រាជធានីភ្នំពេញ ៖ ជារៀងរាល់ឆ្នាំ នៅក្នុងឱកាសបុណ្យទានធំៗ ជាពិសេស បុណ្យចូលឆ្នាំ ប្រជាពលរដ្ឋតែងតែរអ៊ូរទាំពីបញ្ហាតម្លៃរថយន្តឈ្នួលឡើងថ្លៃ បើទោះជាប្រមុខដឹកនាំតែងតែអំពាវនាវដល់ក្រុមហ៊ុនដឹកជញ្ជូនឯកជន និងម្ចាស់រថយន្តឈ្នួលនានា រក្សាតម្លៃឈ្នួលរថយន្តនៅដដែលក៏ដោយ ក៏នៅតែមិនមានប្រសិទ្ធភាព ប៉ុន្ដែក្នុងឱកាសបុណ្យចូលឆ្នាំប្រពៃណីខ្មែរខាងមុខនេះ គេអាចសន្មតថា ក្រុមហ៊ុនដឹកអ្នកដំណើរនានា ពិបាកនឹងឡើងថ្លៃបន្តិច ហើយបើឡើងថ្លៃ ក៏មិនដឹងថាឡើងដើម្បីអ្វី ពីព្រោះមានបណ្ដាក្រុមហ៊ុនឯកជននានាបានប្រកាសចែកសំបុត្ររថយន្តក្រុងដោយឥតគិតថ្លៃដល់ប្រជាពលរដ្ឋធ្វើដំណើរទៅលេងស្រុកនៅតាមបណ្ដាខេត្តនានា ។
ម្យ៉ាងទៀត ដោយសារតែពលរដ្ឋមួយចំនួនធំ ក៏មានមធ្យោបាយទាំងរថយន្ត និងម៉ូតូសម្រាប់ធ្វើដំណើរផ្ទាល់ខ្លួនផងដែរ ។ អ្វីដែលពិសេសនិងអស្ចារ្យនោះ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន ក៏បានប្រកាសថា នឹងត្រៀមរថយន្តសម្រាប់ដឹកអ្នកដំណើរប្រមាណ៦០គ្រឿងទៅកាន់បណ្ដាខេត្តមួយចំនួន ។
យោងតាមគេហទំព័រហ្វេសប៊ុករបស់សម្ដេចអគ្គមហាសេនាបតីតេជោ ហ៊ុន សែន ដែលបានប្រកាសនៅថ្ងៃទី៣ មេសា ២០១៨នេះថា សាលារាជធានីភ្នំពេញ បានត្រៀមរថយន្តដឹកជញ្ជូនបងប្អូនអ្នកដំណើរទៅកាន់បណ្តាខេត្តមួយចំនួនដូចជា ៖
-ផ្លូវជាតិលេខ១ ចេញពីភ្នំពេញ ទៅខេត្តកណ្ដាល ព្រៃវែង និងស្វាយរៀង ។
-ផ្លូវជាតិលេខ៣ ចេញពីចោមចៅ ទៅខេត្តកំពត ។
-ផ្លូវជាតិលេខ៤ ចេញពីចោមចៅ ទៅខេត្តកំពង់ស្ពឺ និងព្រះសីហនុ ។
-ផ្លូវជាតិលេខ៥ ចេញពីភ្នំពេញ ទៅខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ ។
-ផ្លូវជាតិលេខ៦ ចេញពីភ្នំពេញ ទៅខេត្តកំពង់ធំ និងសៀមរាប ។
តាមគេហទំព័រដដែលបានបញ្ជាក់ថា រថយន្តនឹងចេញដំណើរចាប់ពីថ្ងៃទី១២ ដល់ថ្ងៃទី១៨ ខែមេសា ឆ្នាំ២០១៨ ។ ហើយជាទូទៅ ក្នុងអំឡុងថ្ងៃនោះ គឺជាថ្ងៃដែលម្ចាស់រថយន្ត និងក្រុមហ៊ុនដឹកអ្នកដំណើរឯកជនដំឡើងថ្លៃសំបុត្រសម្រាប់ដឹកអ្នកដំណើរ ។
សម្ដេចមានប្រសាសន៍ថា នៅក្នុងឱកាសបុណ្យភ្ជុំបិណ្ឌខាងមុខនេះ រាជរដ្ឋាភិបាលក៏នឹងត្រៀមរៀបចំរថយន្តក្រុងសម្រាប់ដឹកជញ្ជូនបងប្អូនប្រជាពលរដ្ឋដោយឥតគិតថ្លៃ ទៅកាន់បណ្ដាខេត្តនានាផងដែរ ។ នេះគឺជាការយកចិត្តទុកដ៏ធំមួយរបស់រាជរដ្ឋាភិបាលមកលើប្រជាពលរដ្ឋ សម្រាប់សម្រួលដល់ការសន្សំសំចៃថវិកា ដើម្បីជួបជុំបងប្អូនក្នុងឱកាសបុណ្យទានធំៗ ។
តាមរយៈការផ្ដល់ជូននេះ តើក្រុមហ៊ុនដឹកអ្នកដំណើរឯកជន និងក្រុមអ្នករត់តាក់ស៊ី អាចនឹងដំឡើងថ្លៃសំបុត្របានដែរឬទេ នៅក្នុងឱកាសបុណ្យចូលឆ្នាំខ្មែរខាងមុខនេះ ?
បើតាមក្រុមហ៊ុនដឹកអ្នកដំណើរនានាបានបញ្ជាក់ថា ខ្លួននឹងមិនដំឡើងថ្លៃសំបុត្រទេ នៅក្នុងឱកាសបុណ្យចូលឆ្នាំខ្មែរខាងមុខ ហើយវាក៏មិនខុសពីឆ្នាំមុនៗដែរ ក្រុមហ៊ុនតែងតែសន្យាជាមុន ប៉ុន្តែដល់ថ្ងៃចូលឆ្នាំ សំបុត្រនៅតែឡើងថ្លៃដដែល ៕
ចែករំលែកព័តមាននេះ