ខេត្តបន្ទាយមានជ័យ ៖ ករណីស្ត្រីម្នាក់ដេកស្លាប់ជាមួយស្នាមជាំស្ទើរសុះសាច់ កាលពីយប់ថ្ងៃទី២៩ ខែមិនាឆ្នាំ២៩១៨ នៅភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ដែលដំបូងសមត្ថកិច្ចដាក់ការសង្ស័យទៅលើបុរសជាប្តី ព្រោះគេខ្លួនបាត់នោះ ទីបំផុតត្រូវបានលាតត្រដាងហើយ ពិតជាស្នាដៃរបស់បុរសជាប្តីមែន គឺសម្លាប់ដោយសារភ្លើងប្រចណ្ឌ ។
ប្តីកំណាចសម្លាប់ប្រពន្ធខាងលើឈ្មោះ បឿន សំប៊ូ ហៅប៉ាវ អាយុ២៥ឆ្នាំ រស់នៅភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ។ ជនសង្ស័យត្រូវបាននគរបាលក្រុងប៉ោយប៉ែត សហការណ៌ជាមួយនគរបាលស្រុកថ្មគោល តាមប្រមាញ់ចាប់ខ្លួនបាននៅភូមិគោកក្តួច ឃុំតាម៉ឺន ស្រុកថ្មគោល កាលពីវេលាម៉ោង០៦និង៣០នាទីយប់ ថ្ងៃទី០៣ ខែមេសា ឆ្នាំ២០១៨ ខណៈរត់ទៅសម្ងំរស់នៅជាមួយសាច់ញាតិរបស់ខ្លួន ។
លោក ព្រំ ពិសិដ្ឋ អធិការរងទទួលបន្ទុកព្រហ្មទណ្ឌ នៃអធិការដ្ឋាននគរបាលក្រុងប៉ោយប៉ែត ប្រាប់តាមទូរស័ព្ទថា យោងចម្លើយសួរនាំជនសង្ស័យសារភាពថា រូបគេពិតជាបានសម្លាប់ប្រពន្ធពិតប្រាកដមែន ដោយវាយនឹងដងកាំបិត ដែលមានប្រវែង៤៣សង់ទីម៉ែត្រ និងបញ្ជាក់ថាដោយសារភ្លើងប្រចណ្ឌ ។ យ៉ាងណាក៏ដោយ លោកអធិការរងរូបនេះ មិនបានលម្អិតថា តើជនរងគ្រោះប្រចណ្ឌនាងជាប្រពន្ធទៅនឹងបុរសណានោះទេ ដោយគ្រាន់តែប្រាប់ថា ក្រោយសាកសួរចប់ និងកសាងសំណុំរឿងបញ្ជូនទៅស្នងការដ្ឋាននគរបាលខេត្ត នៅរសៀលថ្ងៃទី០៤ ខែមេសា នេះ ដើម្បីចាត់ការបន្តតាមច្បាប់ ។
គួរបញ្ជាក់ថា ស្ត្រីរងគ្រោះឈ្មោះ កាន់ និកា អាយុ២៤ឆ្នាំ ត្រូវបានស្ត្រីជាម្តាយក្មេកឃើញដេកស្លាប់ក្នុងបន្ទប់ កាលពីយប់ថ្ងៃទី២៩ ខែមិនា ឆ្នាំ២០១៨ និងបង្កភ្ញាក់ផ្អើលពេញភូមិ ព្រោះតែជនរងគ្រោះមានស្នាមជាំពេញខ្លួន និងផ្ទៃមុខ ។ ក្រោយកើតហេតុ អ្នកស្រុកនាំគ្នាដាក់ការសង្ស័យថា ជាអំពើរឃាតកម្មដោយសាស្នាដៃប្តី ព្រោះពួកគាត់តែងតែឃើញជនរងគ្រោះត្រូវប្តីវាយធ្វើបាបជាញឹកញាប់ រស់ដូចរងកម្ម ខណៈអ្នកខ្លះថា បុរសជាប្តីជាមនុស្សញៀនថ្នាំទៀតផង ។ សួរដល់បញ្ហាញៀនថ្នាំលោកអធិការរងខាងលើប្រាប់ថា តាមពិតជនសង្ស័យ និងស្ត្រីជាប្រពន្ធជាអ្នកប្រើប្រាស់ដូចគ្នា ។ លោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែត ប្រាប់តាមទូរស័ព្ទនៅម៉ោង០២និង៣០នាទីរសៀលនេះ និងយកជនសង្ស័យទៅធ្វើត្រាប់នៅផ្ទះកើតហេតុក្នុងភូមិប្រជាធម្មលិច ៕
ចែករំលែកព័តមាននេះ