ពួកលោកខាងលិច-ប្រទេសរុស្ស៊ី ៖ កាសែតរុស្ស៊ី NEZAVISSIMAIA GAZETA សរសេរកាលពីថ្ងៃទី២ មេសា ថា ការប្រឈមមុខដាក់គ្នារវាងរុស្ស៊ី និងពួកលោកខាងលិច
ដែលមានការកើនឡើងក្រោយរឿងបំពុលអតីតចារបុរសរុស្ស៊ីម្នាក់ បន្តិចម្តងៗមានរូបភាពជាសង្គ្រាមត្រជាក់ ដោយពិតប្រាកដមួយ ទោះបីមនុស្សមួយចំនួននៅបដិសេធពុំទទួលស្គាល់ក្តី ។
តាមកាសែតនេះថា ការប្រឈមមុខដាក់គ្នាមានលើគ្រប់រណសិរ្ស គឺខាងសេដ្ឋកិច្ចជាមួយការដាក់ទណ្ឌកម្ម និងការសងសឹកតបតវិញ ខាងនយោបាយជាមួយការបណ្តេញពួកអ្នកការទូតទៅវិញទៅមក ព្រមទាំងការបិទស្ថានកុងស៊ុល និងយោធា ។ គេបានលើកដូចទម្លាប់ពីការគំរាមកំហែងដោយអាវុធនុយក្លេអ៊ែរ និងបង្ហាញមីស៊ីលកាន់តែទំនើបៗ ។ សំណាងដែរសម្រាប់ពេលនេះមានត្រឹមតែការធ្វើសមយុទ្ធ និងការបង្ហាញកម្លាំង ។ ថ្ងៃទី២៦ មីនា នាវាមុជទឹកនុយក្លេអ៊ែរយុទ្ធសាស្ត្រអាេមរិក USS NEBRASKA បានបាញ់សាកបង្ហាញឥទ្ធិពលមីស៊ីលបាលីស្ទិករំលងទ្វីបធុន TRIDENT II D5 ២គ្រាប់។
នេះជាការសាកល្បងលើកទី២៨ ក្នុងក្របខណ្ឌនៃកម្មវិធីបង្កើត និងធ្វើឱ្យសុក្រិត្យប្រព័ន្ធអាវុធយុទ្ធសាស្ត្ររបស់កងម៉ារីនអាេមរិក រួចការបាញ់សាកមីស៊ីល TRIDENT គឺជាលើកទី១៦៧ ក្រោយការដាក់មីស៊ីលធុននេះឱ្យប្រើប្រាស់ពីឆ្នាំ១៩៨៩មក ។
រុស្ស៊ីក៏មិនណយបានចេញប្រតិកម្មតបតវិញ ដោយនាថ្ងៃទី៣០ មីនា នៅទីតាំងបាញ់បង្ហោះកាំជ្រួច PLESSETSK បានបាញ់សាកល្បងមីស៊ីលរំលងទ្វីបជំនាន់ថ្មីដេលរត់លឿនបំផុតធុន RS-28 SARMAT ។ មីស៊ីលថ្មីនេះគ្រោងយកមកជំនួសមីស៊ីលប្រភេទនោះដែរធុន R-32 M2 VOEVODA ដែលដាក់ឱ្យកងកម្លាំងមីស៊ីលយុទ្ធសាស្ត្រប្រើប្រាស់៣០ឆ្នាំមកហើយ ។ ការផលិតជាខ្សែសង្វាក់មីស៊ីល SARMAT ត្រូវចាប់ផ្តើមក្នុងឆ្នាំ២០២០ រួចនាឆ្នាំខាងមុខកងវរសេនាធំដំបូងនឹងបំពាក់ប្រព័ន្ធមីស៊ីលយុទ្ធសាស្ត្រនុយក្លេអ៊ែរនេះ ។
ចំណែកប្រទេសចិនវិញក្រោយពីការប្រកាសរបស់ប្រធានាធិបតីអាមេរិក លោកដូណាល់ ត្រាំ ពីការយកពន្ធធ្ងន់ធ្ងរលើបណ្តាផលិតផលចិននាំចូលបានប្រកាសការដាក់ទណ្ឌកម្មតបតវិញ ដោយចេញបញ្ជីបណ្តាផលិតផលអាមេរិក១២៨មុខ ដែលត្រូវយកពន្ធ ។ ចិនអះអាងថា ពុំខ្លាចឡើយចំពោះសង្គ្រាមពាណិជ្ជកម្មជាមួយសហរដ្ឋអាមេរិក ទោះពុំចង់ឱ្យមានបែបនេះក្តី ។
ក្នុងក្របខណ្ឌនៃយុទ្ធសាស្ត្រអភិវឌ្ឍន៍បច្ចេកវិទ្យាវិញ ចិនបង្ហាញពីម៉ូដែលយន្តហោះអវកាសមានមុខងារច្រើនមួយដោយធ្វើការសាកល្បងនៅឯទីតាំងបាញ់បង្ហោះផ្កាយរណប JIUQUAN ។ យន្តហោះគ្មានមនុស្សបើកនេះរត់លឿនជាងសំឡេង៥ដង ហើយអាចហោះក្នុងកម្ពស់តារាវិថីមុនពេលហោះត្រឡប់មកផែនដីវិញ ។
មកទល់ពេលនេះបច្ចេកវិទ្យាអវកាសមានការរីកចម្រើនយ៉ាងលឿនបំផុត ដែលគេពុំបដិ
សេធដែលទីអវកាសបន្តិចទៀតនឹងក្លាយជាទីលានសំខាន់នៃការប្រណាំងប្រជែងគ្រឿងសព្វាវុធ ។ ទិសដៅរបស់ចិនគឺផលិតយន្តហោះអវកាសដែលអាចបំពេញបេសកកម្មយោធា និងស៊ីវិល ៕
ចែករំលែកព័តមាននេះ