រាជធានីភ្នំពេញ ៖ ធៀបនឹងការប្រកួតរបស់កីឡាករជើងខ្លាំងចាស់វស្សានៅលើសង្វៀន
ទូរទស្សន៍អាស៊ីអាគ្នេយ៍ កាលពីថ្ងៃអាទិត្យទី១ មេសា គេកត់សម្គាល់ថា កីឡាករវ័យក្មេង២រូប ពិសេសគឺ បង្គោលខៀវ ហ៊ឹម គឹមរៀង មកពីក្លិបតាព្រហ្មមានជ័យ ទទួលការចាប់អារម្មណ៍តែម្ដង បន្ទាប់ពីលោកបានឈ្នះកីឡាករពូកែឌឺ លីន ឃុនផែន មកពីក្លិបបុរីរាជសីហ៍មានរិទ្ធិ ដោយពិន្ទុក្នុងទឹកទី៥ ដោយសារតែបានធ្វើសកម្មភាពខ្លាំងៗលើសង្វៀន ។ កីឡាកររូបនេះ កាន់តែបង្ហាញសមត្ថភាពល្អខ្លាំង ខណៈដែលសកម្មភាពរបស់លោក គឺល្អមើល ហើយជក់ចិត្តពីសំណាក់អ្នកស្នេហាវិស័យប្រដាល់តែម្ដង ដោយកន្ត្រាក់អារម្មណ៍អ្នកចូលចិត្តប្រដាល់បានខ្លាំងជាងគូល្បីៗនោះផង។
ការប្រកួតដែលទើបបញ្ចប់កាលពីថ្ងៃអាទិត្យនេះ កីឡាករទាំងពីរធ្វើឱ្យអ្នកទស្សនាមិនខ្វល់ថាពួកគេបានឡើងសង្វៀនណាខ្លះពីមុនមកទេដោយសារតែម្នាក់ៗប្រកួតគ្នាខ្លាំងតាំងពីដើមទឹកទី១រហូតដល់ភាគីម្ខាងទៀតបរាជ័យក្នុងទឹកទី៥ ។ ដ្បិតថា ពួកគេឡើងប្រកួតគ្នាមិនមែនក្នុងនាមជាគូអន្តរជាតិ ឬជាគូប៉ះជាមួយកីឡាករល្បី តែគេកត់សម្គាល់ថា អ្នកទស្សនាគឺមានការចាប់អារម្មណ៍អ្នកទាំងពីរខ្លាំងជាងគូឯក ឬគូល្បីៗអន្តរជាតិនាថ្ងៃនោះផង ជាពិសេសសម្រែកហ៊ោកញ្ជ្រៀវ និងការអបអរសាទរ គឺមានកម្រិតមិនធម្មតា ។ សំឡេងហ៊ោកញ្ជ្រៀវបានកើតមានឡើងឡើងខ្ទរសង្វៀនប្រដាល់នាថ្ងៃនោះ ដែលអាចនិយាយបានកីឡាករមួយគូនេះក្លាយជាសមាសភាពដក់ក្នុងអារម្មណ៍មហាជនតែម្ដងដែលអាចកន្ត្រាក់ការចាប់អារម្មណ៍ពីអ្នកទស្សនាបានច្រើនក្នុងពេលដែលគូប្រកួតល្បីៗមួយចំនួនរងការរិះគន់ រឿងប្រកួតលែងកើតទៅវិញ ។
អ៊ីចឹងហើយទើបអ្នកឈ្នះក្លាយជាកីឡាករល្បីតែម្ដង ដោយសារមានអ្នកទស្សនានាថ្ងៃនោះដក់ជាប់ក្នុងអារម្មណ៍ ។ អ្នកអង្គុយទស្សនាដកកចំហមាត់មិនតិចទេ ក្នុងពេលសកម្មភាពប្រកួតរបស់អ្នកទាំងពីរមានភាពស្វិតស្វាញពេញរយៈពេល៥ទឹក ហើយក្នុងទឹកទី៥បានក្លាយជាទឹកកាត់ក្ដីធ្វើឱ្យភាគីអ្នកឈ្នះល្បីឈ្មោះតែម្ដង ។ នេះជាគូប្រកួតដែលមានការចាប់អារម្មណ៍ក្នុងចំណោមកីឡាករជើងថ្មីនៅក្នុងពិភពប្រដាល់ ខណៈដែលអ្នកទស្សនាក៏បានចាត់ទុកថា កីឡាករទាំងពីរថ្វីបើមិនបានឡើងរេញច្រើនកន្លងមក តែពេលបង្ហាញវត្តមានលើកនេះមានសន្ទុះគាំទ្រខ្លាំង ។ ម្នាក់ៗនិយាយថា អ្នកទាំងពីរមិនទាន់ប្រកួតបានច្រើនលើកផង តែទទួលបានការចាប់អារម្មណ៍ច្រើនដល់ម្លឹងទៅហើយ ចុះទម្រាំមានឱកាសឡើងប្រកួតគ្នាបានច្រើនជាងនេះ តើនឹងល្អយ៉ាងណា ។ អ្នកទាំងពីរក៏ស្ថិតក្នុងវ័យត្រូវតំណាងឱ្យកម្ពុជាក្នុងពេលកម្ពុជាធ្វើជាម្ចាស់ផ្ទះព្រឹត្តិការណ៍ស៊ីហ្គេមឆ្នាំ២០២៣ នាពេលខាងមុខ។
លោក ញាណ សុធី អ្នករៀបចំការប្រកួតបានអះអាងថា ការប្រដាល់នៅព្រឹកថ្ងៃអាទិត្យនោះ មានការប្រកួតជាលក្ខណៈអន្តរជាតិដល់ទៅ២គូ ប៉ុន្តែលោកនៅចាត់ទុកថា ការប្រដាល់អន្តរជាតិក្នុងព្រឹត្តិការណ៍នោះទាក់ភ្នែកមហាជនចង់ចាញ់ការប្រកួតរបស់កីឡាករទាំង២ផង។ លោកថា ការប្រកួតកាលពីថ្ងៃអាទិត្យនោះ អាចចាត់ទុកថាជាការប្រកួតរំលេចជើងថ្មី បន្ទាប់ពីខាងសង្វៀនរបស់លោកបានព្យាយាមដាក់បញ្ចូលកីឡាករល្អៗវ័យក្មេងច្រើន ដើម្បីស្វែងរកជើងខ្លាំងជំនាន់ថ្មីឡើងប្រកួតជាលក្ខណៈអន្តរជាតិ និងប្រកួតជាលក្ខណៈគូល្អៗ ។
លោកថា នេះជាការលើកស្ទួយវិស័យកីឡាសម្រាប់កីឡាករក្មេងៗកាន់តែប្រសើរ ដោយសារតែកីឡាករថ្មីលោកតែងកត់សម្គាល់ថា ប្រឹងប្រកួតបានល្អ ។ លោកបានសរសើរចំពោះកីឡាករ ហ៊ឹម គឹមរៀង ដែលប្រកួតយ៉ាងល្អ ដែលនៅពីក្រោយជោគជ័យ បានទទួលការចាប់អារម្មណ៍យ៉ាងខ្លាំងក្នុងស្រទាប់មហាជន ។ លោកថា ខ្លួនចង់ដាក់គូប្រកួតក្មេងៗឱ្យបានច្រើន ប៉ុន្តែពេលខ្លះកីឡាករទាំងនោះក៏មិនគ្រប់គ្រាន់សម្រាប់ឱ្យលោកធ្វើការផ្គូផ្គងផងដែរ ទើបក្នុងពេលខ្លះក៏បានដាក់គូប្រកួតតែកីឡាករល្អៗ ហើយមើលរំលងកីឡាករថ្មីៗ ។
លោកថា ឱ្យតែមានកីឡាករវ័យក្មេងណាដែលល្អ លោករៀបចំដាក់ភ្លាម ហើយលោកនឹងសម្រេចរៀបចំឱ្យប្រកួតជាលក្ខណៈគូអន្តរជាតិនោះផង ប្រសិនបើគេមានបទពិសោធន៍គ្រប់គ្រាន់ ហើយហ៊ានឡើងប្រកួត ។ លោកថា មានអ្នកទស្សនានៅតាមគេហដ្ឋានច្រើនបានសរសើរពីសមត្ថភាពរបស់កីឡាករក្មេងៗដែលលោកបានជ្រើសរើស ហើយបើនិយាយពីមន្ត្រីសហព័ន្ធគឺតាមដានច្រើនជាងគេតាមក្លិប ដែលមានសិស្សល្អៗផងដែរ ទើបលោកអាចជម្រើសបានកីឡាករល្អៗឱ្យឡើងប្រកួតលើរេញ ។
លោកថា ការប្រដាល់នាពេលកន្លងមក ទូរទស្សន៍អាស៊ីអាគ្នេយ៍មិនដែលភ្លេចពីការបញ្ចូលគ្នារវាងកីឡាករស្រករមុន និងកីឡាករស្រករក្រោយនោះទេ គឺរមែងដាក់មួយគូៗយ៉ាងតិចឱ្យមហាជនបានឃើញជានិច្ច ដោយគ្រាន់តែវត្តមានរបស់កីឡាករទាំងនោះហាក់មិនសូវទាក់ទាញចំណាប់អារម្មណ៍របស់អ្នកស្នេហាវិស័យប្រដាល់បានច្រើន ។
លោកបានកោតសរសើរចំពោះវត្តមានរបស់កីឡាករ ហ៊ឹម គឹមរៀង និងលីន ឃុនផែន ដោយបានទាំងចាត់ទុកថាកីឡាករទាំងពីរប្រើអស់សមត្ថភាពធ្វើឱ្យលោកដែលជាអ្នករៀបចំក៏មានកម្លាំងចិត្តក្នុងការផ្គូផ្គង និងផ្ដល់ឱកាសឱ្យសម្រាប់កម្មវិធីបន្តបន្ទាប់នោះផង ។ លោកថា ការប្រកួតនៅក្នុងថ្ងៃនោះ សម្រាប់គូប្រកួតដែលជាគូពិសេស ឬគូឯកមិនប្រាកដថាទទួលបានការចាប់អារម្មណ៍ខ្លាំងជាងគូរបស់អ្នកទាំងពីរនោះទេ ដោយសារតែកីឡាករទាំងពីរប្រឹងប្រែងប្រកួតបានល្អមិនគួរជឿ៕
ចែករំលែកព័តមាននេះ