សម្តេចតេជោស្នើអគ្គលេខាធិការអាស៊ាន ជួយប្រទេសទីម័រលេសឲ្យឆាប់ក្លាយជាសមាជិកអាស៊ាន
- ភ្នំពេញ
រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជានាឱកាសជួបពិភាក្សាការងារជាមួយអគ្គលេខាធិការអាស៊ាន លោក Dato Lim Jock Hoi…
រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជានាឱកាសជួបពិភាក្សាការងារជាមួយអគ្គលេខាធិការអាស៊ាន លោក Dato Lim Jock Hoi នៅព្រឹកថ្ងៃ ទី៤ ខែមេសា ឆ្នាំ២០១៨នេះ នៅសណ្ឋាគារសុខា ខេត្តសៀមរាប ឲ្យជួយជម្រុញ «បេក្ខភាពប្រទេសទីម័រលេសឱ្យឆាប់បានចូលសមាជិកអាស៊ាន» ។
សម្តេចតេជោ បានបញ្ជាក់ថា៖ «ប្រសិនបើមានការងារសំខាន់ចាំបាច់ទាំងឡាយណាដែលកម្ពុជាអាចជួយសម្រួលបាន គឺកម្ពុជារីករាយចូលរួមជានិច្ច»។ ទន្ទឹមនឹងនោះដែរ សម្តេចតេជោ បានស្នើអោយមានការពង្រឹងសហគមន៍អាស៊ានទាំងមូលឡើងវិញអោយសក្តិសមជាសហគមន៍ដែលមានសម្លេង និងតម្លៃស្មើមុខស្មើមាត់ជាមួយសហគមន៍អន្តរជាតិនានា ដូចជា សហគមន៍អឺរ៉ុបជាដើម។ លោកអគ្គលេខាធិការអាស៊ានបានយល់ស្រប និងទទួលយកនូវសំណើលើកឡើងរបស់សម្តេចតេជោ ហ៊ុន សែន ហើយសន្យានឹងខិតខំជំរុញកិច្ចការទាំងអស់នេះអោយមានដំណោះស្រាយបានឆាប់រហ័ស។
លោក Dato Lim Jock Hoi បានមានប្រសាសន៍ជម្រាបជូនសម្តេចតេជោនាយករដ្ឋមន្ត្រី អំពីការពេញចិត្តចំពោះការរីកចម្រើន និងកំណើនសេដ្ឋកិច្ចកម្ពុជានាពេលបច្ចុប្បន្នក្រោមការដឹកនាំរបស់សម្តេចតេជោ។ ទន្ទឹមនឹងនេះ លោកអគ្គលេខាធិការ នឹងខិតខំប្រឹងប្រែងឲ្យអស់ពីសមត្ថភាព ដើម្បីពង្រឹងលេខាធិការដ្ឋានអាស៊ាន ដើម្បីជំរុញការងារអាស៊ានឲ្យកាន់តែល្អប្រសើរឡើង។
លោក Dato Lim Jock Hoi ក៏បានជម្រាបជូន សម្តេចតេជោផងដែរអំពីអគារថ្មីនៃលេខាធិការដ្ឋានអាស៊ាន ដែលមានទីតាំងនៅទីក្រុង ចាកាតា ប្រទេសឥណ្ឌូនេស៊ី ដែលមានកម្ពស់ ១៦ជាន់ មានទំហំធំទូលាយដែលអាចប្រើសម្រាប់កិច្ចការប្រជុំអាស៊ានបានយ៉ាងងាយស្រួល ព្រោះយ៉ាងហោចណាស់ក្នុងមួយឆ្នាំក៏មានកិច្ចប្រជុំជាង ១៦០០ដង។ ទន្ទឹមនឹងនេះ គឺអគារថ្មីនេះនឹងជួយសន្សំសំចៃកាត់បន្ថយការចំណាយ ផ្សេងៗពេលប្រជុំអាស៊ានផងដែរ ។
សម្តេចតេជោនាយករដ្ឋមន្ត្រី បានស្នើសុំឲ្យលោក Dato Lim Jock Hoi អគ្គលេខាធិការអាស៊ានថ្មីនេះ ពិចារណាធ្វើយ៉ាងណាជំរុញពន្លឿនកិច្ចការទាំងឡាយណាដែលថ្នាក់ដឹកនាំកំពូលបានព្រមព្រៀងគ្នារួចមកហើយ ព្រមទាំងស្នើឲ្យមានការយកចិត្តទុកដាក់ជាអាទិភាពចំពោះកិច្ចការសមាហរណកម្មរអាស៊ានតែម្តង ដែលជាអាទិភាពរបស់កម្ពុជា និងបណ្តាប្រទេសអាស៊ានផងដែរ៕
ចែករំលែកព័តមាននេះ