រាជធានីភ្នំពេញ ៖ អតីតមេដឹកនាំអតីតគណបក្សប្រឆាំងលោក សម រង្ស៊ី និងប្រពន្ធរបស់លោក គឺលោកស្រី ជូឡុង ស៊ូមួរ៉ា ព្រមទាំងមនុស្ស៤នាក់ទៀត ដែលត្រូវបានគេស្គាល់ថា ជាមេដឹកនាំចលនាសង្គ្រោះជាតិនៅក្រៅប្រទេស របស់ក្រុមអ្នកប្រឆាំង ត្រូវបានអយ្យការអមសាលាដំបូងរាជធានីភ្នំពេញចេញដីកាកោះហៅ ឲ្យចូលបំភ្លឺ នៅអយ្យការអមសាលាដំបូងរាជធានីភ្នំពេញ ។
យោងតាមដីកាកោះចុះថ្ងៃទី៣០ ខែមីនា ឆ្នាំ២០១៨ និងចេញដោយលោក សៀង សុខ ព្រះរាជអាជ្ញារងនៃសាលាដំបូងក្រុងភ្នំពេញ ឲ្យដឹងថា មានមនុស្សចំនួន៦នាក់ ក្នុងនាមជា «ជនសង្ស័យ» ពាក់ព័ន្ធនឹងការបង្កើតចលនាសង្គ្រោះជាតិខុសច្បាប់ ត្រូវបានបង្គាប់ឲ្យចូលទៅបំភ្លឺករណីសង្ស័យចោទថា បង្កឲ្យមានភាពវឹកវរធ្ងន់ធ្ងរក្នុងសង្គម ប៉ះពាល់ដល់សន្តិសុខជាតិ ក្នុងគោលបំណងផ្តួលរំលំអាជ្ញាធរស្របច្បាប់ នៃព្រះរាជាណាចក្រកម្ពុជា ។
បើយោងតាមដីកាដែលទទួលបាននៅថ្ងៃទី០៤ ខែមេសា ឆ្នាំ២០១៨នេះ ដីកាកោះហៅជនសង្ស័យទាំង៦នាក់ ត្រូវបានកម្លាំងសមត្ថកិច្ចបានយកទៅបិទនៅតាមរបងផ្ទះរៀងៗខ្លួន ។
ជនសង្ស័យចំនួន៦នាក់ ដែលត្រូវបានអយ្យការអមសាលាដំបូងរាជធានីភ្នំពេញចេញកោះឲ្យចូលបំភ្លឺចាប់ពីថ្ងៃទី២២ ដល់ថ្ងៃទី៣០ ខែឧសភា ឆ្នាំ២០១៨ ខាងមុខនេះ ។ លោក សម រង្ស៊ី ត្រូវបានកោះហៅឲ្យចូលនៅថ្ងៃទី២២ ខែឧសភា ឆ្នាំ២០១៨ វេលាម៉ោង៩ព្រឹក លោកអេង ឆៃអ៊ាង ឲ្យចូលថ្ងៃទី២៣ ខែឧសភា ឆ្នាំ២០១៨ វេលាម៉ោង៩ព្រឹក ។ លោកស្រី ជូឡុង សូមួរ៉ា កោះហៅចូលថ្ងៃទី២៤ ខែឧសភា ឆ្នាំ២០១៨ វេលាម៉ោង៩ព្រឹក ។ លោក ហូរ វ៉ាន់ កោះហៅចូលថ្ងៃទី២៨ ខែឧសភា ឆ្នាំ២០១៨ វេលាម៉ោង៩ព្រឹក ។ លោក នុត រំដួល កោះហៅចូលថ្ងៃទី២៩ ខែឧសភា ឆ្នាំ២០១៨ វេលាម៉ោង៩ព្រឹក និងលោក តុ វ៉ាន់ចាន់ កោះហៅចូលថ្ងៃទី៣០ ខែឧសភា ឆ្នាំ២០១៨ វេលាម៉ោង៩ព្រឹក ។
គួរបញ្ជាក់ថា ក្រៅពីសំណុំរឿងនេះលោក សម រង្ស៊ី កំពុងជាប់ពាក់ព័ន្ធនឹងសំណុំរឿងជាច្រើនទៀតជាមួយតុលាការ ដោយក្នុងនោះមានសំណុំដ៏ធំមួយ គឺក្បត់ជាតិសន្យាសម្ងាត់ កាត់ទឹកដីចំនួន៤ខេត្ត ឲ្យវៀតណាម ដែលតំណាងអយ្យការបានចេញដីកាកោះហៅឱ្យចូលបំភ្លឺនៅសាលាដំបូងរាជធានីភ្នំពេញ នៅថ្ងៃទី០៧ ខែឧសភា ឆ្នាំ២០១៨ ខាងមុខនេះផងដែរ ។ ការកោះហៅថ្មីៗកន្លងមកនេះពាក់ព័ន្ធនឹងការលួចចុះកិច្ចព្រមព្រៀង សម្ងាត់ជាមួយឈ្មោះ កុក សរ មេដឹកនាំជនជាតិភាគតិចវៀតណាម កាលពីថ្ងៃទី១៤ ខែមេសា ឆ្នាំ២០១៣ ដោយសន្យាកាត់ទឹកដី៤ខេត្ត ឲ្យជនជាតិដើមភាគតិច ដេហ្គា (ម៉ុងតាញ៉ា) គ្រប់គ្រង ។
កាលពីថ្ងៃទី២៩ ខែមករា ឆ្នាំ២០១៨នេះ លោកសម រង្ស៊ី និងមនុស្សមួយក្រុមដែលកំពុងនារទេសខ្លួន ដោយខ្លួនឯងនៅបរទេសបានប្រកាសប្រមូលគ្នា បង្កើតជាចលនាសង្គ្រាមជាតិជំរុញដោយបរទេសដាក់សម្ពាធលើករាជរដ្ឋាភិបាលស្របច្បាប់ ដើម្បីនាំទៅដល់ការនាំមកវិញនូវគណបក្សសង្គ្រោះជាតិ ក្នុងការចូលរួមបោះឆ្នោតខែកក្កដាខាងមុខ ។
ភ្លាមៗនោះប្រមុខរាជរដ្ឋាភិបាលសម្តេចតេជោ ហ៊ុន សែន និងមន្ត្រីរាជរដ្ឋាភិបាលបានហៅចលនាសង្គ្រោះជាតិជាចលនាខុសច្បាប់ ៕
យ៉ាងណាមិញ លោក អេង ឆៃអ៊ាង បានបង្ហោះសារក្នុងហ្វេសប៊ុករបស់លោកថា ៖ «ដីកាតុលាការកង់ហ្គូរូ កោះហៅ រូបខ្ញុំពីបទបង្កើតចលនាសង្គ្រោះជាតិ »។
ចែករំលែកព័តមាននេះ