រាជធានីភ្នំពេញ ៖ នៅក្នុងសម័យបច្ចេកវិទ្យារីកចម្រើន ជីវភាពប្រចាំថ្ងៃរបស់ពលរដ្ឋ ត្រូវបានគេមើលឃើញថា មួយចំនួនធំពឹងលើបច្ចេកវិទ្យា ។ ដោយឡែក ក្នុងវិស័យធនាគារ ក៏ដូច្នេះដែរ គឺបានផ្លាស់ប្តូរការធ្វើប្រតិបត្តិការបែបចាស់ៗ មកធ្វើប្រតិបត្តិការបែបទាន់សម័យ និងស្របតាមការរីកចម្រើននៃបច្ចេកវិទ្យាវិញ។ ជាក់ស្ដែង វិស័យធនាគារបានប្តូរពីការដក-ដាក់លុយតាមបញ្ជរ មកដក-ដាក់តាមម៉ាស៊ីនស្វ័យប្រវត្តិ និងធ្វើដោយខ្លួនឯង ។ គ្រាន់តែប៉ុណ្ណឹងមិនទាន់គ្រប់គ្រាន់នៅឡើយទេ បច្ចុប្បន្ន វិស័យធនាគារបានកែច្នៃឲ្យមានការទូទាត់ប្រាក់នានាតាមប្រព័ន្ធអេឡិចត្រូនិក និងទូរស័ព្ទដៃផងដែរ ។
លោកបណ្ឌិត អុិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានមានប្រសាសន៍ថា ការអភិវឌ្ឍវិស័យធនាគារឲ្យក្លាយជាធនាគារឌីជីថល គឺស្របទៅតាមការរីកចម្រើននៃបច្ចេកវិទ្យានៅពេលបច្ចុប្បន្ននេះ ហើយការដែលកែប្រែទៅជាធនាគារឌីជីថល ក៏ដើម្បីសម្រួលដល់អតិថិជន និងប្រជាពលរដ្ឋផងដែរ ។ លោកថា ៖« ការផ្លាស់ប្តូរមកប្រើប្រាស់ការទូទាត់តាមបែបជាធនាគារឌីជីថល វាផ្ដល់ប្រយោជន៍ច្រើនណាស់ ។ ជាក់ស្ដែង ដូចយើងឃើញស្រាប់ហើយ នៅរាជធានីភ្នំពេញមានការកកស្ទះចរាចរណ៍ស្ទើរតែរាល់ថ្ងៃ និងគ្រប់ពេលទៅហើយ ដូចនេះ បើសិនជាអតិថិជនត្រូវការទូទាត់ប្រាក់សុទ្ធនៅបញ្ជរធនាគារ ឬចង់ទៅទូទាត់តាមស្ថាប័នផ្សេងទៀត ត្រូវការពេលវេលាច្រើន និងចំណាយលើថ្លៃធ្វើដំណើរផងដែរ ។ ក៏ប៉ុន្តែបើសិនជាប្រជាពលរដ្ឋងាកមកប្រើប្រាស់ការទូទាត់តាមធនាគារឌីជីថល ពួកគាត់អាចទូទាត់បាននៅផ្ទះ ឬកន្លែងណាក៏បានដែរ » ។
លោកបន្តថា នៅពេលដែលមានការប្រើប្រាស់ធនាគារឌីជីថលនេះកាន់តែច្រើន ការធ្វើដំណើរទៅទូទាត់ប្រាក់ពីកន្លែងមួយទៅកន្លែងមួយ ក៏នឹងត្រូវកាត់បន្ថយ ហើយនៅពេលនោះ បរិមាណផ្សែងពុលដែលចេញពីរថយន្ត និងម៉ូតូនៅតាមដងផ្លូវ ក៏ត្រូវកាត់បន្ថយដែរ ។ ម្យ៉ាងទៀត នៅពេលយើងប្រើធនាគារឌីជីថល យើងមិនចាំបាច់មានប្រាក់សុទ្ធនៅតាមខ្លួនឡើយ ព្រោះវាប្រៀបដូចជាកាបូបប្រាក់តូចមួយ តែអ្នកដទៃមិនអាចមើលឃើញទេ ។ ដូចនេះ វាក៏បានកាត់បន្ថយនូវអំពើចោរកម្មតាមទីសាធារណៈបានមួយកម្រិតទៀតផងដែរ ។
ប្រធានប្រតិបត្តិធនាគារឈានមុខគេនៅកម្ពុជារូបនេះបន្ថែមថា ដោយសារតែមើលឃើញពីកត្តាសំខាន់ និងអត្ថប្រយោជន៍នៃធនាគារឌីជីថលនេះ ទើបក្នុងនាមជាធនាគារក្នុងស្រុក និងឈានមុខគេ បានអភិវឌ្ឍន៍ជាបណ្តើរៗពីធនាគារដែលប្រើបុគ្គលិកចាំបម្រើអតិថិជន មកជាធនាគារប្រើបុគ្គលិកបង្រៀនអតិថិជនវិញ តាមរយៈការធ្វើប្រតិបត្តិការដោយអតិថិជនខ្លួនឯង ។ លោកថា ៖« សមិទ្ធផលថ្មីរបស់ធនាគារអេស៊ីលីដា ក្នុងវិស័យធនាគារឌីជីថល គឺអេស៊ីលីដាទាន់ចិត្ត ដែលសេវាកម្មនេះបានបង្កើតជាង១ឆ្នាំហើយ ។ ដំបូងឡើយ នៅពេលអតិថិជនចង់ទូទាត់ប្រាក់តាមសេវាកម្មនេះ ត្រូវយកប្រាក់ទៅដាក់នៅបញ្ជរជាមុនសិន តែក្រោយមក ធនាគារក៏បានសម្រេចតភ្ជាប់សេវាកម្មមួយនេះទៅគណនីធនាគាររបស់អតិថិជនស្រាប់តែម្តង។ ដូចនេះ រាល់ការទូទាត់លែងជាបញ្ហាទៀតហើយ ឲ្យតែមានសមតុល្យទឹកប្រាក់នៅក្នុងគណនីធនាគារ » ។
លោកបញ្ជាក់ថា បច្ចុប្បន្ន ចំណូលរបស់ធនាគារអេស៊ីលីដាជាង៨៥%បានមកពីការប្រាក់ឥណទាន ហើយក្រៅពីនោះ បានមកពីការផ្ដល់សេវាកម្មជូនអតិថិជន ។ ដោយឡែក នៅពេលអនាគត ចំណូលបានមកពីការប្រាក់ឥណទាននឹងធ្លាក់មកនៅត្រឹមតែជាង៦០% ហើយជាង៣០%បានមកពីការផ្ដល់សេវាកម្មជូនអតិថិជន ។ ដូចនេះ ចាប់ពីពេលនេះតទៅ ធនាគារនឹងប្រឹងពង្រឹងសេវាកម្មរបស់ខ្លួនឲ្យកាន់តែរឹងមាំ និងផ្ដល់ទំនុកចិត្តជូនអតិថិជន ។
គួរបញ្ជាក់ថា តាមរបាយការណ៍របស់ធនាគារជាតិនៃកម្ពុជា គិតត្រឹមចុងឆ្នាំ២០១៧ ធនាគារពាណិជ្ជ ដែលកំពុងធ្វើអាជីវកម្មនៅ
ក្នុងប្រទេសកម្ពុជា មានចំនួន៣៩ និងធនាគារឯកទេសចំនួន១៥ ។ ដោយឡែក ទ្រព្យសកម្មសរុបក្នុងវិស័យធនាគារ និងហិរញ្ញវត្ថុ គិតត្រឹមដំណាច់ឆ្នាំ២០១៧ មានចំនួន១៣៥,១ទ្រីលានរៀល ឬស្មើនឹងប្រមាណ៣៣,៧៥ពាន់លានដុល្លារអាមេរិក ៕
ចែករំលែកព័តមាននេះ