រាជធានីភ្នំពេញ ៖ ទណ្ឌិតចំនួន៣២១នាក់ បានស្នើសុំមកគណៈកម្មការជាតិពិនិត្យ និងវាយតម្លៃសម្រាប់ការបន្ធូរបន្ថយ និងលើកលែងទោសនៅថ្ងៃបុណ្យចូលឆ្នាំប្រពៃណីជាតិខ្មែរដែលនឹងឈានចូលមកដល់នៅពេលខាងមុខនេះ ។ នេះតាមការឲ្យដឹងពីមន្ត្រីជាន់ខ្ពស់ក្រសួងយុត្តិធម៌ ។
បញ្ជីឈ្មោះ ទណ្ឌិតនេះត្រូវលោកអង្គវង្សវឌ្ឍានារដ្ឋមន្ត្រីក្រសួងយុត្តិធម៌ និងជាប្រធានគណៈកម្មាការជាតិពិនិត្យ និងវាយតម្លៃ ដើម្បីលើកបន្ធូបរន្ថយ និងលើកលែងទោសបានបើកិច្ចប្រជុំពិភាក្សានៅថ្ងៃព្រឹកថ្ងៃទី០៤ ខែមេសា ឆ្នាំ២០១៨ នៅទីស្តីក្រសួងយុត្តិធម៌ ដោយមានការចូលរួមពីតំណាងអយ្យការតំណាងក្រសួងមហាផ្ទៃ តំណាងទីស្តីការគណៈរដ្ឋមន្ត្រី និងភាគីមួយចំនួនទៀត ។
លោក សុច សុផាន់ណារ៉ា អគ្គនាយករងនៃអគ្គនាយករដ្ឋានព្រហ្មទណ្ឌនៃក្រសួងយុត្តិធម៌បានឲ្យដឹងថា សម្រាប់ឆ្នាំនេះគណៈកម្មការថ្នាក់ជាតិពិនិត្យ និងវាយតម្លៃបានទទួលបញ្ជីឈ្មោះទណ្ឌិតស្នើសុំបន្ថូរបន្ថយទោស និងលើកលែងទោស ដើម្បីពិនិត្យសំណើសុំបន្ថូរបន្ថយទោស និងលើកលែងទោសក្នុងឱកាសបុណ្យចូលឆ្នាំថ្មីប្រពៃណីជាតិដែលទទួលបានពីគណៈកម្មការថ្នាក់រាជធានីខេត្តមានពន្ធនាគារចំនួន២០ និងគណៈកម្មការក្រសួងមហាផ្ទៃមកពីមណ្ឌលអប់រំកែប្រែចំនួន៤ ដោយមានទណ្ឌិតស្នើសុំសរុប៣២១ នាក់ (ស្ត្រី២៨នាក់) ។
លោកបន្តថា ការស្នើសុំបន្ធូរបន្ថយទោស និងលើកលែងទោសត្រូវអនុវត្តតាមច្បាប់ក្រឹត្យលេខ២៨ ដែលទណ្ឌិតណាបានអនុវត្តទោស១ភាគ៣នៃទោសត្រូវបានស្នើសុំបន្ធូរបន្ថយទោស និង២ភាគ៣នៃទោសត្រូវបានស្នើសុំលើកលែងទោស ។
យ៉ាងណាក្តីលោក សុផាន់ណារ៉ា បានបញ្ជាក់ថា «ខ្ញុំសូមបញ្ជាក់ថា មិនអនុវត្តតាមក្រឹត្យច្បាប់ត្រូ វបានបន្ធូរបន្ថយ និងលើកលែងទោសនោះទេ ។ គឺគណៈកម្មការថ្នាក់ជាតិបានយកចិត្តទុកដាក់ បំផុតទាក់ទងការកែប្រែខ្លួនរបស់ទណ្ឌិត ក្នុងពន្ធនាគារភ្ជាប់ជាមួយឯកសារពាក់ព័ន្ធ ពិសេសនោះមានសាលក្រមសាលដីការស្ថាពរ ។ អ្វីដែលទណ្ឌិតកែប្រែនោះដែរ យើងក៏ពិនិត្យទៅលើកការអនុវត្តល្អការប្រឡងប្រណាំងប្រជែងគ្នារបស់ទណ្ឌិតក្នុងពន្ធនាគារ និងមានការវាយតម្លៃពីគណៈកម្មការខេ្តតផងដែរ» ។
លោកសុច សុផាន់ណារ៉ា ក៏បានលើកឡើងថា បញ្ជីឈ្មោះទណ្ឌិតដែលត្រូវបានស្នើសុំមក គណៈកម្មការជាតិពិនិត្យ និងវាយតម្លៃក៏ត្រូវបានឆ្លងកាត់ការវាយតម្លៃនៅគណៈកម្មការខេត្តដែលដឹកនាំដោយអភិបាលខេត្ត តំណាងអយ្យការ និងស្ថាប័នពាក់ព័ន្ធជាច្រើនទៀត ។
លោកបានគូសបញ្ជាក់ថា « អ្វីដែលសំខាន់នោះយើងផ្តោតលើកទណ្ឌិតណាដែលបានប្រព្រឹត្តបទល្មើស ឬព្យៈសនកម្មធ្ងន់ធ្ងរ ។ អីចឹងកុំអាងថា បានអនុវត្តទោស១ភាគ៣ ឬ២ភាគ៣ត្រូវបានគណៈកម្មជាតិសម្រេចបន្ធូបន្ថយទោស និងលើកលែងទោសតែម្តងនោះមិនមែនទេ» ។
លោកសុផាន់ណារ៉ា ក៏បានឲ្យដឹងថា សម្រាប់បញ្ជីឈ្មោះទណ្ឌិតដែលស្នើសុំបន្ធូរបន្ថយ និងលើកលែងអ្នកទោសថ្ងៃបុណ្យចូលឆ្នាំខ្មែរខាងមុខនេះ ក៏មានឈ្មោះទណ្ឌិតជាជនជាតិបរទេសផងដែរ ។
ប៉ុន្តែលោកមិនដឹងថា មានចំនួនប៉ុន្មាននាក់នោះទេ ។ លោកបានបញ្ជាក់យ៉ាងដូច្នេះថា «ឈ្មោះទាំ ង៣២១នាក់នេះ ដឹងតែមានជនបរទេស មានទាំងជនជាតិចិន ជនជាតិផ្សេងទៀត អាច១០% ផងដែរ តែខ្ញុំមិនបានអស់ទេ » ។ យ៉ាងណាក្តីលោកក៏បានឲ្យដឹងថា បញ្ជីឈ្មោះគ្មានឈ្មោះសកម្មជនដីធ្លី និងសកម្មជនគណបក្សនយោបាយនោះទេ ។ ព្រោះថា បញ្ជីឈ្មោះបញ្ជូនមកមានភ្ជាប់តែប្រភេទបទល្មើស និងឯកសារមកជាមួយតែប៉ុណ្ណោះ ។
សូមជម្រាបថា នៅក្នុងប្រទេសកម្ពុជាមានការស្នើសុំបន្ធូរបន្ថយ និងលើកលែងទោសមានចំនួន៣ដងក្នុងមួយឆ្នាំ គឺនៅក្នុងពិធីបុណ្យចូលឆ្នាំប្រពៃណីជាតិខ្មែរ បុណ្យអ៊ុំទូក និងបុណ្យពិសាខបូជា ៕
ចែករំលែកព័តមាននេះ