រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មបានឲ្យដឹងថា ក្រសួងខិតខំធ្វើយ៉ាងណា ជំរុញការផ្តល់វិញ្ញាបនបត្របញ្ជាក់ប្រភពដើមទំនិញទម្រង់D ដើម្បីសម្រួលដល់ការនាំចេញកសិផលឲ្យបានគ្រប់២៥រាជធានី-ខេត្ត ខណៈដែលបច្ចុប្បន្ន ខេត្តចំនួន៤ហើយបាននិងកំពុងសាកល្បងអនុវត្ត ។
មានប្រសាសន៍ប្រាប់អ្នកសារព័ត៌មាន នៅក្រោយវគ្គបណ្តុះបណ្តាល ស្តីពីច្បាប់ពាណិជ្ជកម្ម អន្តរជាតិ ក្រោមក្របខ័ណ្ឌអង្គការពាណិជ្ជកម្មពិភពលោក នាព្រឹកថ្ងៃទី២ មេសា លោក អ៊ុក ប្រជា រដ្ឋលេខាធិការក្រសួងពាណិជ្ជកម្ម បានលើកឡើងថា ការធ្វើប្រតិភូកម្មនេះ មិនត្រឹមតែជាការផ្ទេរភាពជាម្ចាស់នៃមុខងារទេ ថែមទាំងជាការទទួលខុសត្រូវក្នុងការគ្រប់គ្រង និងការអនុវត្តមុខងារឲ្យកាន់តែមានប្រសិទ្ធភាព និងតម្លាភាព ជៀសវាងនូវបាតុភាពអសកម្មភាព និងការកកស្ទះកសិផលជាយថាហេតុ ។
លោកបន្តថា ៖« វគ្គបណ្តុះបណ្តាលនាពេលនេះ ក៏នឹងរួមចំណែកយ៉ាងច្រើនក្នុងការជំរុញដល់ការផ្តល់វិញ្ញាបនបត្របញ្ជាក់ប្រភពដើមទំនិញទម្រង់Dផងដែរ » ។
ក្រសួងពាណិជ្ជកម្មបានដាក់ខេត្តចំនួន៤ ក្នុងការសាកល្បងធ្វើប្រតិភូកម្មនៃការចេញវិញ្ញាបនបត្របញ្ជាក់ប្រភពដើមទំនិញទម្រង់Dនេះ រួមមាន ខេត្តប៉ៃលិន, បាត់ដំបង, បន្ទាយមានជ័យ និងឧត្តរមានជ័យ ។
យោងតាមទិន្នន័យរបស់នាយកដ្ឋាននាំចេញ-នាំចូល នៃក្រសួងពាណិជ្ជកម្មបានបង្ហាញថា ការនាំចេញនៅក្រោមប្រព័ន្ធអនុគ្រោះពាណិជ្ជកម្មទៅកាន់ទីផ្សារបរទេស បានកើនឡើងរហូតដល់១១,១៥៣លានដុល្លារអាមេរិកនៅក្នុងឆ្នាំ២០១៧ ។ ដោយឡែក ការនាំចេញតាមវិញ្ញាបនបត្របញ្ជាក់ប្រភពដើមទំនិញទម្រង់ D ទៅកាន់ទីផ្សារតំបន់អាស៊ាន បានកើនឡើងប្រមាណជាង៦៦% ពីទឹកប្រាក់៧២៨លានដុល្លារអាមេរិកនៅក្នុងឆ្នាំ២០១៦ រហូតដល់ទឹកប្រាក់ជាង១ពាន់លានដុល្លារអាមេរិកនៅក្នុងឆ្នាំ២០១៧ ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consultingលោក ង៉ែត ជូ បានថ្លែងថា ប្រសិនជាការរៀបចំបែបនេះ និងអនុវត្តបានត្រឹមត្រូវ វាជារឿងល្អ ប៉ុន្តែបទពិសោធន៍កន្លងមកដូចជា ការបង្កើតការិយាល័យច្រកចេញចូលតែមួយនៅតែជួបឧបសគ្គ ដោយសារភាពស្មុគស្មាញមួយចំនួនដូចជា អ្នករកសេវាតែងតែចង់បានសេវាលឿន ប៉ុន្តែនៅពេលដាក់ឯកសារ ឯកសារពួកគេត្រូវផ្អឹបទុក ។ ហេតុនេះ ការបង់សេវាជារឿងធម្មតាដើម្បីទទួលបានឯកសារ ឬក្រដាសស្នាមនានាលឿន ។
លោកបន្តថា ៖« ទោះជាយ៉ាងណា ខ្ញុំមើលឃើញថា ការិយាល័យច្រកចេញចូលតែមួយមានភាពប្រសើរ ដោយកាត់បន្ថយការិយាធិបតេយ្យបានប្រសើរជាងមុន » ។
គួរកត់សម្គាល់ថា ក្រសួងពាណិជ្ជកម្មបានធ្វើប្រតិភូកម្មសេវាសាធារណៈជាបន្តបន្ទាប់ដល់មន្ទីរពាណិជ្ជកម្មនៅថ្នាក់ក្រោមជាតិ សំដៅឆ្លើយតបតម្រូវការអាទិភាពរបស់ប្រជាពលរដ្ឋនៅតាមមូលដ្ឋាន និងកាត់បន្ថយភាពក្រីក្រ ជាពិសេសការបង្ខិតសេវាសាធារណៈឲ្យកាន់តែជិតប្រជាពលរដ្ឋបំផុត ។
យោងតាមទិន្នន័យរបស់នាយកដ្ឋាននាំចេញ-នាំចូលបានឲ្យដឹងថា ការនាំចេញនៅក្រោមប្រព័ន្ធអនុគ្រោះពាណិជ្ជកម្មទៅកាន់ទីផ្សារបរទេស បានកើនឡើងរហូតដល់១១.១៥៣ លានដុល្លារអាមេរិកនៅក្នុងឆ្នាំ២០១៧ ពោលគឺស្មើនឹងជាង១៨% បើប្រៀបធៀបឆ្នាំ២០១៦ ដែលមានទឹកប្រាក់ត្រឹមតែ៩.៤២១លានដុល្លារអាមេរិកប៉ុណ្ណោះ ។ ដោយឡែក ការនាំចេញតាមវិញ្ញាបនបត្របញ្ជាក់ប្រភពដើមទំនិញ ទម្រង់ឌី (D) ទៅកាន់ទីផ្សារតំបន់អាស៊ាន បានកើនឡើងប្រមាណជាង៦៦% គឺពីទឹកប្រាក់៧២៨លានដុល្លារអាមេរិកនៅក្នុងឆ្នាំ២០១៦ រហូតដល់ទឹកប្រាក់១.២១៤ លានដុល្លារអាមេរិកនៅក្នុងឆ្នាំ២០១៧ ៕
ចែករំលែកព័តមាននេះ