ខេត្តកណ្តាល ៖ សពបុរសម្នាក់ដែលមានសភាពស្អុយរលួយទៅហើយនោះ ត្រូវបានគេប្រទះឃើញ ហើយបង្កការភ្ញាក់ផ្អើល កាលពីវេលាម៉ោង១១និង៤៥នាទីព្រឹកថ្ងៃទី១ មេសា ស្ថិតនៅក្នុងអូរល្វា ក្នុងភូមិអរិយក្សត្រ ឃុំអរិយក្សត្រ ស្រុកល្វាឯម ។ ក្រោយការប្រទះឃើញសព សមត្ថកិច្ចនគរបាលនៃការិយាល័យបច្ចេកទេសវិទ្យាសាស្ត្រខេត្ត-ស្រុក សហការជាមួយនគរបាលប៉ុស្តិ៍ ក្រុមប្រឹក្សាឃុំ ភូមិ និងគ្រូពេទ្យឃុំ បានបង្កើតគណៈកម្មការចម្រុះពិនិត្យនិងធ្វើកោសល្យវិច័យយ៉ាងយកចិត្តទុកដាក់បំផុត ។
សមត្ថកិច្ចបានឱ្យដឹងថា សពមានសភាពរលេះរលួយសាច់ទៅហើយ ពុំមានអ្នកណាស្គាល់អត្តសញ្ញាណទេ គ្រាន់តែដឹងថា ជាបុរស អាយុប្រហែលចន្លោះពី៤០ឆ្នាំ ទៅ៥០ឆ្នាំ ស្លៀកខោខូវប៊យជេីងវែង ក្រណាត់យឺតពណ៌ខៀវ ខ្សែក្រវាត់ទាហានពណ៌ខ្មៅក្បាលដែករូបផ្កាយ អត់មានពាក់អាវ ស្លៀកខោលីអូ ពណ៌ខ្មៅ សក់ស្លូត មានស្នាមចាក់សាក់លើកំភួនដៃរូបផ្កាកុលាប និងនៅក្នុងហោប៉ៅខោខាងស្តាំមាននាទ្បិកា១គ្រឿង ពណ៌.ស និងលុយចំនួន១៦.០០០រៀល ។
សមត្ថកិច្ចបន្ថែមថា នៅលើដងខ្លួនសពមានស្នាមកាប់់រយះក្បាលផ្នែកខាងក្រោយដល់ខាងមុខ រហូតលេីចុងចិញ្ចេីមខាងឆ្វេង កាប់លេីជេីងសក់ផ្នែកខាងក្រោយកាត់ទទឹងដល់ស្លឹកត្រចៀក ខាងឆ្វេង មកដល់លេីចិញ្ចេីមខាងស្តាំ មានស្នាមបាក់ឆ្អឹងកំភួនដៃខាងឆ្វេងជាពីរកំណាត់ដាច់ចេញពីគ្នា និងបាក់ភ្លៅខាងឆ្វេង ។ តាមការសន្និដ្ឋានរបស់សមត្ថកិច្ចជំនាញ ករណីនេះ គឺជាឃាតកម្ម ហើយសពត្រូវបានបញ្ចុះនៅវត្តឧទុម្ពរ ក្នុងភូមិឃុំខាងលើ ។
ដូច្នេះ បើបងប្អូនប្រជាពលរដ្ឋណា មានបាត់សមាជិកគ្រួសារដូចភិនភាគរៀបរាប់ខាងលើ សូមមកទាក់ទងជាមួយសមត្ថកិច្ចនគរបាលស្រុកល្វាឯម គាស់យកសពទៅធ្វើបុណ្យតាមប្រពៃណី និងដាក់ពាក្យបណ្តឹងដេីម្បីឱ្យសមត្ថកិច្ចធ្វើការស្រាវជ្រាវតាមស្វែងរកចាប់ខ្លួនជនដៃដល់យកមកផ្តន្ទាទោសតាមផ្លូវច្បាប់ ។ ជាការពិតណាស់ ប្រសិនបើសពនេះមិនត្រូវបានស្គាល់អត្តសញ្ញាណទេ នោះពិបាកណាស់ក្នុងការស្វែងរកឃាត
ករ ៕
ចែករំលែកព័តមាននេះ