រាជធានីភ្នំពេញ ៖ ចៅក្រមសើុបសួរសាលាដំបូងរាជធានីភ្នំពេញ លោក កូយ សៅ កាលពីល្ងាចថ្ងៃទី៣
មេសា បានសម្រេចចេញដីកាឃុំខ្លួនមនុស្ស៤នាក់ក្នុងចំណោម៦នាក់ ដាក់ពន្ធនាគារជាបណ្តោះអាសន្ន ពាក់ព័ន្ធការស្លាប់អ្នកស្រី ចេវ សុវឌ្ឍនា ។ លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញថ្លែងថា អយ្យការបានសម្រេចបើកការស៊ើបសួរដោយចោទប្រកាន់ទៅលើឈ្មោះឡាយ វណ្ណៈ និងឈ្មោះ ឡាយ ណារិទ្ធ ពីបទឃាតកម្ម តាមមាត្រា១៩៩ នៃក្រមព្រហ្មទណ្ឌ ។ ចំណែក២នាក់ទៀតចោទប្រកាន់ទៅលើឈ្មោះ ម៉េន សាម៉ៃ អ្នកបើកបររថយន្តលោក ឡាយ វណ្ណៈ និងឈ្មោះ ជឹម វុធ ជាអ្នកបម្រើពីបទលាក់បាំងតម្រុយ តាមមាត្រា៥៣២ នៃក្រមព្រហ្មទណ្ឌ ។ តាមដីកាឃុំខ្លួន លោកឡាយ វណ្ណៈ តម្រូវឲ្យឃុំនៅពន្ធនាគារ PJ ។ ចំណែកឈ្មោះ ឡាយ ណារិទ្ធ ឈ្មោះ ម៉េន សាម៉ៃ និងឈ្មោះ ជឹម វុធ
ដាក់ពន្ធនាគារព្រៃ.ស ។
ជនសង្ស័យត្រូវចោទទាំង៤នាក់ គឺលោក ឡាយ វណ្ណៈ អតីតអភិបាលខេត្តតាកែវ លោក ឡាយ ណារិទ្ធ អតីតស្នងការរងនគរបាលខេត្តតាកែវ ត្រូវជាបងប្រុស លោក ឡាយ វណ្ណៈ ឈ្មោះ ម៉េន សាម៉ៃ អ្នកបើកបររថយន្តឲ្យលោក ឡាយ វណ្ណៈ និងឈ្មោះ ជឹម វុធ ហៅ ថូត ជាអ្នកបម្រើផ្ទះជនរងគ្រោះ អ្នកស្រី ចេវ សុវឌ្ឍនា ។ រីឯពីរនាក់ទៀត ត្រូវបានអនុញ្ញាតឱ្យត្រឡប់ទៅផ្ទះវិញ គឺមានន័យថា លើកលែងការចោទប្រកាន់មានឈ្មោះ ចាន់ រី ភេទស្រី ជាប្រពន្ធ (ជឹម វុធ) អ្នកបម្រើផ្ទះជនរងគ្រោះនិងឈ្មោះ តាក់ រតនា ហៅ ទុយ ជាអ្នកបើករថយន្តឱ្យលោក ឡាយ ណារិទ្ធ ។ លោក ឡាយ វណ្ណៈ អាយុ៤៥ឆ្នាំ និងលោកឡាយ ណារិទ្ធ អាយុ៤៦ឆ្នាំ ជាប់ចោទប្រកាន់ពីបទឃាតកម្ម ប្រព្រឹត្តនៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ មករា ឆ្នាំ២០១៨ តាមមាត្រា១៩៩ នៃក្រមព្រហ្មទណ្ឌ ។ ឈ្មោះ ម៉េន សាម៉ៃ ភេទប្រុស អាយុ៣៦ឆ្នាំ និងឈ្មោះ ជឹម វុធ ហៅ ថូត ភេទប្រុស អាយុ៤១ឆ្នាំ ជាប់ចោទប្រកាន់ពីបទលាក់បំបាំងតម្រុយ ប្រព្រឹត្តនៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ តាមមាត្រា៥៣២ នៃក្រមព្រហ្មទណ្ឌ ។
យោងតាមក្រមព្រហ្មទណ្ឌ បានចែងថា មាត្រា១៩៩ បទឃាតកម្ម គឺអំពើសម្លាប់មនុស្សដោយចេតនា ដោយប្រើអាវុធ ឬមិនប្រើអាវុធ ដោយគ្មានស្ថានទម្ងន់ណាមួយដូចបានកំណត់ក្នុងមាត្រា២០០ (បទឃាតកម្មគិតទុកជាមុន) ដល់មាត្រា២០៥ (បទឃាតកម្មដោយមានទារុណកម្ម អំពើឃោរឃៅ ឬអំពើរំលោភសេពសន្ថវៈ) នៃក្រមនេះ គឺជាឃាតកម្ម ។ ឃាតកម្មត្រូវផ្ដន្ទាទោសដាក់ពន្ធនាគារពី១០ឆ្នាំ ទៅ១៥ឆ្នាំ។មាត្រា៥៣២ បទលាក់បំបាំងតម្រុយ៖ អំពើកែប្រែ លុបបំបាត់ ឬលាក់បំបាំងតម្រុយ ឬស្លាកស្នាមនៅលើទីកន្លែងនៃបទឧក្រិដ្ឋ ឬបទមជ្ឈិម ក្នុងគោលបំណងធ្វើជាឧបសគ្គដល់ការស្វែងរកឲ្យឃើញនូវការណ៍ពិត ត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ៣ឆ្នាំ និងពិន័យជាប្រាក់ពី ២លានរៀល ទៅ៦រៀល ៕
ចែករំលែកព័តមាននេះ