ជនជាប់ចោទ ជួប សម្លា.ប់ មិនត្រូវបាននាំខ្លួនមកសាលាឧទ្ធរណ៍ ?
- ភ្នំពេញ
រាជធានីភ្នំពេញ ៖ ចៅក្រមសាលាឧទ្ធរណ៍នៅរសៀលថ្ងៃទី០៣ ខែមេសា ឆ្នាំ២០១៨នេះ បានលើកពេលសវនាការលើបណ្តឹងឧទ្ធរណ៍របស់ជនជាប់ឈ្មោះ អឿត អាង ហៅជួប សម្លាប់…
រាជធានីភ្នំពេញ ៖ ចៅក្រមសាលាឧទ្ធរណ៍នៅរសៀលថ្ងៃទី០៣ ខែមេសា ឆ្នាំ២០១៨នេះ បានលើកពេលសវនាការលើបណ្តឹងឧទ្ធរណ៍របស់ជនជាប់ឈ្មោះ អឿត អាង ហៅជួប សម្លាប់ ដែលកន្លងមកត្រូវបានកាត់ទោសពីបទសម្លាប់ លោក កែម ឡី បន្ទាប់ពីជនជាប់ចោទមិនត្រូវបានគេនាំខ្លួនមកកាន់បន្ទប់សវនាការតាមការគ្រោងទុក ។
គួរបញ្ជាក់ថា សាលាឧទ្ធរណ៍បានគ្រោងបើកសវនាការលើបណ្តឹងប្តឹងឧទ្ធរណ៍របស់ជនជាប់ចោទ ជួប សម្លាប់ ដែលសាលាដំបូងរាជធានីភ្នំពេញបានផ្តន្ទាទោសដាក់ពន្ធនាគារអស់មួយជីវិត ករណីបាញ់សម្លាប់លោកបណ្ឌិត កែម ឡី ។ បន្ទាប់មកមេធាវីការពារក្តីជនជាប់ចោទបានប្តឹងឧទ្ធរណ៍ប្រឆាំងការសម្រេចរបស់សាលាដំបូងរាជធានីភ្នំពេញ ។
គួរបញ្ជាក់ថា កាលពីថ្ងៃទី២៣ ខែមីនា ឆ្នាំ២០១៧កន្លងទៅ លោក លាង សំណាត់ អនុប្រធានសាលាដំបូងរាជធានីភ្នំពេញបានសម្រេចប្រកាសសាលក្រមផ្តន្ទាទោសជនជាប់ចោទ អឿត អាង ហៅជួប សម្លាប់ ដាក់ពន្ធនាគារអស់មួយជីវិត ក្រោមការចោទប្រកាន់ពីបទឃាតកម្មគិតទុកជាមុន និងការកាន់កាប់អាវុធខុសច្បាប់ ។ នៅពេលសវនាការកាលពីថ្ងៃទី០១ ខែមីនា ឆ្នាំ២០១៧ «ជួប សម្លាប់» បានសារភាពថា ខ្លួនជាអ្នកបាញ់សម្លាប់ លោក បណ្ឌិត កែម ឡី ដោយសារខឹងលោក កែម ឡី ជំពាក់ប្រាក់មិនសង ហើយអះអាងថា គ្មានអ្នកនៅពីក្រោយខ្នងនៃឃាតកម្មនេះនោះទេ ។
ជនជាប់ចោទលោក អឿត អាង ហៅជួប សម្លាប់ អាយុ៣៨ឆ្នាំ ត្រូវបានសមត្ថកិច្ចឃាត់ខ្លួនភ្លាមៗ ក្រោយពីបាញ់សម្លាប់ លោក បណ្ឌិត កែម ឡី កាលពីវេលាម៉ោង៨និង៥០នាទីព្រឹក ថ្ងៃទី១០ ខែកក្កដា ឆ្នាំ២០១៦ នៅចំណុចក្នុងទីតាំង ស្តារម៉ាតនៃស្ថានីយប្រេងឥន្ធនៈកាល់តិចបូកគោ ស្ថិតនៅកាច់ជ្រុងមហាវិថីព្រះមុនីវង្ស និងមហាវិថី ម៉ៅសេទុង ក្នុងសង្កាត់ ទន្លេបាសាក់ ខណ្ឌចំការមន លោកហ៊ឹង ប៊ុនជា ព្រះរាជអាជ្ញាអមសាលាឧទ្ទរណ៍បានចេញដីកាបង្គាប់ឲ្យលោកស្រី ប៊ូ រចនា ប្រពន្ធលោកកែម ឡី ចូលរួមសវនាការក្នុងនាមជាដើមបណ្តឹងរដ្បវេណីចូលមកសាលាឧទ្ធរណ៍នៅវេលាម៉ោង២រសៀលថ្ងៃទី០៣ ខែមេសា ឆ្នាំ២០១៨ ជាកំណត់ ដើម្បីជំនុំជម្រះជនជាប់ចោទឈ្មោះ ជួប សម្លាប់ ។
ក្រុមប្រឹក្សាជំនុំជម្រះមានលោក ចាយ ច័ន្ទតារាវណ្ណ លោកស្រី ទិតសុទ្ធី ប៉រ៉ាលក្ខណ៍ លោក ស៊ិន វិសាល និងក្រឡាបញ្ជីលោកផាត់ មិថុនា ៕
ចែករំលែកព័តមាននេះ