មហាជនរិះគន់ចំៗ ទៅលើមន្ត្រីកាំកុងត្រូល
- ស្វាយរៀង
ខេត្តស្វាយរៀង ៖ មានការរិះគន់ចំៗពីមន្ត្រីរាជការ និងប្រជាពលរដ្ឋទៅលើមន្ត្រីកាំកុងត្រូលថា មិនចុះធ្វើការត្រួតពិនិត្យគីមីអាហារលើបន្លែ នំចំណី ត្រីសាច់ មាន់ទា សាច់ជ្រូក ពោះគោ…
ខេត្តស្វាយរៀង ៖ មានការរិះគន់ចំៗពីមន្ត្រីរាជការ និងប្រជាពលរដ្ឋទៅលើមន្ត្រីកាំកុងត្រូលថា មិនចុះធ្វើការត្រួតពិនិត្យគីមីអាហារលើបន្លែ នំចំណី ត្រីសាច់ មាន់ទា សាច់ជ្រូក ពោះគោ បេះដូងគោ បេះដូងជ្រូក និងគ្រឿងក្នុងមាន់ទា ដែលឈ្មួញសម្រុកនាំចូលពីប្រទេសវៀតណាមចូលមករដ្ឋបាល នៃខេត្តស្វាយរៀង តាមច្រករបៀង និងច្រកតំបន់ដូចគេហែកឋិន គ្មានការត្រួតពិនិត្យឃើញតែដាក់មនុស្ស ជាជនស៊ីវិលឈរទារប្រាក់ពីប្រជាពលរដ្ឋរកស៊ីតូចតាច និងឈ្មួញដោយមិនខ្វល់ពីសុខមាលភាព របស់ប្រជាពលរដ្ឋអ្នកបរិភោគឡើយ។ ជាពិសេសនៅព្រឹកថ្ងៃទី០៥ មេសា ២០១៨នេះ នៅច្រករបៀងកំពង់ស្ពាន ស្ថិតនៅភូមិបាវិតកណ្តាល សង្កាត់បាវិត ក្រុងបាវិត មានឈ្មួញវៀតណាមធំៗ ០៤នាក់ មកជួលផ្ទះប្រជាពលរដ្ឋខ្មែរ០៤កន្លែងស្តុកទំនិញ សម្រាប់ចែកចាយក្នុងក្រុងបាវិត និងក្នុងខេត្តស្វាយរៀង ហើយដឹករហូតរាជធានីភ្នំពេញ និងឈ្មួញវៀតណាមទាំង០៤កន្លែង គ្មានចេះខ្មែរសូម្បីមួយមាត់។
បើតាមមន្ត្រីនគរបាលម្នាក់សុំមិនបញ្ចេញឈ្មោះបានឲ្យដឹងថា នៅក្រុងបាវិតមានកន្លែងចែកចាយទំនិញធំៗ ០៥កន្លែង នៅអមផ្លូវទៅច្រករបៀងកំពង់ស្ពាន មាន០៤កន្លែងដែលមានម៉ូយនាំទំនិញមកពីប្រទេសវៀតណាមច្រើនជាងគេដឹកតាមម៉ូតូ តាមម៉ូតូរ៉ឺម៉ក និងតាមរថយន្តគឺចាប់ពីម៉ោង០៤ទៀបភ្លឺ រហូតដល់ម៉ោង០៨ព្រឹក បើកម៉ូតូ និងម៉ូតូរ៉ឺម៉កប្រមាណជិត១០០គ្រឿង រថយន្តជិត១០គ្រឿងឯណោះ។ ប្រភពដដែលបន្តទៀតថា ទំនិញដែលឈ្មួញដឹកចូលមករួមមាន មើមខ្ទឹមស ខ្ទឹមក្រហម បន្លែមានខ្ទឹមបារាំង ដំឡូងបារាំង ត្រសក់ ប៉េងបោះ ស្ពៃ ក្តោប ស្ពៃបូកគោ ស្ពៃចង្កឹះ ផ្កាខាត់ណា ត្រប់។ល។ ត្រី ចិញ្ចឹមគ្រប់ប្រភេទ សាច់មាន់ សាច់ទា គ្រឿងក្នុងមាន់ទា ពោះគោ ពោះជ្រូក សាច់ជ្រូក បេះដូងគោ បេះដូងជ្រូក។ នំបាញ់ត្រាង កាត់លាយខ្លាញ់បង្គាក្រៀម នំកញ្ចប់ សម្រាប់លក់ឲ្យក្មេងសិស្សសាលា ដែលជាហេតុប្រជាពលរដ្ឋ មន្ត្រីរាជការក៏ដូចមាតាបិតាសិស្សមានការព្រួយបារម្ភអំពីផល់ប៉ះពាលដល់សុខមាលភាពរបស់ពួកគាត់ និងកូនចៅរបស់គាត់។
ហើយបានរិះគន់ចំៗទៅលើមន្ត្រីកាំកុងត្រូលតែម្តង ដោយមន្ត្រីកាំកុងត្រូលជាមន្ត្រីជំនាញក្នុងការត្រួតពិនិត្យបច្ចេកទេសលើគីមីអាហារ។ រីឯប្រជាពលរដ្ឋបានរិះគន់ទៀតថា នៅច្រកកំពង់ស្ពាន ក្នុងមួយខែឃើញមន្ត្រីកាំកុងត្រូលចុះត្រួតពិនិត្យម្តងទៅ២ដងប៉ុណ្ណោះ។ គ្រាន់តែបន្លាចឬឲ្យល្អមើលក៏ប៉ុន្តែ មានដាក់កុងត្រូលជជុះឈរទារយកប្រាក់ពីឈ្មួញដោយស្លៀកពាក់ស៊ីវិល ហើយនៅច្រករបៀងសាលាក្រុង ដែលមិនទាន់ដាក់ឈ្មោះខាងវៀតណាម ហៅថាប៉ុស្តិ៍កេមែរ ស្ថិតនៅភូមិតាបឹម សង្កាត់បាវិត ក៏ដូចជាច្រករបៀងធំដែរ ឈ្មួញនាំចូលទំនិញដូចគេហែកឋិន រួចយកមកដាក់ចែកចាយតាមផ្លូវជាតិលេខ១ ស្ថិតនៅភូមិតាពៅ សង្កាត់បាវិត យកទៅតាមផ្សារតូចធំ ក្នុងខេត្ត និងយកទៅរាជធានីភ្នំពេញ បង្កប់តាមរថយន្តក្រុងក៏មាន។ ហើយបើតាមប្រជាពលរដ្ឋ បានឲ្យដឹងថា គ្រប់ច្រករបៀង និងច្រកតំបន់ទាំងអស់គឺសុទ្ធតែដាក់មនុស្សឲ្យឈរទារប្រាក់ពីឈ្មួញ តាមមុខរបរ ឬមុខទំនិញគឺនិយាយឲ្យសាមញ្ញ ប្រជាពលរដ្ឋនិយាយថា មន្ត្រីកាំកុងត្រូលជួលមនុស្សជាជនស៊ីវិលឲ្យទៅឈយកប្រាក់ជំនួស ឬនិយាយឲ្យស្រួលស្តាប់គឺលក់ច្រកតែម្តង។
ដូចជាច្រករបៀងសាលាក្រុងមានបុរសម្នាក់ឈរទារប្រាក់ នៅប៉ុស្តិ៍តំបន់ ឃុំដូង ស្រុករមាសហែក ដាក់មនុស្សឈយកប្រាក់ពីឈ្មួញតែម្តង ហើយបើមន្ត្រីនគរបាលវិញគាត់ឲ្យដឹងថា គ្រប់ច្រករបៀងចំនួន១៨ច្រក តំបន់០៥ និងច្រកទ្វេភាគី១ គឺជួលមនុស្សជាជនស៊ីវិល ឬសាច់ញាតិឲ្យឈយកប្រាក់តែម្តង។ រីឯមន្ត្រីកាំកុងត្រូលគឺមានតែនៅតាមច្រកទ្វារព្រំដែនអន្តរជាតិប៉ុណ្ណោះ ទាំងនេះគឺជាបញ្ហាប្រឈមខ្លាំងណាស់ចំពោះសុវត្ថិភាពចំណីអាហារ និងសុខមាលភាពរបស់ប្រជាពលរដ្ឋ។ ទាក់ទិនករណីនេះដែរមន្ត្រីកាំកុងត្រូលម្នាក់បានឲ្យដឹងថា ការពិនិត្យមិនបានគ្រប់ជ្រុងជ្រោយគឺដោយសារសាខាកាំកុងត្រូលស្វាយរៀងមានមន្ត្រីតិច គឺឈជើងនៅតាមច្រកទ្វារព្រំដែនអន្តរជាតិ តាមច្រករបៀង និងច្រកតំបន់កន្លងមកគឺគ្រាន់តែដាក់កម្លាំង ចល័តចុះត្រួតពិនិត្យក្នុងមួយខែបានតែ០៤ដងប៉ុណ្ណោះ ហើយនៅតាមច្រកតំបន់នៅក្នុងខែឧសភា ២០១៨ខាងមុង នឹងដាក់កម្លាំងឈរជើងត្រួតពិនិត្យ។ ចំណែកច្រករបៀងមានច្រើនជិត២០ច្រកតំបន់មាន០៥ តើមានកម្លាំងណាចុះត្រួតពិនិត្យឲ្យបានគ្រប់ច្រក និងចុះទៅពិនិត្យតាមផ្សារនៅទីប្រជុំជនផងទើបមានចន្លោះប្រហោងទើបមានដាក់កម្លាំងប្រជាពលរដ្ឋជួយមើល។
មន្ត្រីដដែលបន្តទៀតថា ការបើកឲ្យប្រជាពលរដ្ឋ ឬឈ្មួញចេញចូលដឹកទំនិញពីប្រទេសវៀតណាម នេះ គឺមិនមែនសមត្ថកិច្ចកាំកុងត្រូលទេ គឺនគរបាល និងទាហានវរៈការពារព្រំដែនដែលឈរជើងតាមច្រករបៀង និងច្រកតំបន់នោះ ដូច្នេះកាំកុងត្រូលមិនអាចទប់ស្កាត់បានទេ។ ហើយបើការដាក់មនុស្សយកប្រាក់នេះ មិនមែនមានតែកាំកុងត្រូលទេ គឺច្រកនីមួយៗមាន០៥ស្ថាប័នឯណោះ គឺគ្រាន់តែសុំប្រាក់ថ្លៃបាយតិចតួចសម្រាប់កម្លាំងឈរជើងតាមច្រកហើយពេលសួរថាស្ថាប័នណាខ្លះឆ្លើយថាទៅមើលទៅ។ ទាក់ទិនករណីខាងលើនេះដែរលោក ផឹង និល ប្រធានសាខាកាំកុងត្រូលស្វាយរៀង បានមានប្រសាសន៍តាមទូរសព្ទ័ថា សូមទៅជួបជំនួយការគាត់នៅច្រកទ្វារព្រំដែនអន្តរជាតិក្រុងបាវិតទៅ។ ហើយតាមការពិតទៅ គឺអាជ្ញាធរខេត្តលោកយោគយល់ដល់ប្រជាពលរដ្ឋរស់នៅតាមតំបន់ព្រំដែន បើកឲ្យចេញចូលរកស៊ី វាជាធម្មតា ប្រទេសក្បែរគ្នាតែងតែមានចេញចូលទៅមកដោះដូរទំនិញ ឬរកស៊ី គាត់មិនអាចទប់ស្កាត់បានទេ ចាំគាត់ឲ្យមន្ត្រីចុះទៅមើល៕
https://youtu.be/z27G7tGKWJg
ចែករំលែកព័តមាននេះ