ប្រទេសអាហ្វ្រិកខាងត្បូង ៖ លោកស្រី WINNIE MANDELA អតីតភរិយាប្រធានាធិបតីអាហ្វ្រិកខាងត្បូងស្បែកខ្មៅដំបូងគេ លោកណែលសុនម៉ង់ដឺឡា ជាវីរៈបុរសនៃការតស៊ូប្រឆាំងអាបាថេត បានទទួលមរណភាពហើយកាលពីថ្ងៃទី២ មេសា ក្នុងជន្មាយុ៨១ឆ្នាំ នាំឱ្យមានការគោរពវិញ្ញាណក្ខន្ធលោកស្រីយ៉ាងគគ្រឹកគគ្រេងបំផុត ខណៈលោកស្រីចាត់ទុកជាមាតាប្រជាជាតិមានខ្សែជីវិតចម្រូងចម្រាស់បំផុត ។
ជាប្តីប្រពន្ធនឹងគ្មានរយៈពេលជាង៣០ឆ្នាំ លោកណែលសុន ម៉ង់ដឺឡា និងលោកស្រី WINNIE បានប្រឡូកតស៊ូយ៉ាងស្វិតស្វាញប្រឆាំងរបបប្រកាន់ពូជសាសន៍ស្បែកស ។
រូបថតកាន់ដៃគ្នាពេលលោកម៉ង់ដឺឡាចេញពីគុកកាលពីឆ្នាំ១៩៩០ ក្រោយជាប់ឃុំឃាំងដល់ទៅ២៧ឆ្នាំ ដែលក៏ជានិមិត្តរូបនៃជ័យជម្នះរបស់អ្នកទាំង២ ប្រឈមមុខនឹងរបបអាប៉ាថេត ត្រូវគេលុបចោលជាផ្លូវការកាលពីឆ្នាំ១៩៩៤ ។ កេរ្តិ៍ឈ្មោះល្បីល្បាញរបស់លោកស្រី ដែលពលរដ្ឋអាហ្វ្រិកខាងត្បូងហៅដោយគោរពថា «WINNIE» ត្រូវបំផ្លាញដោយសាររលកនយោបាយ និងរឿងចោទប្រកាន់ទាំងឡាយពីបទពុករលួយ ។
អ្នកនាំពាក្យរបស់លោកស្រី WINNIE លោក VICTOR DELAMINI ប្រកាសថា ជាមួយមហាទុក្ខសោកដែលយើងសូមជូនដំណឹងដល់សាធារណជនថា លោកស្រី WINNIE MADIKIZALA MANDELA ទទួលមរណភាពហើយនៅមន្ទីរពេទ្យ MILPARK ក្រុងចូហាននេស្បួរថ្ងៃទី២ មេសា ក្រោយពីលោកស្រីមានជំងឺអស់ពេលដ៏យូរ ។
ប្រធានាធិបតីអាហ្វ្រិកខាងត្បូង លោក CYRIL RAMAPHOSA ប្រមុខគណបក្សសមាជជាតិអាហ្វ្រិកជាគណបក្សដែលតស៊ូប្រឆាំងអាប៉ាថេត បានសម្តែងការគោរពវិញ្ញាណក្ខន្ធរបស់លោកស្រីដែលចាត់ទុកជាសំឡេងប្រឆាំងអាប៉ាថេតយ៉ាងមុះមុតបំផុត ។ បន្ទាប់ពីទៅកាន់ផ្ទះលោកស្រីនៅក្រុង SOWETO ប្រធានាធិបតីរូបនេះប្រកាសថា ប្រជាជាតិត្រូវគោរពវិញ្ញាណក្ខន្ធលោកស្រីពេលបុណ្យសពផ្លូវការនាថ្ងៃទី១៤ មេសា ៕
ចែករំលែកព័តមាននេះ