រាជធានីភ្នំពេញ ៖ រថយន្ត២គ្រឿងបានរងការខូចខាតយ៉ាងដំណំនៅក្នុងឧប្បត្តិហេតុគ្រោះថ្នាក់ចរាចរមួយ ប៉ុន្តែមិនបានបណ្ដាលឲ្យមានមនុស្សណាម្នាក់រងរបួស ឬស្លាប់ឡើយ ។ ក្នុងនោះមានរថយន្តសាំយ៉ុង១គ្រឿងបានបើកបរបត់ឆ្វេងដៃឆ្លងផ្លូវមិនទាន់ផុតផង ស្រាប់តែមានរថយន្ត១គ្រឿងទៀតម៉ាកហាយឡែនឌ័រ បើកក្នុងល្បឿនលឿនដែរ ទៅដល់វាក់ជាន់ហ្វ្រាំងមិនជាប់ និងគេចចេញក៏មិនទាន់ ក៏បានបុកចំពាក់កណ្ដាលខ្លួនរថយន្តសាំយ៉ុងនោះពេញទំហឹងតែម្ដង ។
ឧប្បត្តិហេតុគ្រោះថ្នាក់ចរាចរមួយនេះ បានកើតឡើងកាលពីវេលាម៉ោង០៥និង៣០នាទីព្រឹក ថ្ងៃទី០៦ ខែមេសា ឆ្នាំ២០១៨ នៅលើកំណាត់ផ្លូវអូរដឹមកប់ស្រូវ ត្រង់ចំណុចជិតរោងចក្រស្បែកជើង ភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
តាមប្រភព័ត៌បានឲ្យដឹងថា រថយន្តម៉ាកសាំយ៉ុងនោះ ពណ៍ស ពាក់ផ្លាកលេខ ភ្នំពេញ ២W-៦៤៩៣ បើកបរដោយបុរសមិនស្គាល់អត្តសញ្ញាណម្នាក់ ហើយរងយន្តនេះបានរងការខូចខាតចំហៀងខ្លួនខាងស្ដាំ ។ ចំណែករថយន្តម៉ាកតូយ៉ូតាហាយឡែនឌ័រ ពណ៍ស ពាក់ផ្លាកលេខ ភ្នំពេញ ២AJ-៩៥៩១ បើកបរដោយបុរសម្នាក់មិនស្គាល់អត្តសញ្ញាណដូចដូចគ្នាដែរ និងបានខូចខាតក្រពឹតរួញមុខទាំងស្រុង ។
ប្រភពខាងលើបានបន្តទៀតថា នៅមុនពេលកើតហេតុ គេបានឃើញរថយន្តម៉ាកតូយ៉ូតាហាយឡែនឌ័រ បើកបរធ្វើដំណើរក្នុងទិសដៅពីជើងទៅត្បូងក្នុងល្បឿនលឿន ។ លុះពេលទៅដល់ត្រង់ចំណុចកើតហេតុ បានវាក់ជាមួយរថយន្តម៉ាកសាំងយ៉ុង ដែលកំពុងបើកបរធ្វើដំណើរក្នុងទិសដៅបញ្ច្រាសទិសគ្នាពីត្បូងទៅជើង ។ លុះពេលទៅដល់ត្រង់ចំណុចកើតហេតុ បានបត់ឆ្វេងឆ្លងផ្លូវចូលទៅតាមផ្លូវបេតុងភូមិជង្រុក ហើយដោយសារតែកំពុងបើកលឿនជាន់ហ្វ្រាំងឈប់មិនទាន់ និងគេចចេញក៏មិនទាន់ រថយន្តហាយឡែនឌ័រនេះ បានបុកចំពាក់កណ្ដាលខ្លួនរថយន្តសាំយ៉ុងពេញទំហឹង បណ្ដាលឲ្យរងការទាំងសងខាងតែម្ដង ។
ប្រភពដដែលបានបន្តទៀតថា ខណៈនោះសំណាងល្អណាស់ដែលគ្រាន់តែខូចរថយន្ត មិនបានបណ្ដាលឲ្យអ្នកបើកបរព្រមទាំងអ្នកជិះនៅក្នុងរថយន្តទាំង២គ្រឿងនោះរងគ្រោះឡើយ ។ ក្រោយពេលកើតហេតុ ភាគីទាំងពីរបានសម្របសម្រួលគ្នាបញ្ចប់រឿង និងហៅរថយន្តស្ទូចទៅស្ទូចយករថយន្តទៅធ្វើការជួសជុលរៀងៗខ្លួន ៕
ចែករំលែកព័តមាននេះ