ប្រទេសចិន ៖ ខណៈស្ថានីយអវកាស TIANGONG-1 ធ្លាក់ចូលនាថ្ងៃទី២ មេសា ក្នុងបរិយាកាសផែនដីចិននិយាយថា លាហើយមន្ទីរពិសោធន៍អវកាសដែលចាត់ទុកថាជាស្ថានីយសាកល្បងដំបូងមួយសម្រាប់ស្ថានីយអវកាសចិននាពេលអនាគត ។
ការិយាល័យវិស្វកម្មអវកាសចិនរាយការណ៍ថា ស្ថានីយ TIANGONG-1 ធ្លាក់ចូលក្នុងបរិយាកាសផែនដីនាថ្ងៃទី២ មេសា វេលាម៉ោង៨និង១៥នាទីនៅភាគខាងត្បូងមហាសមុទ្រប៉ាស៊ីហ្វិក ហើយផ្នែកមួយយ៉ាងធំរបស់វាឆេះអស់ក្នុងបរិយាកាស ។
បាញ់បង្ហោះចេញពីទីតាំងបាញ់បង្ហោះផ្កាយរណប JIUQUAN ភាគាពាយ័ព្យចិនកាលពីថ្ងៃទី២៩ កញ្ញា ២០១១ ស្ថានីយ TIANGONG-1 មានបេសកកម្មសាកល្បងបណ្តាបច្ចេកវិទ្យានៃការជួប និងភ្ជាប់គ្នាជាមួយបណ្តាយានអវកាស ហើយប្រមូលបទពិសោធន៍ទាំងឡាយសម្រាប់បង្កើតស្ថានីយអវកាសពិតប្រាកដមួយ ។ វាអាចធ្វើឱ្យសម្រេចការទៅភ្ជាប់របស់យានអវកាស SHENZHOU-8 SHENZHOU-9 និង SHENZHOU-10 ហើយទទួលទស្សនកិច្ចរបស់អវកាសយានិក៦រូប ក្នុងនោះមាននារី២រូប ។
ស្ថានីយ TIANGONG-1 បម្រើសេវាកម្មរយៈពេល៤ឆ្នាំកន្លះជារយៈពេលមួយយូរជាងការគ្រោងទុកដល់ទៅ២ឆ្នាំកន្លះ ដែលរួមចំណែកយ៉ាងសំខាន់ដល់បុព្វហេតុអវកាសមានមនុស្សឡើងទៅរបស់ចិន ហើយដែលបើកផ្លូវឱ្យចិនក្លាយជាប្រទេសទី៣នៃពិភពលោក ដែលកសាងស្ថានីយអវកាសអចិន្ត្រៃយ៍មួយនាឆ្នាំ២០២២ខាងមុខ ។
ក្រសួងវិទ្យាសាស្ត្រកូរ៉េខាងត្បូងនិយាយនាថ្ងៃទី២ មេសា ថា ស្ថានីយអវកាសចិននេះត្រូវធ្លាក់លើផែនដីរវាងម៉ោង៩និងម៉ោង១០ព្រឹកម៉ោងក្នុងស្រុកថ្ងៃទី២ មេសា ហើយកូរ៉េខាងត្បូងពុំរងការប៉ះពាល់ឡើយ ។ ក្រសួងនោះនាពេលមុននេះវាយតម្លៃថា កូរ៉េខាងត្បូងអាចជាផ្នែកមួយនៃតំបន់ធ្លាក់កម្ទេចស្ថានីយនេះ តែក្រោយមកលុបចោលការសន្និដ្ឋាននេះវិញ ដោយសារពិនិត្យទិសដៅដែលវាធ្លាក់ចូលស្រទាប់បរិយាកាស ។ ពួកអ្នកវិទ្យាសាស្ត្រនិយាយថា ផ្នែកយ៉ាងធំរបស់ស្ថានីយ TIANGONG-1 ត្រូវឆេះអស់ពេលវិលត្រឡប់ចូលបរិយាកាស ទោះប្រសិនបើកម្ទេចជាច្រើនអាចធ្លាក់លើដីតែក៏ពុំគ្រោះថ្នាក់ខ្លាំង ព្រោះមានទំហំតូចៗ ៕
ចែករំលែកព័តមាននេះ