លោកត្រាំ ស្នើសុំជួបលោកពូទីន នៅសេតវិមាន
សហរដ្ឋអាមេរិក-ប្រទេសរុស្ស៊ី ៖ លោកយូរី អ៊ូចាកូវ ទីប្រឹក្សាកិច្ចការអន្តរជាតិរបស់ប្រធានាធិបតីរុស្ស៊ីថ្លែងនាថ្ងៃទី២ មេសា ថា ប្រធានាធិបតីអាមេរិក លោកដូណាល់ ត្រាំ…
សហរដ្ឋអាមេរិក-ប្រទេសរុស្ស៊ី ៖ លោកយូរី អ៊ូចាកូវ ទីប្រឹក្សាកិច្ចការអន្តរជាតិរបស់ប្រធានាធិបតីរុស្ស៊ីថ្លែងនាថ្ងៃទី២ មេសា ថា ប្រធានាធិបតីអាមេរិក លោកដូណាល់ ត្រាំ…
សហរដ្ឋអាមេរិក-ប្រទេសរុស្ស៊ី ៖ លោកយូរី អ៊ូចាកូវ ទីប្រឹក្សាកិច្ចការអន្តរជាតិរបស់ប្រធានាធិបតីរុស្ស៊ីថ្លែងនាថ្ងៃទី២ មេសា ថា ប្រធានាធិបតីអាមេរិក លោកដូណាល់ ត្រាំ ពេលទាក់ទងគ្នាតាមទូរស័ព្ទកាលពីថ្ងៃទី២០ មីនា កន្លងទៅ ធ្លាប់បានស្នើជួបជាមួយសមភាគីរុស្ស៊ីលោកវ្ល៉ាឌីមៀរ ពូទីន នៅសេតវិមាន ។
ដកស្រង់សម្តីដោយទីភ្នាក់ងារព័ត៌មានរុស្ស៊ី TASS លោកអ៊ូចា កូវ និយាយថា ប្រសិនបើអ្វីៗប្រព្រឹត្តទៅដោយរលូន ខ្ញុំសង្ឃឹមថា អាមេរិកនឹងពុំបោះបង់ចោលសំណើពិភាក្សាពីលទ្ធភាពរៀបចំការជួបគ្នាកំពូលមួយឡើយ ។
កាលពីថ្ងៃទី២០ មីនា តាមទូរស័ព្ទលោកត្រាំ បានសរសើរលោកពូទីន ដែលឈ្នះក្នុងការបោះឆ្នោតប្រធានាធិបតីថ្ងៃទី១៨ មីនា ។ ពេលសន្ទនាគ្នាតាមទូរស័ព្ទ មេដឹកនាំទាំង២បានផ្តោតការចាប់អារម្មណ៍ជាពិសេសចំពោះលទ្ធភាពរៀបចំការជួបគ្នាកម្រិតខ្ពស់មួយ ។ លោកត្រាំ ថ្លែងទៅកាន់ក្រុមអ្នកកាសែតនាថ្ងៃនោះដែរថា លោកមានបំណងជួបជាមួយលោកពូទីន នាពេលខាងមុខមិនយូរ ។
ទោះបីយ៉ាងណា តាមលោកអ៊ូចាកូវ ថា ទស្សនវិស័យនៃការរៀបចំការជួបគ្នាកំពូលមួយចាប់តាំងពីថ្ងៃនោះមកពុំត្រូវបានពិភាក្សាគ្នាឡើយ ។
កាលពីសប្តាហ៍មុន ក្រុងវ៉ាស៊ីនតោនបានបណ្តេញអ្នកការទូតរុស្ស៊ី៦០នាក់ និងបិទស្ថានកុងស៊ុលរុស្ស៊ីនៅក្រុង SEATTLE ក្នុងក្របខណ្ឌនៃសកម្មភាពដែលមានការសម្របសម្រួលគ្នាជាមួយអង់គ្លេស ព្រមទាំងប្រទេសលោកខាងលិចឯទៀតៗ ក្រោយរឿងបំពុលអតីតចារបុរសរុស្ស៊ីម្នាក់នៅអង់គ្លេស ។ ក្រុងមូស្គូបានចាត់វិធានការសងសឹកវិញ ដោយបណ្តេញអ្នកការទូតអាមេរិក ក្នុងចំនួនប្រហែលគ្នា និងដោយបិទស្ថានកុងស៊ុលអាមេរិកនៅក្រុងសាំងប៉េទ័រស្បួរ ។
លោកអ៊ូចាកូវ បន្តថា ក្នុងស្ថានភាពនៃព្រឹត្តិការណ៍ទាំងនេះប្រាកដណាស់ គេពិបាកក្នុងការពិភាក្សាគ្នាពីការរៀបចំការជួបគ្នាកំពូលមួយ ។ លោកបន្តថា រុស្ស៊ីចាត់ទុកជានិច្ចថាការជួបគ្នាបែបនេះ ពិតជាសំខាន់ និងចាំបាច់បំផុតសម្រាប់ប្រទេសទាំង២ និងសម្រាប់សហគមន៍អន្តរជាតិ ៕
ចែករំលែកព័តមាននេះ