រាជធានីភ្នំពេញ ៖ ដើម្បីឱ្យការគ្រប់គ្រង ទិន្ន័យប្រជាពលរដ្ឋកាន់តែងាយស្រួល ក៏ដូចជាសម្រួលក្នុងការផ្ដល់សេវាកម្មពីរដ្ឋ និងពីវិស័យឯកជនមានភាពច្បាស់លាស់ តម្លាភាព និងរហ័សទាន់ចិត្តនោះ ក្នុងរយៈពេលដ៏ខ្លីខាងមុខ ពលរដ្ឋកម្ពុជា…
រាជធានីភ្នំពេញ ៖ ដើម្បីឱ្យការគ្រប់គ្រង ទិន្ន័យប្រជាពលរដ្ឋកាន់តែងាយស្រួល ក៏ដូចជាសម្រួលក្នុងការផ្ដល់សេវាកម្មពីរដ្ឋ និងពីវិស័យឯកជនមានភាពច្បាស់លាស់ តម្លាភាព និងរហ័សទាន់ចិត្តនោះ ក្នុងរយៈពេលដ៏ខ្លីខាងមុខ ពលរដ្ឋកម្ពុជា នឹងមានលេខកូដ១ដែលមាន១០ខ្ទង់ សម្រាប់សម្គាល់អត្តសញ្ញាណរបស់ខ្លួន ។ នេះបើតាមមន្ត្រីនៃអគ្គនាយកដ្ឋានអត្តសញ្ញាណកម្ម ។
លោក យិន ម៉ាលីណា អគ្គនាយករងនៃអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានមានប្រសាសន៍ថា ចាប់ពីឆ្នាំ២០១៩តទៅ ប្រជាពលរដ្ឋម្នាក់ៗនឹងមានលេខកូដ១០ខ្ទង់សម្រាប់សម្គាល់អត្តសញ្ញាណម្នាក់មួយ ប៉ុន្ដែសូមកុំច្រឡំគ្នាជាមួយលេខនៅក្នុងអត្តសណ្ណាប័ណ្ណ ។ លោកថ្លែងបែបនេះនៅក្នុងវេទិការដ្ឋាភិបាលអេឡិចត្រូនិកកម្ពុជា-កូរ៉េ កាលពីថ្ងៃទី២៩ មីនា កន្លងមក ។
លោកបន្តថា ៖« យើងបង្កើតលេខកូដហ្នឹង ពេលប្រជាពលរដ្ឋប្តូរអត្តសញ្ញាប័ណ្ណ ត្រូវព្រីនលេខកូដនេះដាក់លើអត្តសញ្ញាប័ណ្ណវិញ សម្រាប់យកទៅទទួលយកសេវាផ្សេងៗ ។ អីចឹងការផ្ទៀងផ្ទាត់ទិន្នន័យសម្រាប់បុគ្គលលែងផ្ទៀងផ្ទាត់តាមឈ្មោះបុគ្គលទៀតហើយ »។
លោកលើកឡើងថា ៖« ហេតុអ្វីបានជាយើងត្រូវការអត្តសញ្ញាណ? ជាទូទៅអត្តសញ្ញាណនេះ គឺជាសិទ្ធិមនុស្សដែលត្រូវមានពីកំណើត ហើយយើងបានអនុវត្តទៅតាមគោលដៅសហវត្សប្រកបដោយនិរន្តរភាព ។ ក្នុងប្រទេសនីមួយៗ ត្រូវតែផ្តល់អត្តសញ្ញាណខាងផ្លូវច្បាប់ជូនប្រជាពលរដ្ឋឱ្យអស់នៅត្រឹមឆ្នាំ២០៣០ ។ អីចឹងគោលដៅរបស់យើង ត្រូវធានានូវការអនុវត្តលក្ខខណ្ឌជាអន្តរជាតិ ហើយអត្តសញ្ញាណនេះជាឧបករណ៍មួយរបស់រាជរដ្ឋាភិបាលដើម្បីគ្រប់គ្រងមនុស្សឱ្យបានជាក់លាក់ »។
លោកថា ៖« បើអត់មានប្រព័ន្ធនេះទេ ការគ្រប់គ្រងនិងការផ្តល់សេវារបស់យើង ក៏មិនទាន់ច្បាស់លាស់ដែរ អីចឹងចាំបាច់ត្រូវមានត្រូវមានអត្តសញ្ញាណខាងផ្លូវច្បាប់ »។
លោកបន្ថែមថា ៖« បច្ចុប្បន្ន ប្រទេសយើង បើនិយាយពីការប្រើប្រាស់កាត គឺមានច្រើនណាស់ ប៉ុន្តែកាតទាំងអស់ត្រូវការកាតអត្តសញ្ញាណប័ណ្ណសញ្ញាតិខ្មែរមួយទៀតដើម្បីបញ្ជាក់ថា កាតទាំងនោះត្រឹមត្រូវ ។ នៅថ្ងៃក្រោយទៅដើម្បីកាត់បន្ថយកាតទាំងអស់នេះបាន យើងងាកមកប្រើប្រាស់លេខកូដសម្គាល់ខ្លួនបុគ្គលវិញ បានន័យថា យើងត្រូវលេខកូដតែមួយ(Unique ID)។ បើយើងមាន Unique ID អីចឹងកាតទាំងអស់នោះលែងចាំបាច់ទៀតហើយ នៅក្នុងគោលដៅរដ្ឋាភោបាលអេឡិចត្រូនិក » ។
ប្រធាននាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មាននៃក្រសួងប្រៃសណីយ៍ និងទូរគមនាគមន៍ លោក អ៊ូ ផាន់ណារិទ្ធិ មានប្រសាសន៍ថា ៖« ទៅថ្ងៃខាងមុខ បើយើងនឹងមាននឹងលេខកូដ១សម្រាប់សម្គាល់នូវអត្តសញ្ញាណរបស់យើងនោះគឺល្អហើយ ហើយការផ្ដល់សេវានានាក៏លឿនរហ័សផងដែរ ប៉ុន្តែធ្លាប់បានគិតទេថាប្រសិនទិន្នន័យនោះធ្លាក់ចូលដល់ដៃជនទីបី នឹងមានរឿងអ្វីកើតឡើង ?» ។
លោកបញ្ជាក់ថា ៖« អ្នកដែលយកលេខកូដយើងទៅប្រើ បើមានបញ្ហាអ្វីមួយ គឺបញ្ជាក់ថាយើងជាអ្នកធ្វើ គ្មាននណាក្រៅពីយើងនោះទេ »៕
ចែករំលែកព័តមាននេះ