រាជធានីភ្នំពេញ ៖ មន្ត្រីជាន់ខ្ពស់នៃក្រសួងពាណិជ្ជកម្មបានធ្វើការប៉ាន់ប្រមាណថា វិស័យដំឡូងមីកម្ពុជានឹងបង្ហាញពីភាពរីកចម្រើនបន្ថែមទៀតនៅរយៈពេល៥ឆ្នាំខាងមុខ ដោយផ្អែកតាមរយៈការចូលរួមពីក្រុមហ៊ុនវិនិយោគ និងដៃគូសហការកែច្នៃធ្វើផលិតផលចេញពីដំឡូងមី ខណៈដែលគោលនយោបាយជាតិដំឡូងមីត្រៀមដាក់ឲ្យប្រើប្រាស់ក្នុងពេលដ៏ខ្លីខាងមុខ ។
ថ្លែងក្នុងពិធីចុះហត្ថលេខារវាងក្រុមហ៊ុន Green Leader និងកម្មវិធីអភិវឌ្ឍន៍សហប្រជាជាតិ UNDP កាលពីថ្ងៃទី២ មេសា នៅទីស្តីការក្រសួង លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម មានប្រសាសន៍ថា តាមរយៈក្រុមហ៊ុនវិនិយោគ និងដៃគូសហការ មិនយូរទេ វិស័យដំឡូងមីកម្ពុជា នឹងរីកចម្រើនបន្ថែមទៀត ។
លោករដ្ឋមន្ត្រីបន្តថា ៖« នៅពេលរោងចក្រដំណើរការរលូន មានផលិតផលគ្រប់បែបផែន យើងអាចពង្រីកផ្ទៃដីដាំដុះនៅតាមខេត្ត ហើយយើងនឹងរៀបចំឱ្យបងប្អូនធ្វើការឱ្យបានត្រឹមត្រូវទៅតាមយន្តការដើម្បីនាំចេញទៅបរទេស ។ ស្របពេលជាមួយគ្នានេះ គោលនយោបាយជាតិដំឡូងមីដែលក្រសួង និងដៃគូបានរៀបចំពិភាក្សាកន្លងមក ក៏នឹងដាក់ឱ្យប្រើប្រាស់ក្នុងពេលឆាប់ៗខាងមុខ ព្រោះយើងបានជជែកគ្នារួចរាល់ហើយ » ។
ដោយឡែក នៅក្នុងពិធីសម្ពោធបើកការដ្ឋានសាងសង់រោងចក្រកែច្នៃដំឡូងរបស់ក្រុមហ៊ុនGreen Leader នៅក្នុងតំបន់សេដ្ឋកិច្ចពិសេស ស្រុកស្នួល ខេត្តក្រចេះ កាលពីថ្ងៃទី១ មេសា លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ក្រុមហ៊ុនបានដាក់ទុនវិនិយោគប្រមាណ២០លានដុល្លារ ដើម្បីបង្កើតរោងចក្រកែច្នៃម្សៅដំឡូងមី និងជីវឥន្ធនៈអេតាណុលទំនើប និងធំជាងគេបង្អស់លើពិភពលោក ដែលមានសក្តានុពលប្រើប្រាស់វត្ថុធាតុដើមដំឡូងមីដល់ទៅ៥០០ពាន់តោនដើម្បីផលិតម្សៅឲ្យបាន១៣០ពាន់តោនក្នុង១ឆ្នាំ និង២លានតោនក្នុងរយៈពេល៥ឆ្នាំ ។
លោករដ្ឋមន្ត្រីលើកឡើងថា កម្ពុជាមានផ្ទៃដីដាំដុះរហូតដល់ទៅ៦៧៥ពាន់ហិកតា និងផ្ដល់ ទិន្នផលជាង១៤,៨លានតោនក្នុងឆ្នាំ២០១៧ ។តាមការស្រាវជ្រាវរបស់មជ្ឈមណ្ឌលអន្តរជាតិសម្រាប់កសិកម្មតំបន់ត្រូពិច (International Center for Tropical Agriculture, CIAT) បច្ចុប្បន្ន កម្ពុជាជាប្រទេសផលិតដំឡូងមីលំដាប់ទី៨លើពិភពលោក និងលំដាប់ទី៤ក្នុងតំបន់អាស៊ីអាគ្នេយ៍ ។
លោក Zhan Sanhuo ប្រធានក្រុមប្រឹក្សាភិបាលក្រុមហ៊ុន Green Leader បានឲ្យដឹងថា ក្នុងអំឡុងពេល៥ឆ្នាំខាងមុខ ក្រុមហ៊ុននឹងសាងសង់រោងចក្រឲ្យបាន២០ក្នុងខេត្តដែលមានសក្តានុពលផលិតដំឡូងមី ដើម្បីព្យាយាមកាត់បន្ថយការនាំចេញវត្ថុធាតុដើមនេះទៅប្រទេសជិតខាង រួចក្រុមហ៊ុននឹងធ្វើការដាំដុះលើផ្ទៃដី១ម៉ឺនហិកតាបន្ថែមទៀតសម្រាប់បំពេញតម្រូវការរោងចក្រ ។ ក្រៅពីនេះ ក្រុមហ៊ុននឹងអនុវត្តកសិកម្មតាមកិច្ចសន្យា (Contract farming) ជាមួយដៃគូផលិត ដោយផ្តល់ជាទុន ពូជ ជី និងបច្ចេកទេសដាំដុះ ។ រោងចក្រនេះនឹងប្រើបច្ចេកវិទ្យាទាន់សម័យបំផុត ដើម្បីកែច្នៃម្សៅដំឡូងឲ្យមានគុណភាពកម្រិតស្តង់ដាអន្តរជាតិ ៕
ចែករំលែកព័តមាននេះ