ប្រទេសស្រីលង្កា ៖ ក្នុងសេចក្តីប្រកាសមួយ កងម៉ារីនស្រីលង្ការាយការណ៍នាថ្ងៃទី១ មេសា នៅក្រុងកូឡុំបូថា នាវាអង់គ្លេសមួយគ្រឿងឈ្មោះ SS SAGAING ដែលលិចក្នុងសម័យសង្គ្រាមលោកលើកទី២នៅកំពង់ផែ TRINCOMALEE ខាងកើតស្រីលង្កានោះត្រូវបានស្រង់ពីទឹកដោយអ្នកមុជទឹកមួយក្រុមរបស់កងម៉ារីនស្រីលង្កា ក្រោយស្ថិតនៅបាតសមុទ្រអស់រយៈពេល៧៥ឆ្នាំមក ។
នាវាដឹកអ្នកដំណើរ និងទំនិញបណ្តោយប្រវែង១៣៨ម៉ែត្រនេះ ដែលដាក់ឱ្យប្រើក្នុងឆ្នាំ១៩២៤ ជារបស់កងម៉ារីនអង់គ្លេស ។ វារងការវាយប្រហារដោយគ្រាប់បែកជប៉ុន ពេលបោះយុថ្កានៅកំពង់ផែនាថ្ងៃទី៩ មេសា ឆ្នាំ១៩៤២ ហើយត្រូវបោះបង់ចោលដោយមានភ្លើងឆាបឆេះ ។ ថ្ងៃទី២៤ សីហា ១៩៤៣ នាវារងការខូចខាតនេះបានលិចដោយសារកងម៉ារីនស្រីលង្កាប្រើវាជាផែសម្រាប់កងម៉ារីនយោធា ។
កងម៉ារីនស្រីលង្កាឱ្យដឹងថា យើងសម្រេចស្រង់នាវានេះដែលលិចទាំងស្រុងក្នុងជម្រៅជិត១១ម៉ែត្រ ដើម្បីកុំឱ្យទើសទែងដល់កំពង់ផែ ។ គួរកត់សម្គាល់ថា ប្រតិបត្តិការស្រង់នាវានេះប្រើពេលដល់ទៅច្រើនខែ ៕
ចែករំលែកព័តមាននេះ