ខេត្តព្រៃវែង ៖ ស្ត្រីម្នាក់បានស្លាប់ក្នុងអណ្តាតភ្លើងគួរឱ្យរន្ធត់ ខណៈកើតមានអគ្គិភ័យលេបត្របាក់ផ្ទះល្វែង១ខ្នង ដែលមានទទឹង៥.២ម៉ែត្រ បណ្ដោយ១៥ម៉ែត្រ រួមទាំងទ្រព្យសម្បត្តិមួយចំនួនធំក៏ក្លាយជាចំណីភ្លើង ខណៈពេលដែលប្តីនិងកូនប្រុសពីរនាក់ទៅឆេងម៉េង ។ ហេតុការណ៍អកុសលនេះ បានកើតឡើងកាលពីវេលាម៉ោង០៩ និង៤៥នាទីថ្ងៃទី៣ មេសា ។ ប្រភពពីសមត្ថកិច្ចបានឱ្យដឹងថា ផ្ទះដែលឆេះស្លាប់ប្រពន្ធនេះ ប្តីឈ្មោះ អន គ្រីម អាយុ៤៨ឆ្នាំ មុខរបរជាងជួសជុសរថយន្តមានទីលំនៅភូមិលេខ៤ សង្កាត់កំពង់លាវ ក្រុងព្រៃវែង ហើយប្រពន្ធដែលស្លាប់ក្នុងភ្លើងមានឈ្មោះ ញឹម ទៀង អាយុ៤៧ឆ្នាំ ។
ប្រភពព័ត៌មានទាក់ទិននឹងហេតុការណ៍នេះបានឱ្យដឹងថា នៅមុនពេលកើតហេតុ ប្ដីនិងកូនប្រុស២នាក់នាំគ្នាទៅសែនផ្នូរជីដូនជីតា(ឆេងម៉េង)នៅឯខេត្តកំពង់ចាម ចំណែកប្រពន្ធមិនបានទៅជាមួយទេដោយនៅចាំ
ផ្ទះ ។ លុះមកដល់ម៉ោង៩ និង៤៥នាទី ស្រាប់តែមានផ្សែងខ្មួលខ្មាញ់ហុយចេញមកពីក្នុងផ្ទះ នៅពេលឃើញហេតុការណ៍បែបនេះ អ្នកជិតខាងក៏បានទាក់ទងទៅសមត្ថកិច្ច ហើយកម្លាំងនគរបាលក្រុងនិង ស្នងការដ្ឋានបានសហការជួយសង្គ្រោះបន្ទាន់ភ្លាមផងដែរ តែនៅពេលសមត្ថកិច្ចទៅដល់ ផ្ទះកើតហេតុជាប់សោ២ជាន់ គឺជាន់ទី១ ជាប់សោកន្លែងជួសជុលរថយន្ត និងសោទី២ជាទ្វារចូលបន្ទប់ដេក ទើបបណ្ដាលឱ្យម្ចាស់ផ្ទះជាប្រពន្ធមិនអាចរត់ចេញមកក្រៅបាន ហើយសមត្ថកិច្ចក៏ពិបាកក្នុងការចូលជួយសង្គ្រោះ ទើបបណ្តាលឱ្យស្ត្រីជាប្រពន្ធស្លាប់នៅក្នុងភ្លើង ។
គួរបញ្ជាក់ផងដែរថា នៅក្នុងការអន្តរាគមន៍ពន្លត់ភ្លើងនេះដែរ សមត្ថកិច្ចបានប្រើប្រាស់រថយន្តពន្លត់អគ្គិភ័យអស់ចំនួន៤គ្រឿង ប្រើទឹកអស់៨រថយន្ត ទើបអាចគ្រប់គ្រងស្ថានការណ៍បាននិងមិនបណ្ដាលឱ្យឆេះឆ្លងរាលដាលទៅផ្ទះដែលនៅជាប់គ្នានោះឡើយ ។ ករណីនេះដែរ ភ្លាមៗកម្លាំងជំនាញមិនទាន់អាចកំណត់រកមូលហេតុដែលបណ្តាលឱ្យកើតមានអគ្គិភ័យនេះបាននៅឡើយទេ ។ ប៉ុន្តែតាមការបង្ហើបឱ្យដឹងខ្លះពីមន្ត្រីប៉ូលិសថា ផ្ទះដែលឆេះនេះមានដាក់កាមេរ៉ាសុវត្ថិភាពភ្ជាប់ទៅនឹងទូរស័ព្ទដៃកូនប្រុស ដូច្នេះសមត្ថកិច្ចនឹងធ្វើការត្រួតពិនិត្យ ដើម្បីរកមូលហេតុមុនពេលអគ្គិភ័យកើតឡើង។ ចំពោះស្ត្រីជាប្រពន្ធមិនទៅឆេងម៉េងជាមួយប្តីដោយសារតែប្តីប្រពន្ធនេះទាស់គ្នា ។
ព័ត៌មានចុងក្រោយ
តាមការសង្ស័យរបស់សមត្ថកិច្ចដោយយោងទៅតាមការរៀបរាប់របស់ប្តីបានឲ្យដឹងថា ស្ត្រីជាប្រពន្ធ
បានឈ្លោះប្រកែកគ្នាជាមួយប្តី ដោយចោទថាមានស្រី តែប្តីមិនព្រមលែងទេ ក៏បានបោះសំដីថា នឹងធ្វើឲ្យរលាយទាំងអស់គ្នា ថ្ងៃណាមួយមិនខានឡើយ ហើយមុនពេលទៅឆេងម៉េង ក៏មានការទាស់សម្តីគ្នាដែរ ទើបប្រពន្ធមិនទៅជាមួយ ហើយឆក់ឱកាសចាក់សោផ្ទះរួចដុតសម្លាប់ខ្លួនតែម្តង ។ សពប្រពន្ធត្រូវបាននាំទៅតម្កល់ធ្វើបុណ្យនៅវត្តរោងដំរី ក្នុងទីរួមខេត្ត ៕
ចែករំលែកព័តមាននេះ