ខេត្តបាត់ដំបង ៖ អតីតអ្នកប្រដាល់ដ៏ល្បីល្បាញមួយរូប ដែលបានបាត់មុខពីសង្វៀនប្រដាល់នាប៉ុន្មានឆ្នាំចុងក្រោយនេះ ហើយល្បីថា មានជំពាក់វាក់វិននឹងការសេពថ្នាំញៀនស្ទើរដកខ្លួនមិនរួចផងនោះ គឺលោកពេជ្រ ប៊ុនធឿន បានផ្ដល់បទសម្ភាសន៍ជាមួយកោះសន្តិភាព នៅព្រឹកថ្ងៃទី៣…
ខេត្តបាត់ដំបង ៖ អតីតអ្នកប្រដាល់ដ៏ល្បីល្បាញមួយរូប ដែលបានបាត់មុខពីសង្វៀនប្រដាល់នាប៉ុន្មានឆ្នាំចុងក្រោយនេះ ហើយល្បីថា មានជំពាក់វាក់វិននឹងការសេពថ្នាំញៀនស្ទើរដកខ្លួនមិនរួចផងនោះ គឺលោកពេជ្រ ប៊ុនធឿន បានផ្ដល់បទសម្ភាសន៍ជាមួយកោះសន្តិភាព នៅព្រឹកថ្ងៃទី៣ មេសា ថា ៖ «ខ្ញុំពិតជាបានបោះបង់អាជីពជាអ្នកប្រដាល់កន្លងមកមែន… ហើយខ្ញុំក៏ធ្លាប់ពាក់ព័ន្ធនឹងការប្រើប្រាស់ថ្នាំញៀនផងដែរ តែពេលនេះ ខ្ញុំបានបោះបង់អំពើអបាយមុខ ដែលសង្គមស្អប់ខ្ពើមនេះអស់រយៈពេលជាច្រើនខែកន្លងមកហើយ ព្រោះខ្ញុំចង់ផ្ដើមសាងជីវិតថ្មី ពិសេស ចង់ក្លាយជាគ្រូបង្វឹកក្បាច់គុនបុរាណខ្មែរម្នាក់»។
ស្ថិតក្នុងវ័យ៣៦ឆ្នាំ មានដុះពុកមាត់ និងពុកចង្កា ព្រមទាំងមានមាឌធំក្រអាញផង ដែលមើលទៅគេហាក់មានសុខភាពយ៉ាងមាំទាំបំផុត ពេជ្រ ប៊ុនធឿន បានបង្ហាញស្នាមញញឹមបន្តិចហើយនិយាយថា៖ «ខ្ញុំបានលង់ខ្លួនធ្លាក់ក្នុងរណ្ដៅអវចីនៃគ្រឿងញៀនអស់រយៈពេលជាច្រើន ឆ្នាំ តាមការអូសទាញរបស់មិត្តភក្ដិ ។ នេះជាមូលហេតុដែលនាំឲ្យខ្ញុំត្រូវបោះបង់អាជីពជាអ្នកប្រដាល់ ។ ខ្ញុំមានការសោកស្ដាយបំផុត ចំពោះការប្រព្រឹត្តទង្វើមិនគប្បី ដែលនាំឲ្យសង្គមស្អប់ខ្ពើម ។ ខ្ញុំសូមទោសចំពោះមហាជន ដែលធ្លាប់គាំទ្រខ្ញុំ.. ហើយខ្ញុំក៏សូមអរគុណផងដែរ ចំពោះមហាជនដែលនៅតែគិតអំពីខ្សែជីវិតរបស់ខ្ញុំ.. ចង់ដឹងសុខទុក្ខរបស់ខ្ញុំរហូតដល់ពេលនេះ »។
អតីតអ្នកប្រដាល់ជើងខ្លាំង ដែលមានស្រុកកំណើតនៅភូមិផ្កាស្លា សង្កាត់ចំការសំរោង ក្រុងបាត់ដំបង រូបនេះបានប្រាប់ថា ពេលនេះ ខ្លួនបានបោះបង់គ្រឿងញៀនហើយ តែខ្លួនមិនអាចឡើងសង្វៀនប្រកួតដូចមុនបានទៀតទេ ព្រោះអន់កម្លាំង តែចង់ក្លាយជាគ្រូប្រដាល់ម្នាក់ ដើម្បីជួយបង្វឹកដល់កីឡាករជំនាន់ក្រោយ។
អ្នកខេត្តបាត់ដំបង ដែលនិយមចូលចិត្តកីឡាប្រដាល់ បានចាប់ផ្ដើមស្គាល់មុខ និងក្បាច់ប្រដាល់ដ៏ខ្លាំងក្លារបស់កីឡាកររូបនេះ តាមរយៈការប្រើជង្គង់ និងកែងផ្ដូលគូប្រកួតមិនឲ្យលើសពីទឹកទី២ ឬទី៣ឡើយ ។ ក្នុងកាលៈទេសៈនោះ កីឡាកររូបនេះ កាន់តែល្បីល្បាញទ្វេដង នៅពេលដែលគេផ្ដូលគូប្រកួតឲ្យសន្លប់ដល់ទៅ២នាក់ក្នុងរយៈពេលតែប៉ុន្មាននាទីប៉ុណ្ណោះ ពេលឡើងសង្វៀនប្រដាល់ម្ដង ដែលនេះជាការមិនធ្លាប់មានសោះក្នុងប្រវត្តិសាស្ត្រអ្នកកីឡាប្រដាល់។
បើតាមប្រវត្តិដែលរៀបរាប់ដោយក្រុមគ្រួសារ អ្នកប្រដាល់ពេជ្រ ប៊ុនធឿន ជាគ្រាប់ពូជដែលបណ្ដុះចេញពីក្នុងក្លិបកីឡាប្រដាល់«ពន្លឺសាមគ្គី» ដែលមានគ្រូបង្វឹកគឺលោកសៅ ថិន និងលោកសៅ ប៊ុនធឿន នៅសង្កាត់អូរចា ក្រុងបាត់ដំបង ក្នុងអំឡុងចុងទសវត្សឆ្នាំ១៩៩០។ប៉ុន្តែបើតាមការរំលឹកឡើងវិញ របស់លោកពេជ្រ ប៊ុនធឿន បានប្រាប់ថា៖ «តាមពិត ខ្ញុំចាប់ផ្ដើមឡើងវ៉ៃលើសង្វៀនតាំងពីឆ្នាំ១៩៩៣មកម្លេ៉ះ»។ ប៊ុនធឿនបានរៀបរាប់អំពីប្រវត្តិប្រដាល់របស់ខ្លួនដូច្នេះថា កាលនោះខ្លួនទើបមានអាយុត្រឹម១១ឆ្នាំប៉ុណ្ណោះ ។ ខ្លួនតែងទៅមើលគេដាល់គ្រប់ពេលនៅក្នុងពហុកីឡដ្ឋានក្រុងបាត់ដំបង។ ពេជ្រ ប៊ុនធឿន បានប្រាប់អំពីការឡើងសង្វៀនលើកដំបូងក្នុងឆ្នាំ១៩៩៣ ថា ពេលនោះអ្នករៀបចំផ្គូផ្គងកីឡាបានសួររកគូប្រកួតបើកឆាកដែលមានវ័យក្មេងបំផុត(កុមារ)។ ពេលនោះខ្លួនក៏សុំគេឡើងប្រកួតទាំងមិនធ្លាប់ឡើងដាល់ម្ដងសោះ ហើយអ្នករៀបចំក៏យល់ព្រម។ ប៊ុនធឿន និយាយថា ពេលឡើងលើសង្វៀនខ្លួនភ័យឡើងស្លេកមុខ ហើយពេលចាប់ ផ្ដើមវ៉ៃ គូប្រកួតម្ខាងទៀតបានដេញវ៉ៃសន្ធាប់មកលើខ្លួនយ៉ាងខ្លាំងស្ទើរទប់ទល់មិនបាន ។ ប៉ុន្តែចៃដន្យនៅទឹកទី២ ខ្លួនបានទាត់ដៃគូ១ជើងចំកញ្ចឹងកបណ្ដាលឲ្យដួួលសន្លប់ស្ដូកតែម្ដង ។
នេះជាការចាប់ផ្ដើមឡើងសង្វៀនប្រដាល់លើកដំបូងបង្អស់របស់ខ្លួន ។ អតីតអ្នកប្រដាល់រូបនេះបានបញ្ជាក់ថា ចាប់តាំងពីពេលនោះមក លោកគ្រូសៅ ប៊ុនធឿន និងលោកគ្រូសៅ ថិន បានទទួលយកខ្លួនធ្វើជាសិស្សក្នុងក្លិបបង្ហាត់បង្រៀនខ្លួនរហូតមក ខណៈឪពុកម្ដាយ និងបងប្អូនមិនបានដឹងទាល់តែសោះ។ លោក សាត ថាន ដែលជាឪពុកបង្កើតលោក ពេជ្រ ប៊ុនធឿន បានមានប្រសាសន៍ថា ដំបូងគាត់មិនដឹងថា កូនប្រុសគាត់ឡើងលើសង្វៀនប្រដាល់នោះទេ តែគាត់បានដឹងនៅពេលមានគេនិយាយប្រាប់អំពីជ័យជម្នះរបស់កូនប្រុសនៅលើសង្វៀនប្រដាល់ ។ លោក សាត ថាន បានបញ្ជាក់ថា ពេលលោកបានទៅមើលកូនឡើងសង្វៀនប្រដាល់ លោកមានការស្ញប់ស្ញែងយ៉ាងខ្លាំង ព្រោះឃើញកូនវាយបានល្អបំផុត ហើយខ្លាំងទៀតផង ។ ឃើញដូច្នេះលោកក៏ចាប់ផ្ដើមលើកទឹកចិត្ត និងជួយបង្ហាត់បង្រៀនក្បាច់ពិសេសៗបន្ថែមទៀតដល់កូនចាប់តាំងពីពេលនោះមក ព្រោះរូបលោកក៏ជាអតីតអ្នកប្រដាល់ជើងខ្លាំងគួរសមម្នាក់ដែរកាលពីសម័យមុន។ ប៉ុន្តែ លោក សាត ថាន ហាក់បង្ហាញពីការសោកស្ដាយយ៉ាងខ្លាំងចំពោះអាជីពនិងភាពល្បីល្បាញរបស់កូន ពេលលោករៀបរាប់អំពីប្រវត្តិកូនប្រុសតាំងពីចំណុចចាប់ផ្ដើមរហូតមកដល់បច្ចុប្បន្ននេះ ។
តាមរយៈកោះសន្តិភាពលោក សាត ថាន បានសំណូមពរ និងសុំអំពាវនាវដល់ថ្នាក់ដឹកនាំដែលពាក់ព័ន្ធនឹង
វិស័យកីឡា សូមមេត្តាជួយស្រោចស្រង់ដល់កូនប្រុសគាត់ផង ដើម្បីឲ្យគេរួចចាកឆ្ងាយអំពីគ្រឿងញៀន បើទោះជាពេលនេះកូនរបស់លោកបានប្ដេជ្ញាចិត្តថានឹងបោះបង់នូវគ្រឿងញៀនហើយក្ដី ព្រោះលោកមានជំនឿថា កូនប្រុសរបស់លោកនៅមានសុខភាពល្អ និងមានតម្រិះវិជ្ជាអាចបង្ហាត់បង្រៀនក្បាច់គុនបុរាណខ្មែរបានដដែល។ ជាមួយគ្នានេះដែរ អតីតកីឡាករប្រដាល់ដ៏ល្បីលោកពេជ្រ ប៊ុនធឿន ក៏បានរំលឹកខ្លះៗអំពីស្នាដៃនៃប្រវត្តិប្រដាល់របស់ខ្លួនថា នៅក្នុងជីវិតប្រដាល់ លោកធ្លាប់ទទួលបានខ្សែក្រវាត់ក្រុមហ៊ុន M150 ធ្លាប់ទទួលបានពានរង្វាន់លេខ១ទូទាំងប្រទេសនិងពានរង្វាន់ដទៃទៀត រួមទាំងមេដាយផងស្ទើររាប់មិនអស់ ។ ប៊ុនធឿន បានអះអាងថា ខ្លួនធ្លាប់ត្រូវក្រុមគ្រួសារយកទៅដាក់មណ្ឌលកែប្រែជាច្រើនលើកដោយសារថ្នាំញៀន។
ប៉ុន្តែបន្ទាប់ពីចេញពីមណ្ឌលកែប្រែលើកចុងក្រោយនេះ ខ្លួនបានប្ដេជ្ញាចិត្តនៅចំពោះមុខឪពុកម្ដាយខ្លួនថា នឹងលះបង់នូវអំពើអបាយមុខដែលសង្គមស្អប់ខ្ពើមនេះចោលឱ្យអស់។ អតីតកីឡាករប្រដាល់ដែលធ្លាប់សេពថ្នាំញៀនរូបនេះបាននិយាយដូច្នេះថា៖«មកដល់ពេលនេះអ្នកដទៃនៅតែគិតថា ខ្ញុំនៅតែជាមនុស្សញៀនថ្នាំដដែល តែខ្ញុំមិនខឹងគេទេ ព្រោះខ្ញុំបានប្ដេជ្ញាចិត្តហើយថាឈប់.. ខ្ញុំមានការជឿជាក់លើខ្លួនឯង ។ ដូច្នេះមានតែការលះបង់ ហើយខ្ញុំនឹងព្យាយាមធ្វើឲ្យបាន.. ឲ្យគេឃើញនូវទង្វើល្អរបស់ខ្ញុំ ទើបគេជឿជាក់លើខ្ញុំ»។ ប៉ុន្តែប៊ុនធឿន បានប្រាប់ថា ពេលនេះខ្លួនសម្រាកនៅផ្ទះ គ្មានការងារធ្វើទេ ។ ខ្លួនចង់ក្លាយជាគ្រូបង្វឹកដ៏ល្អម្នាក់នៅក្លិបកីឡាណាមួយប្រសិនបើមានអ្នកជួយខ្លួន។
ជាមួយគ្នានេះ ពេជ្រ ប៊ុនធឿន បានបង្ហើបឲ្យដឹងដែរថា ខ្លួនមានគម្រោងចង់បើកក្លិបប្រដាល់ដោយ ខ្លួនឯងនៅលើទីធ្លាដ៏តូចមួយនៅខាងមុខផ្ទះ តែក្រុមគ្រួសារមិនមានថវិកាសម្រាប់ជួយជ្រោមជ្រែងទេ ។ ប៊ុនធឿន មានបំណងស្នើសុំដល់សប្បុរសជនឬស្ថាប័នពាក់ព័ន្ធនានាជួយឧបត្ថម្ភដល់រូបគេផង ដើម្បីបានបើកក្លិបបង្ហាត់ក្បាច់គុនបុរាណខ្មែរដល់យុវជនជំនាន់ក្រោយកុំឲ្យសាបសូន្យ ព្រោះគេមានជំនឿយ៉ាងមុតមាំថា គេនឹងអាចធ្វើបានចំពោះការងារនេះ៕
គួររំលឹកទៀតថា ៖
https://kohsantepheapdaily.com.kh/article/605854.html
ចែករំលែកព័តមាននេះ