រាជធានីភ្នំពេញ ៖ ពិធីចាក់ធុងបាស់រាំអបអរបុណ្យចូលឆ្នាំថ្មីប្រពៃណីជាតិដែលជិតឈានចូលមកដល់ដោយមានការផឹកស៊ីស្រែកឡូឡាផងនៅក្នុងឃ្លាំងមួយកន្លែង លុះក្រុមផឹកនោះចេញដើរត្រឡប់ទៅឃ្លាំងមួយផ្សេងទៀត ក៏ត្រូវជនមួយក្រុមព្រួតវាយរបួស៥នាក់ ក្នុងនោះធ្ងន់២នាក់ កាលពីថ្ងៃទី២១ មីនា វេលាម៉ោង៩យប់។
ទាក់ទិននឹងហេតុការណ៍នេះត្រូវបានគេដឹងថា នៅយប់នោះក្រុមជាងកាត់ការ៉ូនៅក្រុមហ៊ុនលក់សំភារសំណង់មួយបានទៅផឹកស៊ី និងចាក់ធុងបាស់រាំនៅក្នុងឃ្លាំង ស្ថិតនៅក្រុមទី៨ មណ្ឌល៣ ផ្លូវលេខ២២៧ សង្កាត់បឹងសាឡាង ខណ្ឌទួលគោក ។ បើតាមមេការជាងកាត់ការ៉ូឈ្មោះយីម អាយុ២៤ឆ្នាំ បានរៀបរាប់ថា នៅកន្លែងនោះមានឃ្លាំងបីនៅជិតគ្នា ។ ខណៈពេលផឹកបណ្ដើររាំលេងបណ្ដើររហូតដល់ម៉ោង៩យប់ ទើបឈប់រាំ តែនៅបន្ដផឹកស៊ីនិយាយគ្នាលេង លុះបន្ដិចក្រោយមកមានជាងខ្លះដើរទៅសំរាកនៅឃ្លាំងចំងាយពីគ្នាប្រមាណ៣០ម៉ែត្រ ។ ពេលជាងម្នាក់ដើរទៅមុនហើយបើកទ្វារចូលរួចបិទទ្វារវិញ ស្រាប់តែឮសម្លេងដុំថ្មគប់ជញ្ជាំងនិងទ្វារ តែជាងនោះមិនបើកទ្វារទេ ។
បន្ទាប់មកមានជាងមួយក្រុម៥នាក់ដើរមកតាមក្រោយឃើញជនមួយក្រុមគប់ជញ្ជាំងក៏នាំគ្នារត់ដេញតាម ទើបបណ្ដាលឱ្យមានការវាយតប់រហូតត្រូវគេចាក់និងគប់នឹងដុំថ្មបណ្ដាលឱ្យបែកក្បាល ចំណែកក្រុមជនដៃដល់គេចខ្លួនបាត់អស់ ។ ក្នុងឧប្បត្ដិហេតុនេះមានក្រុមជាងរងរបួសចំនួន៥នាក់ ក្នុងនោះធ្ងន់២នាក់កំពុងសំរាកនៅមន្ទីរពេទ្យព្រះកុសុមៈ ចំណែក៣នាក់ទៀតដែលរងរបួសស្រាលចូលមន្ទីរពេទ្យលាងរបួស និងរុំរបួស ហើយក៏ចេញមកឃ្លាំងវិញ ។ អ្នករងរបួសធ្ងន់ទាំង២នាក់នេះម្នាក់ឈ្មោះយ៉ាន យ៉ាត អាយុ២៣ឆ្នាំ និងម្នាក់ទៀតឈ្មោះរៀល ថា អាយុ២៤ឆ្នាំ ទាំងអស់គ្នាមានស្រុកកំណើតនៅខេត្តពោធិ៍សាត់ ។ ពាក់ព័ន្ធនឹងហេតុការណ៍នេះយុវជនជាជាងកាត់ការ៉ូម្នាក់បានបង្ហើបឱ្យដឹងថា ពេលផឹកស៊ីចាក់ធុងបាស់រាំលេងនេះប្រហែលជាបង្កការរំខានដល់គេក៏មិនដឹង បានជាក្រុមជនទាំងនោះមកបង្កបញ្ហាជាមួយពួកខ្លួន ។ បច្ចុប្បន្នជនរងគ្រោះបានដាក់ពាក្យបណ្ដឹងទៅសមត្ថកិច្ចដើម្បីតាមរកចាប់ខ្លួនជនដៃដល់ ៕
ចែករំលែកព័តមាននេះ