រាជធានីភ្នំពេញ ៖ មន្ត្រីជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជាបានថ្លែងថា កម្ពុជាបានចុះកិច្ចព្រមព្រៀងការពារអ្នកវិនិយោគជាមួយប្រទេសជាង៣០ ដើម្បីការពារការវិនិយោគរបស់ពួកគេនៅកម្ពុជា ។
អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា លោក ជា វុទ្ធី បានថ្លែងបែបនេះក្នុងជំនួបធុរកិច្ច និងឱកាសវិនិយោគ ដែលប្រារព្ធធ្វើនៅរាជធានីភ្នំពេញ កាលពីល្ងាចថ្ងៃទី៣០ មីនា កន្លងមក ។
ក្នុងចំណោមប្រទេសជាង៣០ ដែលកម្ពុជាបានចុះហត្ថលេខាជាមួយនោះ គឺមានតែប្រទេសកម្ពុជា និងជប៉ុនប៉ុណ្ណោះ ដែលមានការចុះហត្ថលេខាដោយប្រមុខដឹកនាំនៃប្រទេសទាំងពីរ គឺសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោក ស៊ីនហ្សូ អាបេ នាយករដ្ឋមន្ត្រីជប៉ុន ។
លោកបន្តថា ៖« បន្ទាប់ពីការចុះកិច្ចព្រមព្រៀងការពារអ្នកវិនិយោគជាមួយជប៉ុន អ្នកវិនិយោគជប៉ុនកាន់តែច្រើនបានចូលមកវិនិយោគនៅកម្ពុជា ដែលនេះជាអ្វីដែលរដ្ឋាភិបាលចង់បាន » ។
លោកបន្តថា ដោយសារកម្ពុជាមានច្បាប់វិនិយោគបើកទូលាយជាងគេនៅក្នុងតំបន់ កម្ពុជាអាចទាក់ទាញបានវិនិយោគិនជប៉ុន និងវិនិយោគិនជាច្រើនទៀតឲ្យមកវិនិយោគនៅកម្ពុជា ដែលជាការជំរុញកំណើនសេដ្ឋកិច្ចជាតិ ហើយរយៈពេលពីរបីឆ្នាំខាងមុខ សេដ្ឋកិច្ចកម្ពុជានឹងរក្សាបានកំណើន៧% ។ នេះបើតាមការព្យាកររបស់ក្រសួងសេដ្ឋកិច្ច និងហិរញ្ញវត្ថុ ។
លោកបន្តថា ៖« ការវិនិយោគជប៉ុនមានសារសំខាន់ណាស់ ដើម្បីចូលរួមចំណែកអភិវឌ្ឍន៍សេដ្ឋកិច្ច និងសង្គមរបស់យើង » ។ លោកបន្តថា ៖« អ្នកវិនិយោគជប៉ុនមិនត្រឹមតែយកទុនមកជាមួយទេ តែពួកគេយកបេះដូងមកជាមួយ ហើយពួកគេមិនបានចាត់ទុកអ្នកធ្វើការឲ្យខ្លួនជាកម្មករទេ តែជាប្រតិបត្តិកររបស់ខ្លួន » ។
ជាមួយនឹងការបង្ហាញនូវការវិនិយោគ ដែលគោរព និងថែរក្សាបរិស្ថាន ក្រុមហ៊ុនយក្សជប៉ុនA2A Town Cambodia បានប្រកាសលក់ផ្ទះលំហែកាយរបស់ខ្លួន ជាលំនៅឋានដែលស្ថិតនៅក្នុងរមណីយដ្ឋានV Kirirom Pine Resort ស្ថិតក្នុងស្រុកភ្នំស្រួច ខេត្តកំពង់ស្ពឺ ។
លោកបណ្ឌិត ហេង វុទ្ធី បានថ្លែងថា ក្រុមហ៊ុនA2A Town Cambodiaបានទទួលសិទ្ធិ សម្បទានពីរាជរដ្ឋាភិបាលលើផ្ទៃដី២ពាន់ហិកតា ដើម្បីអភិវឌ្ឍន៍ជារមណីយដ្ឋានV Kirirom ដោយដំណាក់កាលទី១ ក្រុមហ៊ុនវិនិយោគលើផ្ទៃដី៥០០ហិកតា និងគ្រោងបោះទុនវិនិយោគ៥០០លានដុល្លារអាមេរិក ។
ក្រុមហ៊ុន A2A Town Cambodia បាននិងកំពុងវិនិយោគលើរមណីយដ្ឋាននេះ ដោយមានរៀបចំភោជនីយដ្ឋាន ទីលានបោះតង់ ដែលអាចផ្ទុកមនុស្សបាន២ពាន់នាក់ រៀបចំជាផ្ទះបែបខ្មែរ ផ្ទះប្រអប់ និងប្រភេទវីឡាជាច្រើនទៀត ព្រមទាំងគ្រោងសាងសង់ទីលានវាយកូនហ្គោល ព្រលានយន្តហោះ ពិសេសក្រុមហ៊ុននេះបានបង្កើតវិទ្យាស្ថានបច្ចេកវិទ្យាគិរីរម្យ ដែលផ្តល់ការបណ្តុះបណ្តាលជំនាញព័ត៌មានវិទ្យាស្តង់ដាអន្តរជាតិ ព្រមទាំងផ្តល់អាហារូបករណ៍ ដល់និស្សិតអាចចូលសិក្សានៅទីនោះដោយឥតគិតថ្លៃ ។
អគ្គនាយកក្រុមហ៊ុន A2A Town Cambodia លោក Takeshi Izukaបានថ្លែងថា លោកមានគោលដៅអភិវឌ្ឍន៍រមណីយដ្ឋាននេះឲ្យស័ក្តិសមជាទីក្រុងមួយនាពេលអនាគត និងក្លាយជាគោលដៅទេសចរណ៍ដ៏ទាក់ទាញបន្ទាប់ពីខេត្តសៀមរាប ព្រោះរមណីយដ្ឋាននេះមានលក្ខខណ្ឌអាកាសធាតុល្អប្រសើរ មានដើមស្រល់ដ៏ស្រស់ស្អាត ហើយគោលដៅនៃការវិនិយោគរបស់យើង គឺមិនកាត់ដើមឈើទេ តែយើងរក្សាដើមឈើ និងគិតគូរដល់ការអភិរក្សបរិស្ថានជាចម្បង ។
លោកបន្តថា ៖« យើងចង់ឲ្យប្រជាជនកម្ពុជាមានអារម្មណ៍ថា គិរីរម្យជាផ្ទះទី២របស់ពួកគេ » ៕
ចែករំលែកព័តមាននេះ