រាជធានីភ្នំពេញ ៖ បុរសម្នាក់ដឹកកូនប្រុសតូចម្នាក់មកពីខេត្តកំពង់ចាម បើករថយន្តម៉ាកកាមរីបាឡែន មកដល់ក្ដាន់ពីរស្មានតែស្តុបខៀវ បានជាន់ហ្គែរបើកលឿនជ្រុលទៅបុកគូទរថយន្ត CRV រុញទៅបុកគូទរថយន្តកាមរីបាឡែនមួយគ្រឿងទៀត បណ្ដាលឲ្យរងការខូចខាតយ៉ាងដំណំ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង០៩និង២០នាទីយប់ ថ្ងៃទី០៤ ខែមេសា ឆ្នាំ២០១៨ តាមបណ្តោយផ្លូវសហព័ន្ធរុស្ស៊ី នៅចំណុចមុខសួនច្បារក្តាន់ពីរ ស្ថិតនៅក្នុងសង្កាត់មិត្តភាពខណ្ឌ៧មករា ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុ គេបានឃើញបុរសម្នាក់រួមនិងកូនប្រុសតូចម្នាក់ បើករថយន្តមួយគ្រឿងម៉ាកកាមរីបាឡែន ពណ៌ស ពាក់ផ្លាកលេខ ភ្នំពេញ ២AF១០៩៤ បើកបរតាមបណ្ដោយផ្លូវសហព័ន្ធរុស្ស៊ីក្នុងទិសដៅពីកើតទៅលិច ទើបតែបើកចេញមកពីខេត្តកំពង់ចាម ខណៈពេលមកដល់ចំណុចកើតហេតុ មុខសួនក្ដាន់ពីរ ស្មានតែភ្លើងស្តុបពណ៌ខៀវ ក៏ជាន់ហ្គែរស្រាប់តែលោតភ្លើងក្រហម តែរថយន្តជ្រុលហ្គែរទៅបុកគូទរថយន្តនៅពីមុខមួយគ្រឿងម៉ាក CRV ពណ៌ទឹកប្រាក់ ពាក់ផ្លាកលេខ ភ្នំពេញ ២AD-១១៧៤ ហើយរុញរថយន្ត CRV ជ្រុលទៅបុកគូទរថយន្តកាមរីបាឡែនមួយគ្រឿងទៀតចំពីក្រោយ បណ្ដាលឲ្យក្រពឹតគូទក្រោយចំហៀងខាងស្តាំ ចំណែកឯរថយន្តបង្កវិញខ្ទេចអស់មួយកំណាត់ខាងមុខ សំណាងល្អហើយដែលមិនមានអ្នករងរបួសមួយគ្រោះថ្នាក់ដល់អាយុជីវិតនោះទេ ។
ក្រោយពេលកើតហេតុ សមត្ថកិច្ចមូលដ្ឋានបានមកដល់បានធ្វើការជួយសម្របសម្រួលខាងរថយន្តបង្ក ព្រមសងទៅឲ្យខាងរថយន្តកាមរីបាឡែនចំនួន៥០ដុល្លារបញ្ចប់រឿង ឬឯរថយន្ត CRV វិញត្រូវបានម្ចាស់រថយន្តបង្កធានាយកទៅជួសជុលឲ្យដើម្បីបញ្ចប់រឿងកុំឲ្យវែងឆ្ងាយតទៅទៀត ៕
ចែករំលែកព័តមាននេះ