ខេត្តកំពង់ធំ ៖ បុរសម្នាក់ទើបតែមកធ្វើការនៅថៃត្រឡប់មកវិញ ហើយទិញស្រាផឹកជាមួយមិត្តភក្តិស្រាប់តែស្លាប់តែម្តង ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១១.៥៥នាទីយប់ ថ្ងៃទី០២ ខែមេសា ឆ្នាំ២០១៨ ស្ថិតក្នុងភូមិក្នុងភូមិបុទុមកើត ឃុំរុងរឿង…
ខេត្តកំពង់ធំ ៖ បុរសម្នាក់ទើបតែមកធ្វើការនៅថៃត្រឡប់មកវិញ ហើយទិញស្រាផឹកជាមួយមិត្តភក្តិស្រាប់តែស្លាប់តែម្តង ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១១.៥៥នាទីយប់ ថ្ងៃទី០២ ខែមេសា ឆ្នាំ២០១៨ ស្ថិតក្នុងភូមិក្នុងភូមិបុទុមកើត ឃុំរុងរឿង ស្រុកស្ទោង ។
លោកវរសេនីយ៍ឯក យ៉ង សំ អធិការនគរបាលស្រុកស្ទោង បានឲ្យដឹងថា ជនរងគ្រោះខាងលើឈ្មោះ សុខ ឡេក ភេទប្រុស អាយុ២៤ឆ្នាំ រស់នៅភូមិសៀមពាយ ឃុំព្រះដំរី ស្រុកស្ទោង ។
លោកអធិការបន្តទៀតថា ជនរងគ្រោះខាងលើបានដេកស្លាប់នៅលើផ្ទះបងបង្កើតក្នុងភូមិបុទុមកើត ឃុំរុងរឿង ស្រុកស្ទោង ។ ហើយបើតាមការបំភ្លឺពីឈ្មោះ សុខ ភាច អាយុ៣៣ឆ្នាំ ត្រូវជាបងបង្កើតរបស់ជនរងគ្រោះបញ្ជាក់ថា មុនពេលកើតហេតុនៅល្ងាចថ្ងៃទី២ មេសា ជនរងគ្រោះជាប្អូនប្រុសនាងមកពីធ្វើការនៅថៃ ហើយបានទៅដល់ផ្ទះរបស់គេនៅភូមិ-ឃុំកើតហេតុខាងលើ និងផឹកស៊ីជាមួយមិត្តភក្តិនៅទីនោះ លុះដល់ម៉ោងប្រហែល៨យប់ ជនរងគ្រោះបានមកលេងផ្ទះរបស់នាងជាបង ជាមួយមិត្តភក្តិ និងទិញស្រាកន្លះកេសទៀតមកផឹកតែ២នាក់ ។ ពេលផឹកអស់មួយកំប៉ុង ជនរងគ្រោះប្រាប់ថា «គេងងុយដេក» ថាហើយក៏ប្រះខ្លួនដេកមុនទៅ ចំណែកមិត្តភក្តិគេនោះក៏ប្រះខ្លួនដេកក្បែរគ្នាដែរ លុះដល់ម៉ោងប្រហែល១១និង៥០នាទីយប់ ជនរងគ្រោះចេះតែននៀលចុះឡើងៗ លឺសំលេងគ្រឿកៗ នាងក៏សួរថា «អាអូនកើតអីស្រវឹងស្រាមែនទេ?» ពេលនោះជនរងគ្រោះតបវិញថា «អត់ស្រវឹងទេ» ហើយក៏ងាកមុខចេញ បន្ទាប់មកក៏លឺសំលេងអ៊ូសៗបីដងក៏បាត់មាត់ឈឹងតែម្តង ឃើញប្អូនមានសភាពមិនស្រួល នាងក៏ហៅឪពុកម្តាយក្មេកជួយមើលផង តែអនិច្ចាជនរងគ្រោះបានស្លាប់បាត់ទៅហើយ។
លុះនៅព្រឹកថ្ងៃទី០៣ មេសា សមត្ថកិច្ចបានចុះធ្វើការពិនិត្យសពពុំមានឃើញមានស្លាកស្នាមអ្វីគួរឱ្យសង្ស័យឡើយ ទើបសន្និដ្ឋានថា ការស្លាប់របស់ជនរងគ្រោះ គឺបណ្តាលមកពីដាច់សរសៃឈាមក្នុងខួរក្បាល ហើយក៏ប្រគល់សពឱ្យក្រុមគ្រួសារធ្វើបុណ្យតាមប្រពៃណី៕
ចែករំលែកព័តមាននេះ