ខេត្តស្វាយរៀង ៖ មហាជនរិះគន់រថយន្តយីឌុបភ្លៅប្រាំធុនយក្សដឹកអេតចាយ និងដឹកបន្លែផ្លែឈើដែលកំពុងធ្វើចរាចរបំផ្លាញផ្លូវជាតិរហូតដល់ផ្លូវជនបទ ខណៈរថយន្តយីឌុបភ្លៅប្រាំ និងរថយន្តប៉ែនដឹកដីដឹកខ្សាច់ដែលកែច្នៃខុសបច្ចេកទេស ត្រូវបានគណៈកម្មការត្រួតពិនិត្យបច្ចេកទេសយានយន្តចាប់កាត់ទ្រុងផាកពិន័យជាបន្តបន្ទាប់ តាមបទបញ្ជារបស់ សម្តេចតេជោ ឈប់ឲ្យមានរថយន្តធុនយក្សដឹកលើសទម្ងន់ធ្វើចរាចរលើដងផ្លូវសាធារណៈ ដែលនាំឲ្យខូចបាក់ស្រុតផ្លូវស្ពានថ្នល់ ។ ក៏ប៉ុន្តែលើកលែងតែរថយន្តក្រុមហ៊ុនដឹកជញ្ជូនដែលមានផ្លាកយីហោ HC នៅមានវត្តមានលើដងផ្លូវជាតិលេខ១ ដឹកអេតចាយពីរាជធានីភ្នំពេញ មកខេត្តស្វាយរៀង ដាក់នៅភូមិត្រពាំងផ្លុង សង្កាត់បាទី ក្រុងបាវិត និងនៅឃុំសំយ៉ោង ស្រុកកំពង់រោទ៌ ត្រៀមដឹកទៅប្រទេសវៀតណាម និងដឹកបន្លែផ្លែឈើពីក្រុងបាវិត ឆ្ពោះទៅរាជធានីភ្នំពេញ និងរថយន្តដឹករថយន្តពីរោងចក្រដំឡើងរថយន្តក្រុងបាវិត ទៅរាជធានីភ្នំពេញ មិនឃើញសមត្ថកិច្ចណាឃាត់ផាកពិន័យឡើយ ។
ធ្វើឲ្យមហាជនដាក់ចំងល់ហើយធ្វើការរិះគន់ថា នៅមានភាពលំអៀងក្នុងការអនុវត្តន៍ច្បាប់មិនស្មើភាព និងកំពុងអនុវត្តន៍ផ្ទុយពីបទបញ្ជារបស់ សម្តេចតេជោ ឲ្យអាជ្ញាធរស្រុកក្រុងខេត្ត សហការណ៍អនុវត្តបទបញ្ជាតាមមូលដ្ឋានឲ្យមានប្រសិទ្ធិភាព ។ មហាជនធ្វើការិះគន់នេះ កើតឡើងនៅល្ងាចថ្ងៃទី០៥ ខែមេសា ឆ្នាំ២០១៨ ។ ទាក់ទិនករណីខាងលើ មន្ត្រីនគបាលចរាចរណ៍ខេត្ត ដែលឈជើងនៅទីតាំងគណៈកម្មការត្រួតពិនិត្យបច្ចេកទេសយានយន្តខេត្តបានឲ្យដឹងថា ចំពោះរថយន្តដឹកអេតចាយទាំងនោះ ធ្វើចរាចរពេលយប់ជ្រៅមិនអាចបង្ក្រាបបាន ឬឯរថយន្តដឹកបន្លែផ្លែឈើដែលលើសទម្ងន់នោះគណៈកម្មការរបស់លោកបានរាយការណ៍ទៅលោក នួន លីហួន ប្រធានមន្ទីរសាធារណៈការ និងដឹកជញ្ជូនខេត្ត និងជាអនុប្រធានអចិន្ត្រៃយ៍ នៃគណៈកម្មការត្រួតពិនិត្យបច្ចេកទេសយានយន្ត និងរាយការណ៍ទៅលោកស្រីអភិបាលរងខេត្ត ទទួលបន្ទុកបានប្រាប់ថា អនុគ្រោះទៅរថយន្តដឹកបន្លែមិនចាំបាច់ឲ្យរើ ឬសាងទេ នាំឲ្យខូចបន្លែទើបចេះតែអនុគ្រោះ ។
ក៏ប៉ុន្តែមហាជនបានរិះគន់ថា តាមពិតមានការអនុវត្តន៍ច្បាប់រើសអើងលំអៀង គេសង្កេតឃើញថា រថយន្តមានស្លាកយីហោ HC គឺមិនដែលឃើញហៅត្រួតពិនិត្យទេ មហាជនសំណូមពរសូមឲ្យសមត្ថកិច្ចអនុវត្តន៍ច្បាប់ចរាចរណ៍ផ្លូវគោក ឲ្យស្មើភាពគ្នា ដើម្បីសុវត្ថិភាពស្ពានថ្នល់ ៕
ចែករំលែកព័តមាននេះ