រាជធានីភ្នំពេញ ៖ អតីតអ្នកតំណាងរាស្ត្រនៃអតីតគណបក្សសង្គ្រោះជាតិ (CNRP) មួយក្រុមមានគ្នា៣នាក់ ដឹកនាំដោយលោក លោក អ៊ូ ច័ន្ទរ័ត្នបានចូលទៅជួបអ្នកទោសនៅពន្ធនាគារព្រៃសកាលពីព្រឹកថ្ងៃទី០៥ ខែមេសា…
រាជធានីភ្នំពេញ ៖ អតីតអ្នកតំណាងរាស្ត្រនៃអតីតគណបក្សសង្គ្រោះជាតិ (CNRP) មួយក្រុមមានគ្នា៣នាក់ ដឹកនាំដោយលោក លោក អ៊ូ ច័ន្ទរ័ត្នបានចូលទៅជួបអ្នកទោសនៅពន្ធនាគារព្រៃសកាលពីព្រឹកថ្ងៃទី០៥ ខែមេសា ឆ្នាំ២០១៨ នេះ ។
យ៉ាងណាមិញលោក អ៊ូ ច័ន្ទរ័ត្នបានលើកឡើងថា អ្នកទោសដែលលោកបានជួបសុទ្ធជាអ្នកទោសមនសិកា មិនមែនជាអ្នកទោសឧក្រិដ្ឋសម្លាប់មនុស្ស ឬប្លន់ទ្រព្យសម្បត្តិ ឬសាហាវព្រៃផ្សៃទេ ដូច្នេះលោកស្នើ «សុំថ្នាក់ដឹកនាំមេត្តាដោះលែងពួកគេភាគច្រើនជាយុវជន» ។ បន្ទាប់ចូលបានជួបអ្នកទោសមួយចំនួនរួចមកលោក អ៊ូ ច័ន្ទរ័ត្នបានថ្លែងប្រាប់អ្នកសារព័ត៌មានថា អ្នកទោសដែលលោកបានចូលជួបនោះបានសំដែងការសប្បាយរីករាយ ព្រោះមិនសូវមានអ្នកចូលមកជួបទេ ។
អ្នកទោសដែលលោកបានជួប បានសំណូមពរតាមរយៈរូបលោកថា សូមឲ្យក្រុមគ្រួសាររបស់ពួកគេត្រូវបានអនុញ្ញាតិបានចូលជួបពួកគេញឹកញាប់ផង ។ លោកបានបន្តថា អ្នកទោសបានលើកឡើងថា កន្លែងស្នាក់នៅមានសភាពលំបាកគ្មានកង្ហារ និងមានមូសច្រើនទៀតផង ដែលតែងតែខាំខ្លាំងណាស់ជាប់ដៃជាប់ជើងរហូត ។ លោកបានអំពាវនាវដល់រដ្ឋាភិបាលលើកលែងទោសដល់ពួកគាត់ផងនាឱកាសបុណ្យចូលឆ្នាំខ្មែរ ឆ្នាំ២០១៨ ខាងមុខនេះ ។ អតីតអ្នកតំណាងរាស្ត្ររូបនេះបន្តថា ៖ «ការដាក់ពន្ធនាគារបែបនេះ អាចប៉ះពាល់អនាគត និងក្រុមគ្រួសាររបស់ពួកគាត់ ។ ព្រោះអ្នកខ្លះមានឪពុកម្តាយក្រុមគ្រួសារ អ្នកខ្លះមានកូនផង» ។
គួរមានការប្រណៃពីថ្នាក់ដឹកនាំក្នុងបុណ្យចូលឆ្នាំខ្មែរនេះ ។ លោកថា ពេលស្នើសុំចូលមានសមាភាព៥នាក់ តែត្រូវបានអនុញ្ញាតតែ៣នាក់ទេ ។ ពេលចូលដល់ក្នុងពន្ធនាគារ គឺក្រុមលោក មិនបានជួបលោកមាជ សុវណ្ណារ៉ានោះទេ ប្រហែលជានៅជាប់ពិន័យនៅឡើយ ។ អ្នកទោសទាំងនោះនៅតែមានស្មារតីចំពោះជាតិ និងសង្គមដដែល ហើយសម្រាប់ស្មារតីបុគ្គលនៅតែរឹងមាំដដែល ។ ការចូលជួបនេះមានមនុស្ស១៤នាក់ ដែលក្នុងនោះ គឺរួមមានលោកអ៊ុំ សំអានម្នាក់ផងដែរ ។
លោកបានលើកឡើងថា បន្ទាប់ពីលោកជុន ចាន់បុត្របានបន្លំខ្លួនចូលក្នុងពន្ធនាគារកន្លងមក ការចូលសួរសុខទុក្ខ អ្នកតំណាងរាស្ត្រត្រូវបានហាមឃាត់ សូម្បីអ្នកតំណាងរាស្ត្រក្តី ហើយពេលនេះលោកជាអតីតតំណារាស្ត្រទើបបានចួលមកជួបពួកគាត់ ៕
ចែករំលែកព័តមាននេះ