ADផ្ទាំងផ្សព្វផ្សាយពាណិជ្ជកម្ម

ព្រលឹងប្តីស្ងប់ចិត្ត ដោយសារប្រពន្ធចាប់ឃាតករផ្ទាល់ដៃ

6 ឆ្នាំ មុន

កណ្តាល
០២ ខែ មេសា ឆ្នាំ ២០១៨ ម៉ោង ១៥:២៧

ខេត្តកណ្ដាល ៖ បន្ទាប់ពីឃាតករបានប្រើកាំភ្លើងខ្លី ម៉ាកឡុក ធ្វើសកម្មភាពបាញ់ប្រហារសម្លាប់បុរសជាប្ដីចំនួន១៥គ្រាប់ឡើងសុះសាច់ស្លាប់នៅក្នុងវង់ផឹកស៊ី (ពិធីខួបកំណើតសាច់ញាតិ) ដោយស្ត្រីជាប្រពន្ធរបស់ជនរងគ្រោះ ព្រមទាំងក្រុមគ្រួសារទាំងមូលរង់ចាំរកយុត្តិធម៌យ៉ាងអន្ទះសារអស់រយៈពេលជាង២ឆ្នាំមកហើយ ។ ជនដៃដល់នៅតែមានឱកាសគេចខ្លួនមានសេរីភាពនៅក្រៅឃុំរហូត លុះដល់ពេលចុងក្រោយនេះស្ត្រីជាប្រពន្ធជនរងគ្រោះ បានស៊ើបដឹងថា ជនជាឃាតករសម្លាប់ប្ដីនាង មានប្រពន្ធចុងម្នាក់ទៀតហើយមានប្អូនខាងប្រពន្ធចុងម្នាក់នោះត្រូវរៀបការ ទើបនាងតាមដានរហូតដល់រោងការ ហើយក៏បានចាប់ខ្លួនជននោះ ដោយផ្ទាល់ដៃនៅក្នុងរោងការប្អូនខាងប្រពន្ធចុងនោះ រួចប្រគល់ឱ្យនគរបាលតែម្ដង។ ការចាប់ខ្លួននោះបានធ្វើឡើង កាលពីវេលាម៉ោង៧និង១០នាទីយប់ ថ្ងៃទី១ មេសា ឆ្នាំ២០១៨ នៅក្នុងភូមិព្រៃក្តួច ឃុំគ្រញូង ស្រុកត្រាំកក់ ខេត្តតាកែវ ។

ជនសង្ស័យឈ្មោះទឹម សារី អាយុ៣៥ឆ្នាំ ជាមន្ត្រី នគរបាលនៅនាយកដ្ឋានអង្គរក្សអង្គភាពអប្តរាគមន៍ មានស្រុកកំណើត នៅក្នុងភូមិកាប់នឹម ឃុំខ្វាវ ស្រុកសំរោង ខេត្តតាកែវ និងមានទីលំនៅក្នុងភូមិគោកពពេល ឃុំលំហាច ស្រុកអង្គស្នួល ខេត្តកណ្ដាល ។ ជននេះ មានដីការបង្គាប់ឲ្យចាប់ខ្លួនចំនួន២ ។ ដោយឡែកជនរងគ្រោះឈ្មោះស្រី វុទ្ធី អាយុជាង៣០ឆ្ នាំមានទៅលំនៅក្នុងភូមិគោកពពេល ស្រុកអង្គស្នួល នោះដែរ ត្រូវឃាតករខាងលើបាញ់រហូតដល់ទៅចំនួន១៥គ្រាប់ គឺបាញ់១គ្រាប់ដួលស្លាប់ហើយ មិនអស់ចិត្តទេបានបាញ់ស្រោចចំនួន១៤គ្រាប់ទៀត ពិតជាសាហាវខ្លាំងបំផុត។