វៀនអាស៊ីអាគ្នេយ៍សរុបទាំង៣សង្វៀនក៏មានការប្រកួតអន្តរជាតិផងដែរ ជាពិសេសការប្រដាល់ថ្ងៃអាទិត្យវេលាម៉ោង២រសៀល និងពេលព្រឹកតែម្ដង៕
ចែករំលែកព័តមាននេះ