ខេត្តកណ្តាល ៖ បន្ទាប់ពីឃាតករដៃដល់ប្រើប្រាស់កាំភ្លើងខ្លីម៉ាកឡុកបាញ់ប្រហារសម្លាប់ប្ដីចំនួន១៥គ្រាប់ យ៉ាងសុសសាច់បណ្ដាលឲ្យស្លាប់បាត់បង់ជីវិតយ៉ាងអាណោចអាធ័មនៅវង់ផឹកស៊ី ក្នុងពិធីខួបកំណើតសាច់ញាតិនោះ ទីបំផុតគំនុំឈាមនេះត្រូវបានស្ត្រីជាភរិយាជនរងគ្រោះព្យាយាមតាមប្រមាញ់ទាល់តែបានប្រគល់ឱ្យសមត្ថកិច្ច ។ ស្ត្រីជាប្រពន្ធរបស់ជនរងគ្រោះដែលទន្ទឹងរង់ចាំយុត្តិធម៌សម្រាប់ប្ដី និងរូបនាងព្រមទាំងក្រុមគ្រួសារទាំងមូលយ៉ាងអន្ទះសារអស់រយៈពេលជាង២ឆ្នាំកន្លងមក ពេលនេះបានឆ្លើយតបការឈឺចាប់របស់ខ្លួនហើយ ។
ជនដៃដល់ដែលមានឱកាសគេចខ្លួនមានសេរីភាពនៅក្រៅឃុំរហូតមក ក៏ដល់ពេលអស់លក្ខណ៍ ខណៈពេលស្ត្រីជាប្រពន្ធជនរងគ្រោះបានស៊ើបដឹងថា ជនជាឃាតករដែលសម្លាប់ប្ដីមានប្រពន្ធចុងម្នាក់ទៀត ហើយប្អូនខាងប្រពន្ធចុងម្នាក់ត្រូវរៀបការ ទើបនាងបានតាមដានរហូតដល់រោងការហើយក៏បានចាប់ខ្លួនជនដៃដល់ដោយផ្ទាល់ដៃ នៅក្នុងរោងការប្អូនខាងប្រពន្ធចុងនោះរួចប្រគល់ឲ្យនគរបាលតែម្ដង ។ ការចាប់ខ្លួនឃាតករនោះបានធ្វើឡើងកាលពីវេលាម៉ោង៧និង១០នាទីយប់ថ្ងៃទី១ មេសា នៅក្នុងភូមិព្រៃក្តួច ឃុំគ្រញូង ស្រុកត្រាំកក់ ខេត្តតាកែវ ។
ជនជាឃាតករដៃឆៅកំណាចរូបនេះឈ្មោះ ទឹម សារី អាយុ៣៥ឆ្នាំ មុខរបរបជាមន្ត្រី នគរបាលនៅនាយកដ្ឋានអង្គរក្ស អង្គភាពអន្តរាគមន៍ មានស្រុកកំណើតនៅក្នុងភូមិកាប់នឹម ឃុំខ្វាវ ស្រុកសំរោង ខេត្តតាកែវ និងមានទីលំនៅក្នុងភូមិគោកពពេល ឃុំលំហាច ស្រុកអង្គស្នួល ខេត្តកណ្ដាល ។ ជននេះមានដីការបង្គាប់ឲ្យចាប់ខ្លួនចំនួន២ ក្នុងនោះមានដីកាលេខ៥៧២ ដ.ក.ច.ខ ចុះថ្ងៃទី១០ ខែសីហា ឆ្ឆ្នាំ២០១៥ របស់លោក សាយ សម្ផស្សសេរី ចៅក្រមស៊ើបសួរនៃសាលាដំបូងខេត្តកណ្តាល។ ចំណែកដីកាមួយទៀតលេខ២៥៨ ដ.ក.ច.ខ. ចុះថ្ងៃទី១៦ ខែមិថុនា ឆ្នាំ២០១៦ របស់លោក ផូង វណ្ណ ប្រធានក្រុមប្រឹក្សាជំនុំជម្រះសាលាដំបូងខេត្តកណ្តាល ។
ដីកាទាំង២នេះបានចោទប្រកាន់ពីបទឃាតកម្មគិតទុកជាមុន ប្រព្រឹត្តនៅក្នុងភូមិគោកពពេល ឃុំលំហាច ស្រុកអង្គស្នួល ខេត្តកណ្តាល កាលពីថ្ងៃទី៤ ខែកក្កដា ឆ្នាំ២០១៥ មិនតែប៉ុណ្ណោះនៅក្នុងដីកាបានបញ្ជាក់ថា ជននេះនឹងត្រូវទទួលទោសអស់មួយជីវិតថែមទៀតផង ។ ដោយឡែកបុរសដែលជាជនរងគ្រោះឈ្មោះ ស្រី វុទ្ធី អាយុជាង៣០ឆ្នាំ មានទីលំនៅក្នុងភូមិគោកពពេល ស្រុកអង្គស្នួលនោះដែរត្រូវឃាតកររូបនេះបាញ់ប្រហាររហូតដល់ទៅចំនួន១៥គ្រាប់ គឺពេលបាញ់១គ្រាប់ដួលស្លាប់ហើយ មិនអស់ចិត្តទេ បានបាញ់ស្រោចចំនួន១៤គ្រាប់ទៀត ពិតជាសាហាវបំផុត ដោយកាំភ្លើងឡុក ។នគរបាលស្រុកអង្គស្នួលបានបញ្ជាក់ថា ប្រពន្ធឃាតករនិងប្រពន្ធរបស់ជនរងគ្រោះ ត្រូវជាបងប្អូនជីទួតមួយនឹងគ្នា ដោយម្ដាយពួកនាងត្រូវជាបងប្អូនជីដូនមួយនឹងគ្នាហើយអ្នកស្លាប់និងជនដៃដល់គឺត្រូវជាសាច់ថ្លៃនឹងគ្នាដែរ ។
ដោយឡែក នៅថ្ងៃទី៤ ខែកក្កដា ឆ្នាំ២០១៥ ក្នុងពិធីខួបកំណើតកូនសាច់ញាតិ ហើយក៏មានកម្មវិធីផឹកស៊ីជួបជុំគ្នាផងដែរ ។ ពេលនោះមិនមានការឈ្លោះប្រកែកគ្នានៅក្នុងវង់ផឹកស៊ីទេ ប៉ុន្តែជនរងគ្រោះបាននិយាយបង្អាប់ឱ្យជនដៃដល់ថា ផឹកស៊ីមិនដែលចេញលុយ និងក្រោកឈរជល់កែវរំលងក្បាលជនដៃដល់ ។ប្រភពដដែលបានបន្តទៀតថា ពិធីនោះបានប្រព្រឹត្តទៅរហូតដល់យប់ជ្រៅស្រវឹងធ្លាក់ភ្នែករៀងៗខ្លួន ហើយក៏មិនទាន់បានបញ្ចប់នៅឡើយ ស្រាប់តែឈ្មោះ ទឹម សារី ដែលជាឃាតករបានក្រោកដើរទៅផ្ទះបាត់ ។ ចំណែកជនរងគ្រោះបាននៅផឹកបន្ត ។ លុះមួយសន្ទុះក្រោយមក ទើបឃាតកររូបនេះដើរត្រឡប់មកវិញកាន់កាំភ្លើងខ្លីម៉ាកឡុកមកជាមួយ ហើយធ្វើការបាញ់ប្រហារសម្លាប់ជនរងគ្រោះឥតញញើតដៃ បណ្ដាលឲ្យស្លាប់ក្នុងថ្លុកឈាមរួចបានគេចខ្លួនបាត់ស្រមោលតែម្ដង តាំងពីពេលនោះមក ។
ប្រភពខាងលើបានបន្តថា ជនសង្ស័យម្នាក់នេះសាហាវព្រៃផ្សៃណាស់ ទោះបីជនរងគ្រោះដួលហើយក៏នៅតែបាញ់ស្រោចមកលើទៀត គឺបាញ់រហូតដល់អស់គ្រាប់ ។ ក្រោយពេលកើតហេតុកម្លាំងនគរបាលស្រុក និងកងរាជអាវុធហត្ថ ស្រុកបានចុះទៅធ្វើការស្រាវជ្រាវ ប៉ុន្តែរកជនដៃដល់មិនឃើញឡើយ ។ ចំណែកសាលាដំបូងខេត្តកណ្ដាលបានចេញដីកាបង្គាប់ឲ្យចាប់ខ្លួនដល់ទៅ២ដីកា ហើយគិតរហូតមកដល់ត្រឹមថ្ងៃទី១ ខែមេសា ឆ្នាំ២០១៨ មានរយៈពេលជាង២ឆ្នាំហើយ ។
ដោយឡែកប្រភពព័ត៌មានមួយទៀតបាននិយាយថា ឃាតករកំណាចត្រូវបានស្ត្រីជាប្រពន្ធរបស់ជនរងគ្រោះចាប់ដោយផ្ទាល់ដៃ ព្រោះ ក្រុមគ្រួសារជនរងគ្រោះបានទន្ទឹងចាំរកយុត្តិធម៌ធ្លាក់ពីលើមេឃនេះយូរមកហើយ ហើយពួកគាត់ជាពិសេសប្រពន្ធជនរងគ្រោះ បានតាមដានរកឃាតករជាប់រហូត និងបានដឹងថាជននោះសម្ងំលាក់ខ្លួនតែនៅក្នុងរាជធានីភ្នំពេញប៉ុណ្ណោះ ។ បន្ទាប់ពីដឹងថាប្អូនប្រុសប្រពន្ធចុងឃាតកររៀបការ ទើបស្ត្រីជាប្រពន្ធជនរងគ្រោះ និងបងប្រុសបាននាំគ្នាចូលផ្សារទិញរ៉ូប និងសម្លៀកបំពាក់តែងខ្លួនបន្លំធ្វើជាភ្ញៀវចូលហូបការ ព្រោះដឹងថា ជនដៃដល់ប្រាកដជាមកចូលរួម នៅក្នុងពិធីមង្គលការមួយនេះជាមិនខាន ។
អ្វីដែលជាកាសន្និដ្ឋាននោះមិនខុសឡើយ រហូតដល់វេលាម៉ោង៧និង១០នាទីយប់ថ្ងៃដដែល ទើបឃើញឃាតករលាក់មុខរូបនោះចូលទៅក្នុងរោងការមែន ។ ពេលនោះប្រពន្ធជនរងគ្រោះស្ទុះចូលទៅចាប់ខ្លួនឃាតករនេះតែម្ដង ហើយឃាតករដែលភ្លេចជង់នេះបានស្រែកថា «ហេតុអីបានជាមកចាប់ខ្ញុំអុីចឹង? ការសួរបែបនេះ ដោយសារតែមើលមិនស្គាល់ស្ត្រីដែលស្ទុះមកចាប់ខ្លួនកណ្តាលចំណោមមនុស្សម្នានោះ ជានរណាទេ ។ ប្រពន្ធជនរងគ្រោះបានឆ្លើយតបវិញថា «អ្ហែងបាញ់សម្លាប់ប្ដីអញ១៥គ្រាប់ហើយ ម៉េចថាមិនស្គាល់» ? បន្ទាប់មកក៏បានអានដីកាចាប់ខ្លួនឲ្យជននោះស្ដាប់ថែមទៀត ។ ខណៈនោះបានបង្កឲ្យមានការភ្ញាក់ផ្អើលពេញរោងការ ហើយបងប្រុសប្រពន្ធជនរងគ្រោះ ក៏បានចូលទៅជួយចាប់ក្រៀកជាប់រួចបានប្រគល់ទៅឲ្យនគរបាលប៉ុស្ដិ៍គ្រញូងស្រុកត្រាំកក់ជួយចាត់ការទៅតាមនីតិវិធី ។
ក្រោយមកនគរបាលប៉ុស្តិ៍គ្រញូង ស្រុកត្រាំកក់ ខេត្តតាកែវ បានហៅឲ្យនគរបាលស្រុកអង្គស្នួលទៅទទួលយកដើម្បីចាត់ការ ។ នគរបាលស្រុកអង្គស្នួលបានទៅយកជននោះ ទៅកាន់ស្នងការដ្ឋាននគរបាលខេត្តកណ្ដាលតែម្តង ព្រោះនៅក្នុងដីកាគឺជននេះនិងមានទោសជាប់គុកអស់មួយជីវិត ។ ដោយខ្លាចមានបញ្ហាតាមផ្លូវ ទើបបញ្ជូនទៅស្នងការដ្ឋានខេត្តតែម្ដង មិនហ៊ានទុកយូរទេ ៕
ចែករំលែកព័តមាននេះ