រាជធានីភ្នំពេញ ៖ រដ្ឋាភិបាលតួកគី គ្រោងនឹងបើកការហោះហើរត្រង់មកកាន់ប្រទេសកម្ពុជា ដើម្បីជំរុញអ្នកទេសចរតួកគី ក៏ដូចជាបង្កើនការវិនិយោគនៅកម្ពុជាលើវិស័យជាច្រើនទៀត ។ នេះបើយោងតាមមន្ត្រីខុទ្ទកាល័យសម្ដេចប្រធានរដ្ឋសភា បានឲ្យដឹងក្រោយជំនួបរវាងឯកអគ្គរដ្ឋទូតតួកគី និងសម្ដេច…
រាជធានីភ្នំពេញ ៖ រដ្ឋាភិបាលតួកគី គ្រោងនឹងបើកការហោះហើរត្រង់មកកាន់ប្រទេសកម្ពុជា ដើម្បីជំរុញអ្នកទេសចរតួកគី ក៏ដូចជាបង្កើនការវិនិយោគនៅកម្ពុជាលើវិស័យជាច្រើនទៀត ។ នេះបើយោងតាមមន្ត្រីខុទ្ទកាល័យសម្ដេចប្រធានរដ្ឋសភា បានឲ្យដឹងក្រោយជំនួបរវាងឯកអគ្គរដ្ឋទូតតួកគី និងសម្ដេច ហេង សំរិន ។
លោក កែវ ពិសិដ្ឋ នាយកខុទ្ទកាល័យសម្តេច ហេង សំរិន ប្រធានរដ្ឋសភា បានឲ្យដឹងថា ក្នុងជំនួបពិភាក្សាការងារនោះ លោកជំទាវអៃដា អ៊ុនលុ (H.E.Ms.Ayda Unlu) នៅវិមានរដ្ឋសភា នាព្រឹកថ្ងៃទី២ ខែមេសា ឆ្នាំ២០១៨ បានលើកឡើងថា ទំនាក់ទំនងកិច្ចសហប្រតិបត្តិការរវាងកម្ពុជា និងតួកគី បានចាប់ផ្តើមជាង២ទសវត្សរ៍មកហើយ ដែលទំនាក់ទំនងនោះធ្វើឲ្យប្រទេសទាំងពីរកម្ពុជា-តួកគី មានភាពរីកចម្រើន ។
លោកជំទាវបានបន្តថា តួកគីបានផ្តល់សារសំខាន់ណាស់រវាងទំនាក់ទំនងនៃប្រទេសទាំងពីរ ហើយក្នុងនាមលោកស្រីជាឯកអគ្គរដ្ឋទូតថ្មី នឹងធ្វើយ៉ាងណាឲ្យកម្ពុជា និងតួកគី ខិតជិតគ្នាកាន់តែស្អិតរមួតបន្ថែមទៀត ។
លោកជំទាវបញ្ជាក់ថា ៖« ក្នុងអាណត្តិការទូតខ្ញុំនឹងខិតខំធ្វើកិច្ចសហប្រតិបត្តិការ ក៏ដូចជាទំនាក់ទំនងកម្ពុជា-តួកគីលើគ្រប់វិស័យ ទាំងវិស័យនយោបាយ ការទូត ពាណិជ្ជកម្ម សេដ្ឋកិច្ច ទេសចរណ៍ ឲ្យកាន់តែមានការវិវត្តរីកចម្រើន ហើយតួកគី គឺជាដៃគូល្អរបស់កម្ពុជា » ។
លោកជំទាវក៏បានលើកឡើង និងគូសបញ្ជាក់ចំពោះសម្តេច ហេង សំរិន ថា ចំណុចអាទិភាពដែលត្រូវធ្វើ គឺជំរុញឲ្យមានការហោះហើរត្រង់មកកម្ពុជា ។ ទាំងនេះនឹងជំរុញវិស័យទេសចរណ៍ ក៏ដូចជាពាណិជ្ជកម្ម និងវិស័យផ្សេងទៀត ត្រូវបានលើកកម្ពស់ ។ ការបើកជើងហោះហើរនេះ ដោយសារកម្ពុជាមានសក្តានុពលខ្លាំងក្នុងប្រទេសតំបន់អាស៊ី ។
ក្នុងជំនួបនោះដែរ សម្តេច ហេង សំរិន ប្រធានរដ្ឋសភា បានមានប្រសាសន៍ស្វាគមន៍ចំពោះវត្តមានលោកស្រីទូត ដែលត្រូវបានរដ្ឋាភិបាលសម្រេចបញ្ជូនមកធ្វើជាទូតប្រចាំនៅកម្ពុជា ។ សម្តេចបានសម្តែងក្តីសង្ឃឹមថា វត្តមានលោកជំទាវនៅកម្ពុជា នឹងធ្វើឲ្យកម្ពុជា និងតួកគី រឹតចំណងកិច្ចសហប្រតិបត្តិការកាន់តែប្រសើរឡើងថែមទៀត ។
សម្តេចក៏បានវាយតម្លៃខ្ពស់ចំពោះទំនាក់ទំនងនៃកិច្ចសហប្រតិបត្តិការរវាងតួកគីនិងកម្ពុជា ក៏ដូចជារវាងរដ្ឋាភិបាល និងប្រជាពលរដ្ឋមានភាពរីកចម្រើន ដែលកត្តានេះបានផ្តល់នូវសន្តិភាព សន្តិសុខ ទាំងការអភិវឌ្ឍក្នុងតំបន់ និងសកលលោកផងដែរ ។
សម្តេច ហេង សំរិន បានបញ្ជាក់ថា ៖«ខ្ញុំផ្តល់សេចក្តីសង្ឃឹមថា ក្នុងអាណត្តិថ្មីរបស់លោកស្រីទូតនៅកម្ពុជា នឹងធ្វើកិច្ចសហប្រតិបត្តិការជាមួយបណ្តាស្ថាប័នក្រសួងនានារបស់កម្ពុជា សំដៅធ្វើយ៉ាងណា ឲ្យកាន់តែស្អិតរមួតថែមទៀត » ។
ជាមួយគ្នានោះដែរ សម្តេចប្រធានរដ្ឋសភា ក៏បានស្នើដល់លោកស្រីទូត ជួយជំរុញបន្ថែមទៀតក្នុងការលើកកម្ពស់ និងធ្វើកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម ការវិនិយោគលើកសិកម្ម និងទេសចរណ៍ផងដែរ ។ ជាងនេះទៀត សម្តេចបានស្នើដល់លោកស្រីជួយលើកទឹកចិត្តវិនិយោគិន និងអ្នកទេសចរមកកម្ពុជាឲ្យបានច្រើនទៀតផង ។
សម្តេច ហេង សំរិន ក៏បានមានប្រសាសន៍ថា សម្តេចនឹងធ្វើកិច្ចសហប្រតិបត្តិការជាមួយលោកស្រី រហូតដល់ទទួលបានជោគជ័យក្នុងបេសកកម្មការទូតនៅកម្ពុជា ៕
ចែករំលែកព័តមាននេះ