រាជធានីភ្នំពេញ ៖ តបតាមការអញ្ជើញរបស់សម្តេចតេជោ ហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជា នោះ នាយករដ្ឋមន្ត្រីចំនួនបីប្រទេសដែលជាប់នឹងព្រំប្រទល់ជាមួយកម្ពុជា និងដឹកនាំគណៈប្រតិភូចូលកិច្ចប្រជុំកំពូលគណៈកម្មការទន្លេមេគង្គលើកទី៣ នៅទីក្រុងសៀមរាប ដែលកម្ពុជាធ្វើជាម្ចាស់ផ្ទះ ។
សេចក្តីជូនដំណឹងរបស់ក្រសួងការបរទេស និងសហប្រតិបតិ្តការអន្តរជាតិបានឲ្យដឹងនៅថ្ងៃទី២ ខែមេសា ឆ្នាំ២០១៨ថា តបតាមការអញ្ជើញរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោក ថងលូន ស៊ីស៊ូលីត (Thongloun Sisoulith) នាយករដ្ឋមន្ត្រីនៃសាធារណរដ្ឋប្រជា
ធិបតេយ្យប្រជាមានិតឡាវ លោកឧត្តមសេនីយ៍ប្រាយុទ្ធ ច័ន្ទអូឆា (Prayut Chan-o-cha) នាយករដ្ឋមន្ត្រីនៃព្រះរាជាណាចក្រថៃ និងលោកង្វៀន សួនហ្វ៊ុក (Nguyen Xuan Phuc) នាយករដ្ឋមន្ត្រីនៃសាធារណរដ្ឋសង្គមនិយមវៀតណាម និងដឹកនាំគណៈប្រតិភូអញ្ជើញមកចូលរួមកិច្ចប្រជុំកំពូលគណៈកម្មការទន្លេមេគង្គលើកទី៣ ដែលនឹងប្រព្រឹត្តទៅនៅថ្ងៃទី០៥ ខែមេសា ឆ្នាំ២០១៨ នៅក្រុងសៀមរាប ព្រះរាជាណាចក្រកម្ពុជា ។
តំណាងជាន់ខ្ពស់នៃប្រទេសដៃគូសន្ទនារបស់គណៈកម្មការទន្លេមេគង្គចិន និងមីយ៉ាន់ម៉ា និងដៃគូអភិវឌ្ឍន៍របស់គណៈកម្មការទន្លេមេគង្គក៏នឹងអញ្ជើញចូលរួមនៅក្នុងកិច្ចប្រជុំកំពូលនេះផងដែរ ។
ប្រភពបន្តថា កិច្ចប្រជុំកំពូលក្រោមប្រធានបទ «ការលើកកម្ពស់កិច្ចខិតខំប្រឹងប្រែងរួមគ្នា និងភាពជាដៃគូ ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពនៅក្នុងអាងទន្លេមេគង្គ-ទន្លេមេគង្គតែមួយ ស្មារតីតែមួយ» ដែលមានសម្តេចតេជោនាយករដ្ឋមន្ត្រីធ្វើជាប្រធានកិច្ចប្រជុំ នឹងពិនិត្យឡើងវិញនូវវឌ្ឍនភាព និងសមិទ្ធផល ដែលគណៈកម្មការទន្លេមេគង្គសម្រេចបាន ក្នុងការជម្រុញកិច្ចសហប្រតិបត្តិការតំបន់ពិភាក្សាលើបញ្ហាប្រឈមក្នុងអាងទន្លេមេគង្គ និងដាក់ចេញទិសដៅជាយុទ្ធសាស្ត្រ ដើម្បីជម្រុញ និងលើកកម្ពស់កិច្ចខិតខំប្រឹងប្រែងរួមគ្នានូវកិច្ចសហប្រតិបត្តិការ និងភាពជាដៃគូ ដើម្បីសម្រេចបានគោលដៅអភិវឌ្ឍន៍ប្រកបដោយចីរភាពក្នុងអាងទន្លេមេគង្គ ។
កិច្ចប្រជុំកំពូលនេះត្រូវបានរំពឹងទុកថា នឹងអនុម័តសេចក្ដីថ្លែងការណ៍ក្រុងសៀមរាបដែលឆ្លុះបញ្ចាំងនូវការប្តេជ្ញាចិត្ត ផ្នែកនយោបាយកម្រិតខ្ពស់របស់ប្រទេសជាសមាជិកគណៈកម្មការទន្លេមេគង្គ ក្នុងការបន្តធ្វើឲ្យប្រសើរនូវកិច្ចសហប្រតិបត្តិការតំបន់ ដើម្បីការអភិវឌ្ឍប្រកបដោយចីរភាពក្នុងអាងទន្លេមេគង្គ ។
នៅចុងបញ្ចប់នៃកិច្ចប្រជុំកំពូលសម្តេចតេជោនាយករដ្ឋមន្ត្រីនៃព្រះរាជាណាចក្រកម្ពុជា និងធ្វើសន្និសីទសារព័ត៌មានអំពីលទ្ធផលនៃកិច្ចប្រជុំកំពូលគណៈកម្មការទន្លេមេគង្គលើកទី៣ ។
នៅក្រៅកិច្ចប្រជុំកំពូលនេះ សម្តេចតេជោនាយករដ្ឋមន្ត្រី នឹងមានជំនួបទ្វេភាគី ដាច់ដោយឡែកពីគ្នា ជាមួយឯកឧត្តមបណ្ឌិត ថងលូន ស៊ីស៊ូលីត ឯកឧត្តម ឧត្តមសេនីយ៍ ប្រាយុទ្ធ ច័ន្ទអូឆា និងឯកឧត្តម ង្វៀន សួនហ្វ៊ុក ព្រមទាំងទទួលការចូលជួបសម្តែងការគួរសមរបស់ឯកឧត្តម ដាតុ លីម ចូក ហួយ អគ្គលេខាធិការអាស៊ានថ្មី ក៏ដូចជារបស់ប្រធានគណៈប្រតិភូដទៃទៀតផងដែរ ៕
ចែករំលែកព័តមាននេះ