រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍ MyTVនាថ្ងៃសុក្រ ទី៦ មេសា នេះ កីឡាករកម្ពុជា២រូបត្រូវបានគេរៀបចំឱ្យជួបប្រកួតជាមួយកីឡាករថៃ ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះមួយណាសម្រេចគោលដៅ…
រាជធានីភ្នំពេញ ៖ ការប្រកួតប្រដាល់ជាលក្ខណៈមិត្តភាពអន្តរជាតិនៅលើសង្វៀនទូរទស្សន៍ MyTVនាថ្ងៃសុក្រ ទី៦ មេសា នេះ កីឡាករកម្ពុជា២រូបត្រូវបានគេរៀបចំឱ្យជួបប្រកួតជាមួយកីឡាករថៃ ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះមួយណាសម្រេចគោលដៅ ខណៈកីឡាករថៃដែលពួកគេត្រូវជួបនាពេលនេះហាក់មានសមត្ថភាពខ្លាំងពិបាកផ្ដួលអ៊ីចឹងនោះ ។
គូអន្តរជាតិទី១ កីឡាករ ហឹុម សេរី មកពីក្លិបតាព្រហ្មមានជ័យ មានប្រវត្តិប្រកួត៨៤ដងឈ្នះ៦៨ដង ចាញ់១១ដង ស្មើ៥ដងនិងផ្ដួលគូប្រកួតឱ្យសន្លប់១៨ដង ត្រូវបានគេរៀបចំឱ្យជួបប្រកួតជាមួយកីឡាករថៃឈ្មោះភិតសុគន្ធ ប៉េឡេបូរីរ៉ាំ ក្នុងប្រភេទទម្ងន់៥១គីឡូក្រាម។ កីឡាករថៃរូបនេះធ្លាប់ប្រកួត៩៦ដង ឈ្នះ៧៥ដង ចាញ់១៧ដង ស្មើ៤ដង និងផ្ដួលគូប្រកួតឱ្យសន្លប់២៥ដង ។ គូនេះបើប្រៀបធៀបបទពិសោធន៍ប្រកួតនៅលើសង្វៀនគឺមិនលើសគ្នាប៉ុន្មានទេទើបគេពិបាកប៉ាន់ស្មានលទ្ធផលចុងក្រោយ ដូច្នេះមានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះ អ្នកណាខ្លាំងជាងអ្នកណាគង់តែដឹងទេ ។
គូអន្តរជាតិទី២ កីឡាករ រឿង សារ័ត្ន មកពីក្លិបកងទ័ពពិសេសឆត្រយោង៩១១ មានប្រវត្តិប្រកួត៩១ដង ឈ្នះ៦៤ដង ចាញ់២២ដង ស្មើ៥ដង និងផ្ដួលគូប្រកួតឱ្យសន្លប់១២ដង ត្រូវជួបប្រកួតជាមួយកីឡាករថៃឈ្មោះផ្សាក់អារុណ ភិតសិរីយីម ក្នុងប្រភេទទម្ងន់៦៥គីឡូក្រាម។កីឡាករថៃរូបនេះមានប្រវត្តិប្រកួត១០៩ដងឈ្នះ៧៩ដង ចាញ់២៦ដង ស្មើ៤ដង និងផ្ដួលគូប្រកួតឱ្យសន្លប់បាន៥ដង ។ ទោះបីកីឡាករថៃរូបនេះមានប្រវត្តិប្រកួតច្រើនជាងកីឡាករកម្ពុជាមែនក៏មិនប្រាកដថាឈ្នះនោះដែរដោយសាររឿង សារ័ត្ន ដែលគេធ្លាប់ឃើញកន្លងមកមានវិជ្ជាគុនខ្លាំងមិនធម្មតា ។ ជាពិសេសពេលជួបកីឡាករបរទេសនៅលើសង្វៀនអន្តរជាតិគេកម្រចាញ់ណាស់ប៉ុន្តែលើកនេះមិនទាន់ដឹងថាយ៉ាងណានោះទេ ដោយសាររឿង សារ័ត្ន មួយរយៈមកនេះហាក់បីដូចជាឃ្លាតឆ្ងាយពីសង្វៀនប្រដាល់យូរក្រែលដែរហើយ។
ចំណែកគូប្រកួតមិត្តភាពធម្មតាវិញ កីឡាករ វង្ស វិឆ័យ មកពីក្លិបកងទ័ពពិសេសឆត្រយោង៩១១ ត្រូវបានគេផ្គូផ្គងឱ្យជួបប្រកួតជាមួយកីឡាករ សុខ ទូ មកពីសមាគមកីឡាប្រដាល់ក្រសួងការពារជាតិ និងកីឡាករ ផាន រះ មកពីក្លិបតាព្រហ្មមានជ័យ ត្រូវប្រកួតជាមួយកីឡាករ លីន វិរៈ មកពីក្លិបបុរីរាជសីហ៍ ៕
ចែករំលែកព័តមាននេះ