រាជធានីភ្នំពេញ ៖ នារីម្នាក់ជិះម៉ូតូទៅទិញសាច់ជ្រូកក្នុងផ្សារចេញមកវិញចោរលួចម៉ូតូបាត់បង្កឱ្យមានការភ្ញាក់ផ្អើលកាលពីវេលាម៉ោង៦និង២០នាទីព្រលប់ ថ្ងៃទី៣ ខែមេសា ឆ្នាំ២០១៨ នៅមុខ
រោងចក្រអាមេរិកកាំងជាប់ផ្លូវវេងស្រេង ភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ ។
នារីរងគ្រោះមានឈ្មោះ សុន ស្រីណេត អាយុ២៣ឆ្នាំ មុខរបរកម្មករោងចក្រ ស្នាក់នៅផ្ទះជួលភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ មានស្រុកកំណើតនៅជម្រៅ ឃុំតាំយ៉ាប ស្រុកព្រែកកប្បាស ខេត្តតាកែវ ។ បាត់ម៉ូតូម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ផ្លាកលេខ ភ្នំពេញ ១FP-៩៨៦៨ ។
តាមប្រភពព័ត៌មានពីជនរងគ្រោះបាននិយាយថា នៅមុនពេលកើតហេតុរូបនាងទើបចេញពីធ្វើការរោងចក្រទៅផ្សារនៅមុខរោងចក្រអាមេរិកកាំងមានមនុស្សច្រើនពេកនាងបានទៅបន្ទប់ជួលសិនរួចត្រឡប់មកទិញសាច់ជ្រូកដើម្បីធ្វើម្ហូបហើយបានជិះម៉ូតូទៅទិញនៅមុខរោងចក្រអាមេរិកកាំងបានទុកម៉ូតូនៅខាងមុខរោងចក្រដោយចាក់សោរ.កតែមិនបានបិទសន្ទះទេ ហើយចូលទៅទិញសាច់ជ្រូករយៈពេលប្រមាណ៧នាទីបានទិញរួចរាល់ហើយបានត្រឡប់ទៅកន្លែងទុកម៉ូតូវិញស្រាប់តែបាត់ម៉ូតូ រូបគាត់បានសួរនៅជិតកន្លែងកើតហេតុមាននារីម្នាក់បានឃើញជនសង្ស័យម្នាក់អាយុប្រមាណជិត៤០ឆ្នាំបានជិះម៉ូតូចេញភ្លាមផងដែរ ។
នារីរងគ្រោះបានបន្តទៀតថា ជារៀងរាល់ថ្ងៃគាត់តែងមកពីធ្វើការហើយមកទិញម្ហូបនៅមុខរោងចក្រខាងលើជារៀងរាល់ថ្ងៃដោយមិនដែលមានបញ្ហាឡើយតែប្រជាពលរដ្ឋនៅកន្លែងកើតហេតុបាននិយាយថា ទីតាំងខាងលើតែងតែបាត់ម៉ូតូជាច្រើនលើកមកហើយពេលខ្លះមួយថ្ងៃបាត់អស់២គ្រឿងក៏មានដែរ ។ ប្រជាពលរដ្ឋបានបន្តទៀតថា លួចនោះលួចដល់ហើយសឹងរាល់ថ្ងៃ ហើយសមត្ថកិច្ចមិនដែលចាត់វិធានការចាប់ជនសង្ស័យបានម្តងណាឡើយ ។
ក្រោយពេលកើតហេតុជនរងគ្រោះបានទៅដាក់ពាក្យបណ្ដឹងភ្លាមៗនៅប៉ុស្តិ៍នគរបាលរដ្ឋបាលចោមចៅ២ ដើម្បីឱ្យសមត្ថកិច្ចជួយស៊ើបអង្កេត និងតាមឃាត់ខ្លួនជនសង្ស័យមកផ្តន្ទាទោសតាមច្បាប់ ៕
ចែករំលែកព័តមាននេះ