ខេត្តរតនគិរី ៖ រតនគិរី ជាខេត្តមួយស្ថិតនៅក្នុងភូមិភាគឦសាននៃប្រទេសកម្ពុជាដែលមានចម្ងាយផ្លូវ៥៨៨គីឡូម៉ែត្រពីរាជធានីភ្នំពេញ។ ខេត្តនេះមាន៨ស្រុក ក្រុង១ មាន៥០ឃុំ-សង្កាត់ ស្មើនឹង២៤៤ភូមិ និងមានប្រជាពលរដ្ឋជាង១៨ម៉ឺននាក់ ក្នុងនោះ៦៥%ជាជនជាតិដើមភាគតិច…
ខេត្តរតនគិរី ៖ រតនគិរី ជាខេត្តមួយស្ថិតនៅក្នុងភូមិភាគឦសាននៃប្រទេសកម្ពុជាដែលមានចម្ងាយផ្លូវ៥៨៨គីឡូម៉ែត្រពីរាជធានីភ្នំពេញ។ ខេត្តនេះមាន៨ស្រុក ក្រុង១ មាន៥០ឃុំ-សង្កាត់ ស្មើនឹង២៤៤ភូមិ និងមានប្រជាពលរដ្ឋជាង១៨ម៉ឺននាក់ ក្នុងនោះ៦៥%ជាជនជាតិដើមភាគតិច ដែលបាននិងកំពុងរស់នៅ និងប្រកបអាជីវកម្មលើគ្រប់វិស័យ ។
ខេត្តរតនគិរីអំណោយផលដល់ការវិនិយោគយ៉ាងច្រើនលើគ្រប់វិស័យ ពិសេសកសិកម្ម, ឧស្សាហកម្ម និងទេសចរណ៍ ខណៈបច្ចុប្បន្ន មានក្រុមហ៊ុនជាច្រើនហើយដែលបានមកវិនិយោគលើវិស័យកសិកម្ម និងឧស្សាហកម្ម ដូចជា ដំណាំកៅស៊ូ ស្វាយចន្ទី និងដំណាំដូងប្រេងជាដើម ។ មិនតែប៉ុណ្ណោះ ចម្ការកៅស៊ូ និងចម្ការស្វាយចន្ទី ជិត៣ម៉ឺនហិកតាជាលក្ខណៈគ្រួសារ ក៏បាននិងកំពុងបន្តរួមចំណែកយ៉ាងសំខាន់ដល់កំណើនសេដ្ឋកិច្ចខេត្ត និងជីវភាពប្រជាពលរដ្ឋផងដែរ ។
ដោយឡែក វិស័យទេសចរណ៍វិញ ខេត្តមានតំបន់រមណីយដ្ឋានទេសចរណ៍ជាតិចំនួន១៤កន្លែងរួមមាន សណ្ឋាគារ ផ្ទះសំណាក់ ភោជនីយដ្ឋាន និងអាហារដ្ឋាន រីកដុះដាលដូចផ្សិត និងបានទាក់ទាញភ្ញៀវទេសចរជាតិ និងអន្តរជាតិ មកទស្សនាកម្សាន្តជាច្រើនពាន់នាក់ក្នុងមួយឆ្នាំៗ។ រីឯតំបន់ទេសចរណ៍ដែលទាក់ទាញ និងគួរជាទីចាប់អារម្មណ៍បំផុតមានដូចជា បឹងយក្សឡោម, ទឹកជ្រោះចាអុង, ទឹកជ្រោះកាចាញ, ជម្រកសត្វព្រៃលំផាត់, ទន្លេសេសាន, សារមន្ទីរជនជាតិភាគតិច, ភ្នំឥសីប៉ាតាម៉ាក់, ទឹកជ្រោះកាទៀង, ទឹកជ្រោះអូរសៀនឡៃ ឬទឹកជ្រោះ៧ជាន់, ទឹកជ្រោះតាតត, វាលរំប្លង់ និងឧទ្យានជាតិវីរជ័យ ជាដើម ។
រយៈពេលប៉ុន្មានឆ្នាំចុងក្រោយនេះ ខេត្តភូមិភាគឦសានមួយនេះ បាននិងកំពុងបោះជំហានយ៉ាងលឿនលើការកសាងអភិវឌ្ឍន៍ ហេដ្ឋារចនាសម្ព័ន្ធរូបវន្តជាច្រើន ។ ជាក់ស្តែង ផ្លូវទៅកាន់បណ្តាស្រុកនានា ក៏ដូចជាផ្លូវលំក្នុងក្រុងបានលុង កាលពីមុនជាផ្លូវក្រាលក្រួសក្រហម បច្ចុប្បន្ន ជំនួសដោយផ្លូវក្រាលកៅស៊ូ ។
រីឯសំណង់អគាររដ្ឋបាលក្នុងក្រុង និងតាមបណ្តាស្រុក ត្រូវបានកសាងឡើងព្រោងព្រាត។ នេះក៏ដោយសារតែការខិតខំប្រឹងប្រែងរបស់ថ្នាក់ដឹកនាំខេត្ត ដោយអនុវត្តយ៉ាងសកម្មនូវកំណែទម្រង់ស៊ីជម្រៅរបស់រាជរដ្ឋាភិបាល ក៏ដូចជាយុទ្ធសាស្ត្រចតុកោណដំណាក់កាលទី៣ នីតិកាលទី៥នៃរដ្ឋសភា ថ្នាក់ដឹកនាំមន្ត្រីរាជការ និងប្រជាពលរដ្ឋក្នុងខេត្តបាននិងកំពុងកសាង និងអភិវឌ្ឍន៍ខេត្តនេះឲ្យរីកចម្រើនយ៉ាងឆាប់រហ័សដូចបណ្តាខេត្តនានាទូទាំងប្រទេស ។
ដូច្នេះសបញ្ជាក់ថា ខេត្តរតនគិរី ពិតជាមានសក្តានុពលក្នុងការវិនិយោគលើគ្រប់វិស័យដែលវិនិយោគិនជាតិ ក៏ដូចជាអន្តរជាតិមិនគួរមើលរំលង ខណៈទូទាំងប្រទេសមានស្ថិរភាព និងសន្ដិភាពពេញលេញ គួបផ្សំនឹងនយោបាយបើកចំហជើងមេឃរបស់រាជរដ្ឋាភិបាល ពិតជាផ្ដល់កាលានុភាពដល់ដំណើរការវិនិយោគនៅកម្ពុជា។
ថ្លែងនៅក្នុងពិធីបញ្ចុះខណ្ឌសីមាព្រះវិហារវត្តឧត្តមសាមគ្គីរតនារាម នៅភូមិហ្វាំង ឃុំប៉ុង ស្រុកវើនសៃ កាលពីថ្ងៃទី២៩ មីនា កន្លងមក សម្តេចវិបុលសេនាភក្តី សាយ ឈុំ ប្រមុខរដ្ឋស្តីទី និងជាប្រធានព្រឹទ្ធសភា បានលើកឡើងថា កម្ពុជាកំពុងឈរនៅលំដាប់ទី៥ក្នុងតំបន់អាស៊ានទាំង១០ប្រទេស ដែលជាប្រទេសមានប្រាក់បៀវត្សរ៍មន្ត្រីរាជការ និងកងកម្លាំងប្រដាប់អាវុធខ្ពស់ជាងគេ រាប់ចាប់ពីមន្ត្រីថ្នាក់ទាបបំផុតឡើងទៅ ។
សម្តេចវិបុលសេនាភក្តីបន្តថា ៖« រាជរដ្ឋាភិបាលកម្ពុជា ក៏នៅមានគោលនយោបាយបន្ធូរបន្ថយពន្ធ ពិនិត្យ និងព្យាបាលជំងឺនៅមន្ទីរពេទ្យរដ្ឋ ការធ្វើដំណើរតាមរថយន្តក្រុង ។ល។ ដែលសុទ្ធតែជាគោលនយោបាយរួមចំណែកដល់ការលើកកម្ពស់ជីវភាពរស់នៅរបស់ប្រជាពលរដ្ឋ »។
ទន្ទឹមនឹងនោះ សម្តេចបញ្ជាក់ថា កម្ពុជាបច្ចុប្បន្នបានក្លាយជាប្រទេសមានប្រាក់ចំណូលមធ្យមកម្រិតទាប និងត្រូវបានទទួលស្គាល់ថា ជាប្រទេសឯតទគ្គករខាងកំណើន និងជាខ្លាសេដ្ឋកិច្ចថ្មីរបស់ទ្វីបអាស៊ីផងដែរ ៕
ចែករំលែកព័តមាននេះ