រាជធានីភ្នំពេញ ៖ ធ្លាក់ដុំថ្មពីលើការដ្ឋានសំណង់អគារដែលមានកំពស់ខ្ពស់កប់ពពកមួយកន្លែងនៅលើផ្លូវ ៣១០ ត្រូវរថយន្តស៊េរីទំនើបមួយគ្រឿងបណ្តាលឱ្យបែកកញ្ចក់តែគ្មានអ្នកទទួលខុសត្រូវ ។ រថយន្តស៊េរីទំនើបម៉ាក HANTAI ពាក់ផ្លាកលេខ ភ្នំពេញ ២AS-២៥៥៩ មួយគ្រឿង បានបែកកញ្ចក់ផ្នែកខាងមុខ ខណៈ ពេលដែលបុរសម្នាក់កំពុងតែបើកបរតាមផ្លូវសុខៗក៏ស្រាប់តែមានដុំថ្មពីលើការដ្ឋានសំណង់អគារដែលមានកំពស់ខ្ពស់កប់ពពកមួយកន្លែងមកត្រូវនោះ តែមិនមានអ្នកណាម្នាក់ចេញមុខមកធ្វើការដោះស្រាយឡើយ ។
ករណីនេះដែរបានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី០៦ ខែមេសា ឆ្នាំ២០១៨ នៅចំណុចខាងមុខការដ្ឋានសំណង់អគារលេខ៤៦ ផ្លូវលេខ៣១០ ក្នុងសង្កាត់បឹងកេងកងទី១ ខណ្ឌចំការមន ។
លោក ខឹម ណាដែន អាយុ៣៧ឆ្នាំ ជាម្ចាស់រថយន្តបានប្រាប់ឱ្យដឹងថា មុនពេលកើតហេតុឬុបលោកបានបើករថយន្តរបស់លោកមួយគ្រឿងម៉ាក HANTAI ពណ៍ទឹកប្រាក់ ពាក់ផ្លាកលេខ ភ្នំពេញ ២AS-២៥៥៩ តាមបណ្តោយផ្លូវលេខ៣១០ក្នុងទិសដៅពីលិចទៅកើតតែម្នាក់ឯង ។ លុះមកដល់ខាងមុខការដ្ឋានសំណង់អគារមួយកន្លែងខាងលើក៏ស្រាប់តែមានដុំថ្មដែលមានទំហំតូចល្មមធ្លាក់មកត្រូវកញ្ចក់ខាងមុខរថយន្តរបស់លោកបណ្តាលឱ្យស្រាំបែកអស់តែម្តង ។
តាមប្រភពដដែលបានប្រាប់បន្តទៀតថា ដោយមានរថយន្ត និងម៉ូតូច្រើនពេកនោះលោកមិនបានឈប់ភ្លាមទេដោយបន្តបើកទៅខាងមុខបន្តិច និងរកកន្លែងបត់ត្រឡប់ក្រោយមកឈប់ខាងមុខការដ្ឋានខាងលើវិញ ដើម្បីរកមេការខាងការដ្ឋានមកធ្វើការដោះស្រាយគ្នា ។ ពេលនោះរូបលោកក៏បានទៅសួរកម្មករសំណង់ម្នាក់រកមេការការដ្ឋានសំណង់អគារខាងលើប្រាប់ពីរឿងនេះដើម្បីធ្វើការដោះស្រាយគ្នាផងដែរតែមិនមានអ្នកណាម្នាក់ចេញមុខមកធ្វើការដោះស្រាយគ្នាជាមួយនឹងរូបគាត់ឡើយ ។
ដោយមិនមានអ្នកមើលការខុសត្រូវណាម្នាក់ចេញមុខមកធ្វើការដោះស្រាយគ្នានោះ រូបលោកក៏ប្តឹងកម្លាំងមានសម្ថកិច្ចមូលដ្ឋានដោយមានខាងសាលាសង្កាត់ និងនគរបាលប៉ុស្តិ៍បឹងកេងកងទី១ចុះមកដល់កន្លែងកើតហេតុភ្លាមដែរ តែនៅតែមិនមានអ្នក ណាម្នាក់ចេញមកធ្វើការដោះស្រាយទៀត ដោយយគ្រាន់តែបានប្រាប់ឱរូបលោកទៅដាក់ពាក្យបណ្តឹងនៅសាលាសង្កាត់ ប៉ុណ្ណោះ ។
ក្រោយពេលដែលទទួលបាននូវការណែនាំអំពីមន្ត្រីសាលាសង្កាត់បឹងកេងកងរួចហើយ បុរសជាម្ចាស់រថយន្តរងគ្រោះក៏បានទៅដាក់ពាក្យបណ្តឹងផងដែរ ដោយខាងសាលាសង្កាត់នឹងធ្វើការកោះហៅម្ចាស់ការដ្ឋានសំណង់អគារខាងលើដើម្បីមកធ្វើការដោះស្រាយគ្នាជាក្រោយផងដែរ ៕
ចែករំលែកព័តមាននេះ