ចុះសួរសុខទុក្ខកងកម្លាំងវរសេនាតូចនគរបាលការពារព្រំដែននៅខេត្តស្វាយរៀង
- ស្វាយរៀង
ខេត្តស្វាយរៀង ៖ នៅទីបញ្ជាការវរសេនាតូចនគរបាលការពារព្រំដែនគោកលេខ៦០៩ លោក ម៉ែន វិបុល អភិបាល នៃគណៈអភិបាលខេត្តស្វាយរៀង នៅព្រឹកថ្ងៃទី០២ ខែមេសា…
ខេត្តស្វាយរៀង ៖ នៅទីបញ្ជាការវរសេនាតូចនគរបាលការពារព្រំដែនគោកលេខ៦០៩ លោក ម៉ែន វិបុល អភិបាល នៃគណៈអភិបាលខេត្តស្វាយរៀង នៅព្រឹកថ្ងៃទី០២ ខែមេសា ឆ្នាំ២០១៨ នេះ បានអញ្ជើញចូលរួមជាមួយគណៈប្រតិភូក្រសួងមហាផ្ទៃដែលដឹកនាំដោយ លោក ព្រុំ សុខា រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ចុះជួបសំណេះសំណាល និងសួរសុខទុក្ខកងកម្លាំងវរសេនាតូចនគរបាលការពារព្រំដែនឈរជើងនៅក្នុងខេត្តស្វាយរៀង ។
អញ្ជើញចូលរួមក្នុងពិធីនេះ រួមមានលោកអនុរដ្ឋលេខាធិការ លោកនាយឧត្ដមសេនីយ៍ ឧត្ដមសេនីយ៍ អគ្គនាយក អគ្គនាយករង អគ្គស្នងការរង និងប្រតិភូ នៃក្រសួងមហាផ្ទៃ លោកអភិបាលរងខេត្តស្នងការនគរបាលខេត្ត មេបញ្ជាការរងតំបន់ប្រតិបត្តិការសឹករងស្វាយរៀង មេបញ្ជាការរងកងរាជអាវុធហត្ថខេត្ត ប្រធាន អនុប្រធានមន្ទីរ អង្គភាពជុំវិញខេត្ត អាជ្ញាធរក្រុងបាវិត ប្រធានប៉ុស្តិ៍ច្រកទ្វាព្រំដែន ព្រមទាំងកម្លាំង នៃវរសេនាតូចនគរបាលការពារព្រំដែនគោកលេខ៦០៩ និង៦១១ សរុបចំនួន២៩២នាក់ ។
ថ្លែងក្នុងពិធីសំណេះសំណាលនេះ លោក ព្រុំ សុខា រដ្ឋលេខាធិការក្រសួងមហាផ្ទៃបាននាំនូវការផ្តាំផ្ញើសួរសុខទុក្ខពីសំណាក់ សម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ ដែលតែងតែយកចិត្តទុកដាក់គិតគូរជានិច្ចដល់សុខទុក្ខរបស់កងកម្លាំងនគរបាលដែលកំពុងឈរជើងការពារព្រំដែន និងសម្តែងនូវការកោតសរសើរដល់វីរភាពពុះពារការលំបាកខិតខំបំពេញភារកិច្ចរបស់កងកម្លាំង ដោយមានកិច្ចសហការឧបត្ថម្ភគាំទ្រពីសំណាក់អាជ្ញាធរដែនដី និងបណ្ដាសមត្ថកិច្ចដទៃទៀត តាមបណ្តោយព្រំដែនក្នុងកិច្ចការពារបូរណភាពទឹកដីអធិបតេយ្យជាតិ ចូលរួមកសាងព្រំដែនមិត្តភាព សន្តិភាពសហប្រតិបត្តិការជាមួយប្រទេសជិតខាងជាមិត្តភូមិផងរបងជាមួយបានល្អប្រសើរគួរឲ្យកត់សម្គាល់ ។ ស្នាដៃនេះគឺជាចំណែកនៃសមិទ្ធផលដ៏ធំធេងសម្រេចបានរបស់រាជរដ្ឋាភិបាលកម្ពុជា ដែលមាន សម្តេចតេជោ ហ៊ុន សែន ជាប្រមុខក្នុងការដឹកនាំប្រទេសជាតិ ឲ្យមានការរីកចម្រើនជឿនលឿនជាលំដាប់ ។
លោករដ្ឋលេខាធិការក៏បានគូសបញ្ជាក់ពីកត្តាសំខាន់បំផុតមិនអាចខ្វះបានដើម្បីធានាដល់ភាពរុងរឿងថ្កំថ្កើងរបស់ប្រទេសជាតិ និងវិបុលភាពសុខសាន្តរបស់ប្រជាជនយើងនាពេលបច្ចុប្បន្នក៏ដូចជាទៅអនាគតគឺសន្តិភាព និងស្ថិរភាពហើយនោះក៏ជាបុព្វបទដើម្បីធានាឲ្យប្រទេសកម្ពុជាបន្តអភិវឌ្ឍន៍ ប្រកបដោយចីរភាពនៅលើផ្លូវប្រជាធិបតេយ្យពិតប្រាកដ ។
ក្នុងឱកាសនោះ លោករដ្ឋលេខាធិការ និងគណៈប្រតិភូបាននាំមកជាមួយនូវគ្រឿងឧបភោគបរិភោគ និងថវិកាឧបត្ថម្ភដល់វរសេនាតូចនគរបាលការពារព្រំដែនគោកលេខ៦០៩ និង៦១១ ក្នុងមួយអង្គភាព៥លានរៀល ឧបត្ថម្ភកម្លាំងអង្គភាពទាំងពីរចំនួន២៩២នាក់ ក្នុង១នាក់១០ម៉ឺនរៀល ព្រមទាំងសម្ភារជូនអង្គភាពទាំងពីរសរុបរួមមាន អង្ករ៣តោន មី១២៨កេស ត្រីខ៣៤កេស ទឹកក្រូច២៤កេស ទឹកបរិសុទ្ធ១១៤កេស ជ្រូក២ក្បាល ស្មើនឹង១៦០គីឡូក្រាម នំអន្សម បន្លែ និងស្រាបៀរ៤០កេស ។ ដោយឡែកអធិការដ្ឋាននគរបាលក្រុងស្រុកទាំង៨ ក្នុង១អង្គភាពទទួលបាន អង្ករ២បាវ និងប៉ុស្តិ៍នគរបាលរដ្ឋបាលឃុំសង្កាត់ទាំង៨០ក្នុង១អង្គភាព ទទួលបានអង្ករ១បាវ ៕
ចែករំលែកព័តមាននេះ