ទីក្រុងបាងកក ៖ បើទោះជាការនាំចេញបន្តកើនឡើងក្នុងខែកុម្ភៈក្តី ប៉ុន្តែលទ្ធភាពមានសង្គ្រាមពាណិជ្ជកម្មរវាងសហរដ្ឋអាមេរិក និងចិន ព្រមទាំងកំណើនតម្លៃប្រាក់បាត នឹងប៉ះពាល់ដល់ការនាំចេញរបស់ប្រទេសថៃ ។ លោកស្រី Ghanyapad…
ទីក្រុងបាងកក ៖ បើទោះជាការនាំចេញបន្តកើនឡើងក្នុងខែកុម្ភៈក្តី ប៉ុន្តែលទ្ធភាពមានសង្គ្រាមពាណិជ្ជកម្មរវាងសហរដ្ឋអាមេរិក និងចិន ព្រមទាំងកំណើនតម្លៃប្រាក់បាត នឹងប៉ះពាល់ដល់ការនាំចេញរបស់ប្រទេសថៃ ។
លោកស្រី Ghanyapad Tantipipatpong ប្រធានក្រុមប្រឹក្សាជាតិអ្នកនាំចេញ បាននិយាយថា ក្រុមអ្នកនាំចេញនៅតែព្រួយបារម្ភពីគោលនយោបាយការពារនិយមរបស់សហរដ្ឋអាមេរិក និងវិធានការសងសឹកពីប្រទេសទទួលរងផលប៉ះពាល់ ជាពិសេស ចិន។ លោកស្រីថា ៖« បើស្ថានការណ៍រវាងសហរដ្ឋអាមេរិក និងចិន បន្តវិវត្តន៍ទៅជាសង្គ្រាមពាណិជ្ជកម្មនោះសេដ្ឋកិច្ច និងខ្សែសង្វាក់ផ្គត់ផ្គង់ពិភពលោក នឹងទទួលរងផលប៉ះពាល់ » ។
លោកស្រីបន្តថា ការនាំចេញកសិផល និងអាហារ នឹងទទួលរងផលប៉ះពាល់ខ្លាំងជាងគេប្រសិនបើតម្លៃប្រាក់បាតបន្តកើនឡើង ។ ផលប៉ះពាល់នេះអាចនឹងធ្វើឲ្យការនាំចេញក្នុងឆ្នាំនេះកើនឡើងបានតែ៥%ប៉ុណ្ណោះ ទាបជាងការព្យាករមុនដែលស្មើ៦% ។
ក្រសួងពាណិជ្ជកម្មបានរាយការណ៍កាលពីថ្ងៃទី២១ ខែមីនា កន្លងមកថា ការនាំចេញដែលមិនគិតពន្ធ បានកើនឡើង១២ខែជាប់ៗ គ្នាក្នុងខែកុម្ភៈ និងនាំមកនូវប្រាក់ចំណូលឲ្យប្រទេសថៃចំនួន២០,៤ប៊ីលានដុល្លារ ដោយសារសេដ្ឋកិច្ចល្អប្រសើរឡើង និងតម្រូវការរបស់ដៃគូពាណិជ្ជកម្មសំខាន់ៗកើនឡើង ។
ប៉ុន្តែតម្លៃប្រាក់បាតបន្តកើនឡើង បានប៉ះពាល់ដល់ការនាំចេញរបស់ប្រទេសថៃ ដែលធ្វើឲ្យការនាំចេញគិតជាតម្លៃប្រាក់បាតធ្លាក់ចុះជាលើកដំបូង ក្នុងរយៈពេល១២ខែមកនេះ ។
លោក Visit Limlurcha អនុប្រធានក្រុមប្រឹក្សាខាងលើ ឲ្យដឹងថា ៖« ពន្ធរបស់អាមេរិកនឹងចាប់ផ្តើមប៉ះពាល់ដល់ការនាំចេញរបស់ថៃក្នុងត្រីមាសទី២នេះ ហើយវាច្បាស់ជាប៉ះពាល់ដល់ត្រីមាសទី៣ ផងដែរ » ។
ទោះជាយ៉ាងណា លោក Chaichan Chareonsuk អគ្គលេខាធិការនៃក្រុមប្រឹក្សាតែមួយថ្លែងថា ពន្ធរបស់អាមេរិក និងចិន អាចនឹងមានផលប៉ះពាល់មិនផ្ទាល់ច្រើនជាងលើការនាំចេញរបស់ថៃ ។ លោកថា ៖« ប្រទេសថៃគួរតែត្រៀមខ្លួនសម្រាប់ផលប៉ះពាល់ទាំងនេះ ខណៈផលិតផលចិនអាចនឹងហូរចូលមកកាន់អាស៊ី និងមជ្ឈិមបូព៌ា ហើយធ្វើឲ្យការប្រកួតប្រជែងនៅលើទីផ្សារសកលកាន់តែតានតឹង » ។
លោកបន្ថែមថា ក្រុមហ៊ុនផលិតក្នុងប្រទេសចិន អាចនឹងផ្លាស់ប្តូរទីតាំងផលិតកម្មរបស់ពួកគេទៅកាន់ប្រទេសក្នុងតំបន់អាស៊ាន ។ ការប្តូរទីតាំងនេះនឹងប៉ះពាល់ការនាំចេញរបស់ថៃទៅកាន់ប្រទេសជាច្រើន ៕
ចែករំលែកព័តមាននេះ