ខេត្តបន្ទាយមានជ័យ ៖ នគរបាលចំនួន២ស្រុកគឺស្រុកមង្គលបូរី និងស្រុកព្រះនេត្រព្រះ បានសហការគ្នាស្រាវជ្រាវស៊ើបអង្កេត បង្ក្រាបចាប់ខ្លួនក្រុមក្មេងទំនើង នៅរសៀលថ្ងៃទី២ ខែមេសា ឆ្នាំ២០១៨ ដែលក្រុមក្មេងទាំងនេះជាមុខសញ្ញាបង្កការភ័យខ្លាចដល់អ្នកធ្វើដំណើរតាមរថយន្ត។ ក្រោយកើតនូវហេតុការណ៍នេះមានក្រុមក្មេងទំនើងបានពួនស្ទាក់ចាំគប់ដុំថ្មទៅលើរថយន្តប្រជាពលរដ្ឋធ្វើដំណើរឆ្លងកាត់ផ្លូវជាតិលេខ១៥៦Dបណ្តាលបែកកញ្ចក់រងរបួសយ៉ាងដំណំអ្នកធ្វើដំណើរក្នុងរថយន្តម្នាក់នោះ។ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានដាក់ចេញនូវបទបញ្ជាដល់កម្លាំងនគរបាលស្រុកព្រះនេត្រព្រះ និងស្រុកមង្គលបូរី សហការចុះប្រតិបត្តិការស្រាវជ្រាវ និងឈានដល់ការបង្ក្រាបចាប់ខ្លួនជាបន្តបន្ទាប់យកមកសាកសួរ ចំនួន៦នាក់។
បើតាមប្រភពព័ត៌មានពីកម្លាំងនគរបាលស្រុកព្រះនេត្រព្រះបានឱ្យដឹងថា កាលពីយប់ថ្ងៃទី៣០ ខែមីនា ឆ្នាំ២០១៨ នៅលើកំណាត់ផ្លូវជាតិលេខ១៥៦D ក្នុងភូមិសាស្ត្រក្បែរវត្តស្រមោច ស្ថិតនៅភូមិស្រមោច ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ ជាប់ព្រំប្រទល់ស្រុកមង្គលបូរី មានក្រុមក្មេងទំនើង១ក្រុមមានគ្នាពី៦ទៅ៨នាក់ បានធ្វើសកម្មភាពយកដុំថ្មគប់ទៅលើរថយន្តរបស់ប្រជាពលរដ្ឋដែលបានធ្វើដំណើរឆ្លងកាត់នៅចំណុចខាងលើបណ្តាលឱ្យត្រូវរងរបួសម្នាក់។ ក្រោយពីកើតហេតុនោះហើយជនរងគ្រោះ បានបង្ហោះព័ត៌មានតាមហ្វេសប៊ុក បង្កឱ្យមានការភ្ញាក់ផ្អើល។ ព័ត៌មាននោះក៏លេចឮដល់ស្នងការនគរ បាលនគរបាលខេត្តបន្ទាយមានជ័យ លោកឧត្តមសេនីយ៍ទោ អាត់ ខែម។ លោកឧត្តមសេនីយ៍ស្នងការក៏បានចាត់លោកឧត្តមសេនីយ៍ត្រី សិទ្ធិ ឡោះ ស្នងការរងទទួលផែនព្រហ្មទណ្ឌ ដឹកនាំកម្លាំងការិយាល័យជំនាញ សហការជាមួយនឹងកម្លាំងនគរបាលស្រុកមង្គលបូរី និងស្រុកព្រះនេត្រព្រះ ដើម្បីស្រាវជ្រាវស៊ើបអង្កេត ហើយក៏កំណត់បានមុខសញ្ញាក្រុមក្មេងទំនើងបង្កនោះ។
កម្លាំងនគរបាលឈានដល់ការចាប់ខ្លួន៦នាក់ ចំណែក២នាក់ទៀតកំពុងរត់គេចខ្លួន។ លោកវរសេនីយ៍ទោ មាស រិទ្ធី អធិការនគរបាលស្រុកព្រះនេត្រព្រះ ប្រាប់ឱ្យដឹងថា ក្មេងទំនើងទាំង៦នាក់នោះពួកគេរស់នៅក្នុងស្រុកមង្គលបូរី និងនៅស្រុកព្រះនេត្រព្រះ ស្ថិតនៅក្បែរភូមិសាស្ត្របង្កហេតុខាងលើ។ បើតាមចម្លើយសារភាពពីក្រុមក្មេងទាំងនោះគឺដោយសារតែពួកគេផឹកស្រាស្រវឹង ក៏បានធ្វើសកម្មភាពយកដុំថ្មគប់រថយន្តអ្នកធ្វើដំណើរលេង។ ក្រុមក្មេងទំនើងខាងលើក្នុងចំណោមពួកគេ៦នាក់កម្លាំងនគរបាលស្រុកព្រះនេត្រព្រះស្រាវជ្រារកវឃើញជនសង្ស័យ២នាក់ជាអ្នកដៃដល់ ចំណែក៤នាក់មិនបានចូលរួមធ្វើសកម្មភាពនោះទេ។ ចំពោះកម្លាំងនគរបាលចាប់បញ្ជូន២នាក់ជាជនដៃដល់ទៅកាន់ស្នងការដ្ឋាននគរបាលខេត្តដើម្បីចាត់ការតាមផ្លូវច្បាប់ហើយ។ ដោយឡែក៤នាក់ទៀតត្រូវបានអប់រំកែប្រែធ្វើ កិច្ចសន្យាដោះលែងទៅផ្ទះវិញ។ ចំណែកបក្ខពួក២នាក់ទៀតកំពុងរត់គេចខ្លួនក៏ជាមុខសញ្ញា ជនដៃដល់នោះផងដែរសមត្ថកិច្ចកំពុងបន្ត ស្វែងរកចាប់ខ្លួនដើម្បីយកមកចាត់ការតាមផ្លូវច្បាប់៕
ចែករំលែកព័តមាននេះ