រាជធានីភ្នំពេញ ៖ តារាចម្រៀងកញ្ញាសុន ស្រីពេជ្រ បានបង្ហាញគូស្នេហ៍ថ្មីរបស់នាង បន្ទាប់ពីនាងបានពើបប្រទះស្នេហាមិនសមប្រកបជាលើកដំបូង ។ ជាមួយគូស្នេហ៍ថ្មីនេះ ស្រីពេជ្រ គ្រោងនឹងធ្វើពិធីភ្ជាប់ពាក្យនៅក្រោយបុណ្យចូលឆ្នាំខ្មែរ ។
រូបភាពជាច្រើនសន្លឹកត្រូវតារាចម្រៀងសុន ស្រីពេជ្រ បង្ហោះជាបន្តបន្ទាប់តាមហ្វេសប៊ុក បង្ហាញពីភាពផ្អែមល្ហែមជាមួយនឹងគូស្នេហ៍ថ្មី ដែលមានមុខមាត់ស្រស់សង្ហា ។
តារាចម្រៀងដែលជាកូនស្រីបង្កើតរបស់តារាកំប្លែងនាយសង់ស៊ីសរូបនេះបានបញ្ជាក់យ៉ាងច្បាស់ប្រាប់ប្រិយមិត្តគាំទ្ររបស់នាងថា បុរសម្នាក់នោះ គឺជាមនុស្សជាទីស្រឡាញ់របស់នាង ។
ខណៈសុន ស្រីពេជ្រ បង្ហាញមុខគូស្នេហ៍របស់នាងនាពេលនេះ មានប្រិយមិត្តគាំទ្ររបស់នាងជាច្រើននាក់សម្តែងការអបអរសាទរ និងជូនពរឲ្យនាងស្រឡាញ់គ្នា និងឆាប់បានដល់ថ្ងៃមង្គល ។
ឆ្លើយតបទៅលើបញ្ហានេះតារាចម្រៀងដែលតែងតែបង្ហើរសំនៀងតាមបទចម្រៀងរបស់ក្រសួងទេសចរណ៍នាងស៊ុន ស្រីពេជ្រ បានអះអាងថា តាមគម្រោងនាងនិងគូរស្នេហ៍អាចនឹងរៀបចំពិធីភ្ជាប់ពាក្យនៅក្រោយបុណ្យចូលឆ្នាំខ្មែរ ខណះពេលដែលពិធីចូលរោងការអាចនឹងធ្វើឡើងនៅបំណាច់ឆ្នាំក្រោយ ។
សុន ស្រីពេជ្រ បញ្ជាក់ថា គូស្នេហ៍របស់នាងឈ្មោះតិច សុខជា ជាអ្នកលក់ដូរនៅផ្សារឧដុង្គ ហើយពន្លកស្នេហាដុះឡើងរយៈពេលមួយឆ្នាំមកហើយ តាំងពីក្រោយពេលនាងផ្តាច់ពាក្យ ។
បើតាមនាងសុន ស្រីពេជ្រ មូលហេតុដែលនាងសម្រេចទទួលស្នេហាជាលើកទីពីរជាមួយបុរសនោះ គឺដោយសារតែនាងមើលឃើញថា គេជាមនុស្សចេះគោរពចាស់ទុំ ស្លូតបូត ហើយយល់ចិត្តនាងច្រើន ជាពិសេសមានលក្ខណៈសមស្របគ្នាច្រើន ដែលអាចឲ្យនាងរស់នៅដោយចុះសម្រុងជាមួយគ្នាបាន ។
សុន ស្រីពេជ្រ បញ្ជាក់ថា ស្នេហារបស់ពួកនាងទាំងពីរគឺបានទទួលការដឹងលឺពីឪពុកម្តាយទាំងសងខាងរួចហើយ ហើយភាគីចាស់ទុំទាំងអស់មិនជំទាស់អ្វីឡើយ គឺរង់ចាំពេលវេលាល្អដើម្បីរៀបចំពិធីទៅតាមទំនៀមទម្លាប់ប៉ុណ្ណោះ ។
សុន ស្រីពេជ្រ កន្លងមកធ្លាប់ភ្ជាប់ពាក្យជាមួយបុរសដែលជាមន្ត្រីម្នាក់នៅក្រសួងសេដ្ឋកិច្ច និងហិរញ្ញវត្ថុ ប៉ុន្តែអ្នកទបានផ្តាច់ពាក្យវិញ ក្រោយពីភ្ជាប់ពាក្យបាន១ឆ្នាំ ។
មូលហេតុធ្វើឲ្យផ្តាច់ពាក្យនោះ នាងមិនបានបញ្ជាក់ពីមូលហេតុច្បាស់លាស់ឡើយ ដោយនាងត្រឹមតែពោលពាក្យដោយខ្លីថា មានភ្លើងទើបមានផ្សែង មិនមែននៅ សុខៗក៏បែកគ្នានោះទេ ៕
ចែករំលែកព័តមាននេះ