រាជធានីភ្នំពេញ ៖ នៅទីស្នាក់ការសហព័ន្ធកីឡាប្រដាល់កម្ពុជា កាលពីល្ងាចថ្ងៃទី២ មេសាកន្លងមកនេះ មានរៀបចំពិធីសំណេះសំណាលជូនដំណើរកីឡាករ រឿង សោភ័ណ្ឌ តំណាងឱ្យកម្ពុជា ចេញទៅប្រកួតនៅប្រទេសបារាំងរយៈពេល៣ខែ។
លោកឧត្តមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានមានប្រសាសន៍ថា នេះជាលើកទី៣ហើយដែលសហព័ន្ធបានបញ្ជូនកីឡាកររឿង សោភ័ណ្ឌ ឱ្យចេញទៅប្រកួតនៅប្រទេសបារាំង ដែលដឹកនាំដោយលោក មាម ស៊ីសារ៉ា ប្រធានសហព័ន្ធកីឡាប្រដាល់គុនខ្មែរអន្តរជាតិ ។ រឿង សោភ័ណ្ឌ នឹងចាកចេញពីប្រទេសកម្ពុជានៅយប់ថ្ងៃទី៥ មេសា និងត្រឡប់មកវិញនៅចុងខែមិថុនា ឆ្នាំ២០១៨ ។ លោកបញ្ជាក់ថា គោលបំណងសំខាន់ដែលសហព័ន្ធកីឡាប្រដាល់កម្ពុជាបញ្ជូនកីឡាករ រឿង សោភ័ណ្ឌ ឱ្យទៅចូលរួមប្រកួតនៅក្រៅប្រទេសលើកនេះ គឺដើម្បីផ្សព្វផ្សាយក្បាច់គុនបុរាណខ្មែរនៅលើឆាកអន្តរជាតិឱ្យបានទូលំទូលាយ និងដើម្បីឱ្យគេបានដឹងថាខ្មែរគឺជាម្ចាស់ក្បាច់គុនយ៉ាងពិតប្រាកដ ។ លោកបន្តថា រយៈពេលកន្លងមកសហព័ន្ធកីឡាប្រដាល់គុនខ្មែរមិនត្រឹមតែបញ្ជូនកីឡាករប្រដាល់ឱ្យទៅចូលរួមប្រកួតនៅប្រទេសបារាំងនោះទេ គឺធ្លាប់បញ្ជូនទាំងកីឡាករនិងគ្រូបង្ហាត់ទៅប្រកួតនិងផ្សព្វផ្សាយក្បាច់គុនខ្មែរនៅប្រទេសជប៉ុនថែមទៀតផង។
លោកឧត្តមសេនីយ៍ឯក តែម ម៉ឺន មានប្រសាសន៍សង្កត់ធ្ងន់ថា ពិធីសំណេះសំណាលថ្ងៃនេះផងដែរ គឺជាសារបញ្ជាក់ប្រាប់ទៅដល់បណ្ដាក្លិបប្រដាល់នានាឱ្យបានដឹងថា រឿង សោភ័ណ្ឌ ដែលបញ្ជូនទៅប្រកួតនៅក្រៅប្រទេសនាពេលនេះ មានការអនុញ្ញាតពីសហព័ន្ធត្រឹមត្រូវ កុំឱ្យដូចបណ្ដាក្លិបប្រដាល់មួយចំនួនដែលបញ្ជូនកីឡាកររបស់ខ្លួនទៅប្រកួតនៅក្រៅប្រទេសដោយគ្មានការអនុញ្ញាតគឺមិនត្រឹមត្រូវនោះទេ។លោកបញ្ជាក់បន្ថែមទៀតថា ការបញ្ជូនកីឡាករទៅប្រកួតនៅក្រៅប្រទេសដោយគ្មានការអនុញ្ញាត គ្មានការដឹងឮពីសហព័ន្ធ ស្មើនឹងការបន្តុះបង្អាប់តម្លៃរបស់ខ្លួន ព្រោះថារាល់លើកដែលគេបានបញ្ជូនទៅភាគច្រើនជាកីឡាករដែល ប្រកួតមិនកើត ។
លោកក៏បានក្រើនរំលឹកផងដែរថា ទង្វើបែបនេះមិនគួរឱ្យមានទៀតនោះទេ ។ ចំណែករឿង សោភ័ណ្ឌ ដែលសហព័ន្ធសម្រេចបញ្ជូនឱ្យទៅចូលរួមប្រកួតនាពេលនេះ ដោយសារតែយើងមើលឃើញថា កីឡាកររូបនេះមានវិន័យល្អ មានកាយសម្បទារឹងមាំ ជាកីឡាករដែលឧស្សាហ៍ព្យាយាមក្នុងការហ្វឹកហាត់ អាចជួយលើកមុខមាត់ប្រទេសជាតិនៅលើឆាកអន្តរជាតិបាន។
លោក យុទ្ធ ភូថង ប្រធានកិត្តិយសសហព័ន្ធកីឡាប្រដាល់គុនខ្មែរបានផ្ដាំផ្ញើដល់កីឡាករ រឿង សោភ័ណ្ឌ ថា ការប្រកួតគឺតែងតែមានឈ្នះ-ចាញ់ តែមុននឹងចាញ់ក៏ល្អមើលដែរ ដូច្នេះធ្វើយ៉ាងណាត្រូវតែប្រឹងប្រែងប្រកួតឱ្យអស់ពីសមត្ថភាព ។ លោកបានលើកឡើងថា ពីមុនមានតែ៣ប្រទេសប៉ុណ្ណោះដែលចេះប្រដាល់ស្ទាត់ជំនាញជាងគេ និងមានការប្រកួតប្រជែងគ្នាទៀតផងគឺកម្ពុជា ថៃ និងឡាវ ។ ប៉ុន្តែសព្វថ្ងៃនេះមានប្រទេសជាច្រើនសុទ្ធតែចេះប្រដាល់ដូចយើងដែរសូម្បីតែវៀតណាមចូរកុំមើលងាយគេឱ្យសោះ ។
ទោះជាយ៉ាងណាលោកសូមកោតសរសើរដល់រឿង សោភ័ណ្ឌ ថ្វីដ្បិតតែមានកម្ពស់ទាបបន្តិចមែនចំពោះថ្វីដៃប្រកួតវិញនោះគឺល្អខ្លាំងណាស់ ។ លោកសង្ឃឹមថា រឿង សោភ័ណ្ឌ នឹងរួមចំណែកជួយលើកមុខមាត់ និងផ្សព្វផ្សាយក្បាច់គុនបុរាណខ្មែរនៅលើឆាកអន្តរជាតិ ឱ្យកាន់តែទូលំទូលាយ ហើយក៏ជាគំរូដ៏ល្អសម្រាប់កីឡាករដទៃទៀតដែរ៕
ចែករំលែកព័តមាននេះ