រាជធានីភ្នំពេញ ៖ អតីតអភិបាលខេត្តតាកែវលោក ឡាយ វណ្ណៈ ត្រូវបានសមត្ថកិច្ចបញ្ជូនឡើងតុលាការកាលពីរសៀលថ្ងៃ២ មេសា ក្នុងសំណុំរឿងឃាតកម្មដ៏អាថ៌កំបាំងសម្លាប់អ្នកស្រី ចេវ សុវឌ្ឍនា…
រាជធានីភ្នំពេញ ៖ អតីតអភិបាលខេត្តតាកែវលោក ឡាយ វណ្ណៈ ត្រូវបានសមត្ថកិច្ចបញ្ជូនឡើងតុលាការកាលពីរសៀលថ្ងៃ២ មេសា ក្នុងសំណុំរឿងឃាតកម្មដ៏អាថ៌កំបាំងសម្លាប់អ្នកស្រី ចេវ សុវឌ្ឍនា ជាស្ត្រីមេម៉ាយរូបស្រស់ម្នាក់ ។
ការឃាត់ខ្លួនលោក ឡាយ វណ្ណៈ នេះ ធ្វើឡើងតាមដីកាបញ្ជាឱ្យចូលខ្លួនរបស់លោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ចុះថ្ងៃទី១ មេសា ជាថ្ងៃដែលត្រូវបាននគរបាលនាយកដ្ឋានព្រហ្មទណ្ឌក្រសួងមហាផ្ទៃ បានឃាត់ខ្លួនលោកនាំមកពីខេត្តតាកែវ ។ លោក ឡាយ វណ្ណៈ ត្រូវបានសមត្ថកិច្ចឃាត់ខ្លួន នៅត្រង់ចំណុចមុខវិទ្យាល័យ ជា ស៊ីម ស្ថិតក្នុងសង្កាត់រការ ក្នុងក្រុងដូនកែវ ខេត្តតាកែវ ខណៈពេលលោកកំពុងចាកចេញពីកន្លែងប្រារព្ធពិធីផ្ទេរតំណែងប្រធានគណបក្សប្រជាជនកម្ពុជាខេត្តតាកែវ ដាក់ជំនួសដោយលោក អ៊ូច ភា ដែលទើបតែត្រូវបានតែងតាំងជាអភិបាលខេត្តថ្មី ។
ព្រះរាជអាជ្ញារង សៀង សុខ បានបញ្ជាឱ្យកម្លាំងមានសមត្ថកិច្ចនាំខ្លួន លោក ឡាយ វណ្ណៈ ទៅបង្ហាញខ្លួននៅនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិ ដើម្បីសាកសួរពីដំណើររឿងឃាតកម្មលើអ្នកស្រី ចេវ សុវឌ្ឍនា ។ ការនាំលោក ឡាយ វណ្ណៈ អតីតអភិបាលខេត្តនេះ គឺក្នុងខណៈពេលដែលជនជាប់ចោទ ក្នុងសំណុំរឿងនេះ៥នាក់ទៀតត្រូវបានព្រះរាជអាជ្ញារង និងចៅក្រមបានសាកសួរ២ថ្ងៃមកហើយផងដែរ និងបានបញ្ចប់នៅថ្ងៃដែលលោក ឡាយ វណ្ណៈ ត្រូវនាំខ្លួនមកសាកសួរបន្តនៅតុលាការ ។
សូមបញ្ជាក់ថា អ្នកមេម៉ាយរូបស្រស់ ចេវ សុវឌ្ឍនា វ័យ៣៦ឆ្នាំ ត្រូវគេប្រទះឃើញស្លាប់ដោយចង.កនៅល្ងាចថ្ងៃទី២៦ មករា កន្លងទៅនៅវីឡាជួលក្នុងក្រុងដូនកែវ ខេត្តតាកែវ ។ ប៉ុន្តែការស៊ើបអង្កេតក្រោយៗមកទៀត របស់សមត្ថកិច្ចបានដាក់ការសង្ស័យថា ស្ដ្រីរងគ្រោះត្រូវបានគេធ្វើឃាត មិនមែនសម្លាប់ខ្លួនឯងឡើយ ។
យ៉ាងណាក៏ដោយ លោក ឡាយ វណ្ណៈ អតីតអភិបាលខេត្តតាកែវ តាមរយៈបណ្ដាញសង្គមហ្វេសប៊ុកមួយថ្ងៃ មុនពេលត្រូវសមត្ថកិច្ចឃាត់ខ្លួនបានសរសេរថា លោកគ្មានចិត្តបាបព្រៃផ្សៃរហូតលើកដៃសម្លាប់អ្នកស្រី ចេវ សុវឌ្ឍនា ដែលជាស្រីកំណាន់របស់លោកឡើយ ។ បើតាមសារលើបណ្ដាញសង្គមដដែល លោក ឡាយ វណ្ណៈ បានសារភាពថា លោកពិតជាមានទំនាក់ទំនងស្នេហាជាមួយអ្នកស្រី ចេវ សុវឌ្ឍនាមែនក្នុងរយៈពេលជាង១ឆ្នាំកន្លងមកនេះ ។ ប៉ុន្តែក្រោយពេលភរិយាលោកបានដឹងពីទំនាក់ទំនងនេះ លោកបានសុំផ្ដាច់ទំនាក់ទំនងជាមួយនាង ចេវ សុវឌ្ឍនា ធ្វើឱ្យនាងគិតខ្លីរហូតប៉ងធ្វើអត្តឃាត ។ នៅក្នុងសំណុំរឿងឃាតកម្មនេះ សមត្ថកិច្ចបានឃាត់ខ្លួនជនសង្ស័យចំនួន៥នាក់ផ្សេងទៀត ដើម្បីធ្វើការសាកសួរដែល ក្នុងនោះរួមមានបងប្រុសលោកឡាយ វណ្ណៈ គឺលោក ឡាយ ណារិទ្ធ អតីតស្នងការរងខេត្តតាកែវម្នាក់ផងដែរ ។
ចែករំលែកព័តមាននេះ