ខេត្តពោធិ៍សាត់ ៖ នៅព្រឹកថ្ងៃទី០៥ ខែមេសា ឆ្នាំ២០១៨ នៅសាលាខេត្តពោធិ៍សាត់ មានធ្វើពិធីប្រកាសផ្ទេរភារកិច្ច និងតែងតាំងមុខតំណែងមន្ត្រីថ្នាក់ដឹកនាំចំនួនពីររូប ក្រោមអធិបតីភាព លោក ប៉ាវ ហមផាន រដ្ឋលេខាធិការ តំណាងដ៍ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
តាមព្រះរាជក្រឹត្យលេខ នស រកត ១៣១៣ ចុះថ្ងៃទី២៩ ខែធ្នូ ឆ្នាំ២០១៧ បានត្រាស់បង្គាប់តែងតាំង និងផ្ដល់ឋានៈ លោកស្រី ជុក សុផានី ពីអភិបាលរងខេត្តពោធិ៍សាត់ ជាទីប្រឹក្សាក្រសួងមហាផ្ទៃ មានឋានៈស្មើអនុរដ្ឋលេខាធិការ ។ អនុក្រឹត្យលេខ ២៣២ អនក្រ.តត ចុះថ្ងៃទី២៧ ខែកុម្ភៈ ឆ្នាំ២០១៨ បានសម្រេចតែងតាំងលោកស្រី ម៉ែន ផល្លី ឋានន្តរស័ក្កិឧត្តមមន្ត្រីថ្នាក់លេខ៥ ពីអភិបាលរងស្រុកក្រគរ ឲ្យកាន់មុខតំណែងជាអភិបាលរងខេត្តពោធិ៍សាត់ ជំនួសលោកស្រី ជុក សុផានី ដែលបានផ្លាស់ទៅបំពេញការងារថ្មីនៅក្រសួងមហាផ្ទៃ ។
លោក ប៉ាវ ហមផាន រដ្ឋលេខាធិការតំណាង សម្ដេចក្រឡាហោម បានថ្លែងថា ការផ្ទេរភារកិច្ច និងតែងតាំងមុខតំណែងមន្ត្រីថ្នាក់ដឹកនាំទាំងពីររូបនេះជារឿងធម្មតារបស់មន្ត្រីរាជការ ក្នុងការតំឡើងឋានៈ តួនាទី ភារកិច្ច ការផ្លាស់ប្ដូរបទពិសោធន៍ការងារ និងការលើកទឹកចិត្តដល់សាម៉ីខ្លួនដែលបានខិតខំបម្រើការងារជូនសង្គមជាតិ និងប្រជាជនកន្លងមកនេះ ។
លោកស្រី ជុក សុផានី និងលោកស្រី ម៉ែន ផល្លី បានចូលបំរើការងារតាំងពីឆ្នាំ១៩៨២មកម្ល៉េះ បានតស៊ូ និងឆ្លងកាត់ការលំបាកគ្រប់បែបយ៉ាងនៅតាមស្ថាប័នមន្ទីរនានា និងជាអភិបាលរងក្រុងស្រុក ដូច្នេះហើយទើបមកដល់ពេលនេះសមល្មម នឹងទទួលបានមុខតំណែងពី ព្រះមហាក្សត្រ និងរាជរដ្ឋាភិបាល ។
លោករដ្ឋលេខាធិការសូមឲ្យលោកស្រី ម៉ែន ផល្លី សហការណ៍ល្អជាមួយអភិបាល អភិបាលរងខេត្តទាំងអស់ ដើម្បីបន្តដឹកនាំការងារឲ្យកាន់តែប្រសើរឡើងថែមទៀត ។ ជាមួយគ្នានេះលោកប៉ាវ ហមផាន ក៏បានកោតសរសើរយ៉ាងខ្លាំងចំពោះការរីកចំរើននូវសមិទ្ធផលថ្មីៗជាច្រើនក្នុងទឹកដីខេត្តពោធិ៍សាត់ ក្រោមការដឹកនាំរបស់លោក ម៉ៅ ធនិន អភិបាលនៃគណៈអភិបាលខេត្ត ។ លោកសង្ឃឹមថា ក្រោយពីការចូលកាន់មុខតំណែងអភិបាលរងជាយ៉េនឌ័រនេះ នឹងបានជាធនធានមនុស្សកាន់តែខ្លាំងឡើងថែមទៀត ក្នុងការដឹកនាំគ្រប់គ្រងខេត្តឲ្យកាន់តែរីកចម្រើន និងមានការគាំទ្រពីប្រជាពលរដ្ឋ ៕
ចែករំលែកព័តមាននេះ