ខេត្តសៀមរាប ៖ នៅសណ្ឋាគារសុខាសៀមរាប នាថ្ងៃទី០២ ខែមេសានេះ គណៈកម្មការទន្លេមេគង្គ បានចាប់ផ្តើមបើកសន្និសីទអន្តរជាតិពិនិត្យរបៀបវារៈសំខាន់ៗ មុនដាក់ជូនថ្នាក់ដឹកនាំក្នុងកិច្ចប្រជុំកំពូលគណកម្មការទន្លេមេគង្គលើកទី៣ ដែលនឹងប្រព្រឹត្តទៅនៅថ្ងៃទី០៤-០៥ ខែមេសាខាងមុខនេះ…
ខេត្តសៀមរាប ៖ នៅសណ្ឋាគារសុខាសៀមរាប នាថ្ងៃទី០២ ខែមេសានេះ គណៈកម្មការទន្លេមេគង្គ បានចាប់ផ្តើមបើកសន្និសីទអន្តរជាតិពិនិត្យរបៀបវារៈសំខាន់ៗ មុនដាក់ជូនថ្នាក់ដឹកនាំក្នុងកិច្ចប្រជុំកំពូលគណកម្មការទន្លេមេគង្គលើកទី៣ ដែលនឹងប្រព្រឹត្តទៅនៅថ្ងៃទី០៤-០៥ ខែមេសាខាងមុខនេះ ក្រោមប្រធានបទស្ដីពី «ការលើកកម្ពស់កិច្ចខិតខំប្រឹងប្រែងរួមគ្នា និងភាពជាដៃគូឈានទៅអភិវឌ្ឍន៍ប្រកបដោយចីរភាព សម្រាប់តំបន់អាងទន្លេមេគង្គ អន្តរជាតិ ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាព ។
ក្រោមអធិបតីភាពលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងលោកបណ្ឌិត ឃឹម ប៊ុនសុង អភិបាលនៃគណៈអភិបាលខេត្តសៀមរាប និងលោកហ្វាម ទួន ផាន នាយកប្រតិបត្តិគណៈកម្មការទន្លេមេគង្គ ។
លោកបណ្ឌិត ឃឹម ប៊ុនសុង អភិបាលខេត្តបានថ្លែងថា សៀមរាបនៃព្រះរាជាណាចក្រកម្ពុជា គឺត្រូវបានទទួលស្គាល់ថា ជាទីតាំងនៃប្រាង្គប្រាសាទអង្គវត្ត និងជាគោលដៅទេសចរណ៍ដ៏ទាក់ទាញបំផុត ពីជុំវិញពិភពលោក ដែលចំនួនអ្នកទេសចរណ៍មានការកើនទ្បើងជារៀងរាល់ឆ្នាំ គួរកត់សម្គាល់ ។ ក្រៅពីនេះសៀមរាបអង្គរក៏ជាគោលដៅនៃទីកន្លែងសម្រាប់ការរៀបចំព្រឹត្តិការណ៍ថ្នាក់ជាតិ ថ្នាក់តំបន់ និងអន្តរជាតិដែលមានការកើនទ្បើងផងដែរ ។
លោកបណ្ឌិតបានថ្លែងបន្តថា សៀមរាប គឺជាខេត្តធំជាងគេលំដាប់ទី១០ ក្នុងប្រទេសកម្ពុជា និងមួយភាគធំនៃភាគខាងត្បូងនៃខេត្តនេះ មានព្រំប្រទល់កំណត់ដោយបឹងទន្លេសាបដែលត្រូវបានទទួលស្គាល់ថា ជាបឹងទឹកសាបធំជាងគេបំផុត ក្នុងតំបន់អាស៊ីអាគ្នេយ៍ ដែលមានសារសំខាន់កម្រិតតំបន់ និងប្រព័ន្ធ-អេកូទ្បូស៊ីប្រកបដោយផលិតភាពបំផុតក្នុងពិភពលោក ។ សៀមរាបជាខេត្តមួយក្នុងចំណោមខេត្តចំនួន៩ ដែលរួមបង្កើតនូវឋបនីយ៍ជីវ មណ្ឌលបឹងទន្លេសាប ដែលបានកំណត់ និងទទួលស្គាល់ដោយអង្គការយូនីស្កូ(UNE-SCO) ក្នុងឆ្នាំ១៩៩៧ ហើយជាដីសើមទឹកសាប ដ៏សំខាន់បំផុតក្នុងតំបន់អាស៊ីអាគ្នេយ៍ និងជាតំបន់គោលដៅអេកូទេស- ចរណ៍ដ៏ទាក់ទាញបំផុតក្នុងប្រទេសកម្ពុជា ។
លោក លឹម គានហោ រដ្ឋមន្ត្រីក្រសួងធនធានទឹក និងឧត្តុនិយម និងជាសមាជិកក្រុមប្រឹក្សាគណៈកម្មការទន្លេមេគង្គកម្ពុជាបានបញ្ជាក់ថា គោលបំណងសំខាន់ជាងគេបំផុតរបស់កិច្ចប្រជុំកំពូលគណកម្មការទន្លេមេគង្គលើកទី៣ ដែលនឹងប្រព្រឹត្តទៅនៅថ្ងៃទី០៤-០៥ ខែមេសាខាងមុខនេះ គឺជាការពង្រឹង កិច្ចខិតខំប្រឹងប្រែងរួមគ្នា និងភាពជាដៃគូ ដើម្បីការគ្រប់គ្រង អភិវឌ្ឍធនធានទឹក និងធនធានពាក់ព័ន្ធដទៃទៀត ក្នុងតំបន់អាងទន្លេមេគង្គប្រកបដោយចីរភាព ហើយរំពឹងថា កិច្ចប្រជុំលើកទី៣ នៅកម្ពុជានេះនឹងនាំឱ្យមានការដាក់ចេញ នូវការទទួលខុសត្រូវរួមរបស់ប្រទេសជាសមាជិក ដើម្បីរក្សាឱ្យបាននូវស្ថានភាព និងធនធាន របស់តំបន់អាងទន្លេមេគង្គនាពេលអនាគតខាងមុខនោះផងដែរ ។
សូមបញ្ជាក់ថា កិច្ចប្រជុំកំពូលគណៈកម្មការទន្លេមេគង្គលើកទី៣នេះ បានប្រជុំបន្តពីកិច្ចប្រជុំកំពូលចំនួនពីរលើកកន្លងមក ដែលកិច្ចប្រជុំកំពូលលើកទី១ ត្រូវបានរៀបចំឡើងក្នុងឆ្នាំ២០១០ នៃប្រទេសថៃធ្វើជាម្ចាស់ផ្ទះក្នុងខេត្តហួហ៊ីន និងកិច្ចប្រជុំលើកទី២ ក្នុងឆ្នាំ២០១៤ នៅប្រទេសវៀតណាម ទទួលធ្វើជាម្ចាស់ផ្ទះនៅទីក្រុងហូជីមិញ គណៈកម្មការទន្លេមេគង្គ គឺជាស្ថាប័នអន្តររដ្ឋាភិបាល ដែលមានតួនាទីជំរុញលើកកម្ពស់កិច្ចពិគ្រោះយោបល់ និងកិច្ចសហប្រតិបត្តិការថ្នាក់តំបន់ក្នុងអាងទន្លេមេគង្គខ្សែទឹកខាងក្រោម ដែលត្រូវបានបង្កើតឡើងក្នុងឆ្នាំ១៩៩៥ ដោយផ្អែកទៅតាមកិច្ចព្រមព្រៀង ទន្លេមេគង្គរវាងប្រទេសកម្ពុជា ឡាវ ថៃ និងវៀតណាម ហើយស្ថាប័ននេះបំពេញតួនាទី ជាវេទិកាថ្នាក់តំបន់ សម្រាប់ការទូតផ្នែកទឹក ក៏ដូចជាមជ្ឈមណ្ឌលចំណេះដឹង ស្ដីពីការគ្រប់គ្រងធនធានទឹក ដើម្បីការអភិវឌ្ឍប្រកបដោយចីរភាពរបស់តំបន់ ។ ព្រឹត្តិការណ៍នៃកិច្ចប្រជុំកំពូលគណកម្មការទន្លេមេគង្គលើកទី៣ នឹងមានការចូលរួមពីនាយករដ្ឋមន្ត្រីទាំងបួន(ប្រទេសកម្ពុជា ឡាវ ថៃ និង វៀតណាម)ព្រមទាំងតំណាងជាន់ខ្ពស់មកពីប្រទេសចិន និងភូមា ដែលជាដៃគូសន្ទនារបស់គណៈកម្មការទន្លេមេគង្គ ផងដែរ ។
គួរបញ្ជាក់ផងដែរថា បឹងទន្លេសាប ត្រូវបានទទួលជាសកលថា សម្បូរទៅដោយធនធានជលផល និងជីវៈចម្រុះ និងដើរតួនាទីយ៉ាងសំខាន់លើផ្នែកបរិស្ថាន សង្គម សេដ្ឋកិច្ច និងផ្នែកវប្បធម៌សម្រាប់ប្រទេសកម្ពុជានិងក្នុងតំបន់ ។ រាជរដ្ឋាភិបាលកម្ពុជាបានបង្កើតទ្បើង នូវអាជ្ញាធរទន្លេសាបដែលមានបេសកកម្ម គឺដើម្បីជម្រុញការសម្របសម្រួលសម្រាប់ការគ្រប់គ្រង់ ការអភិវឌ្ឍន៍ និងការអភិរក្សប្រកបដោយចីរភាពនៃទន្លេសាប និងតំបន់ពាក់ព័ន្ធត្រូវរួមគ្នាធ្វើការឱ្យបានខ្លាំងក្លាថែមទៀតដើម្បី ការគ្រប់គ្រង ការប្រើប្រាស់ និងការអភិរក្សធនធានបឹងទន្លេសាបប្រកបដោយចីរភាព ៕
ចែករំលែកព័តមាននេះ