ទីក្រុងហាណូយ ៖ លោកនាយករដ្ឋមន្ត្រីវៀតណាម Nguyen Xuan Phuc បានផ្តល់ភ្លើងខៀវដល់ការអភិវឌ្ឍហេដ្ឋារចនាសម្ព័ន្ធក្នុងតម្លៃសរុបប្រមាណ៩២១លានដុល្លារសម្រាប់តំបន់សេដ្ឋកិច្ច និងតំបន់ឧស្សាហកម្មក្នុងអំឡុងពីឆ្នាំ២០១៦ ដល់២០២០ ។
កម្មវិធីនេះមានគោលដៅអភិវឌ្ឍន៍លើហេដ្ឋារចនាសម្ព័ន្ធបច្ចេកទេស និងសង្គមយ៉ាងទូលំទូលាយដោយផ្តល់ជាមូលដ្ឋាន និងបង្កើតស្ថានភាពល្អសម្រាប់ការទាក់ទាញគម្រោងវិនិយោគទ្រង់ទ្រាយធំ ។
គម្រោងនេះមាន៥ផ្នែករួមមាន ការវិនិយោគលើហេដ្ឋារចនាសម្ព័ន្ធសម្រាប់តំបន់សេដ្ឋកិច្ចតាមឆ្នេរសមុទ្រ, តំបន់សេដ្ឋកិច្ចតាមច្រកព្រំប្រទល់, តំបន់ឧស្សាហកម្ម, តំបន់បច្ចេកវិទ្យាខ្ពស់ និងតំបន់កសិកម្មបច្ចេកវិទ្យាខ្ពស់ ជាដើម ។
គេព្យាករថា ការចំណាយសរុបនឹងស្មើប្រមាណ៩២១លានដុល្លារ ដែលមានមូលនិធិរដ្ឋប្រមាណ៧៣០លានដុល្លារ ហើយនៅសល់ត្រូវបានផ្តល់ដោយមូលនិធិក្នុងតំបន់ និងពីប្រភពផ្សេងទៀត ។
នៅក្នុងឆ្នាំ២០២០ តំបន់សេដ្ឋកិច្ចតាមឆ្នេរសមុទ្រចំនួន១៦ នឹងត្រូវសាងសង់ផ្លូវថ្នល់ប្រមាណពី២០០ទៅ២៥០គីឡូម៉ែត្រ ប្រព័ន្ធលូ ការច្រោះកម្ចាត់មេរោគក្នុងទឹក ហេដ្ឋារចនាសម្ព័ន្ធបច្ចេកទេស និងសង្គមផ្សេងទៀត ។ រីឯគម្រោងទ្រង់ទ្រាយធំនឹងផ្តោតសំខាន់លើតំបន់ចំនួន៨ ។
ដើម្បីជំរុញការអភិវឌ្ឍ និងប្រើប្រាស់បច្ចេកវិទ្យាខ្ពស់ក្នុងការផលិត ប្រទេសវៀតណាមនឹងមានការវិនិយោគជាច្រើនផ្នែកដូចជា ការសាងសង់ផ្លូវថ្នល់ ប្រព័ន្ធលូ និងហេដ្ឋារចនាសម្ព័ន្ធអគ្គិសនីសម្រាប់តំបន់ឧស្សាហកម្ម បច្ចេកវិទ្យាខ្ពស់ និងតំបន់កសិកម្មដែលប្រើបច្ចេកវិទ្យាខ្ពស់ផងដែរ ៕
ចែករំលែកព័តមាននេះ