ប្រទេសកូរ៉េខាងត្បូង-សហរដ្ឋអាមេរិក ៖ បណ្តាសារព័ត៌មានកូរ៉េខាងត្បូងរាយការណ៍ថា កងទ័ពកូរ៉េខាងត្បូង និងអាមេរិកបានចាប់ផ្តើមនាថ្ងៃទី១ មេសា នូវសមយុទ្ធយោធារួមប្រចាំឆ្នាំ ។
យោងតាមក្រសួងការពារប្រទេសកូរ៉េខាងត្បូងថា សមយុទ្ធហ្វឹកហ្វឺនលើទីលានឈ្មោះ FOAL EAGLE ចាប់ផ្តើមនាព្រឹកថ្ងៃទី១ មេសា ដូចការគ្រោងទុក ហើយនឹងប្រព្រឹត្តទៅរយៈពេលប្រមាណជា៤សប្តាហ៍ ចំណែកសមយុទ្ធឈ្មោះ KEY RESOLVE នឹងចាប់ផ្តើមនាពាក់កណ្តាលខែមេសា សម្រាប់រយៈពេល២សប្តាហ៍ ។
សមយុទ្ធយោធារួមប្រចាំឆ្នាំទាំងនេះត្រូវពន្យារពេលដោយសារការប្រកួតកីឡាអូឡាំពិករដូវរងានៅ PYONGCHANG ដើម្បីជាការគោរពចំពោះស្មារតីសន្តិភាពរបស់កីឡានេះ ។
ក្នុងឆ្នាំ២០១៧ សមយុទ្ធយោធា FOAL EAGLE និង KEY RESOLVE ត្រូវបានអូសបន្លាយពេលដល់២ខែ គឺចាប់ផ្តើមពីថ្ងៃទី១ មីនា ទៅហើយ ប្រមូលផ្តុំបណ្តានាវាផ្ទុកយន្តហោះ និងបណ្តានាវាមុជទឹកនុយក្លេអ៊ែរ ព្រមទាំងបណ្តាយន្តហោះទម្លាក់គ្រាប់បែកយុទ្ធសាស្ត្រ និងបណ្តាយន្តហោះប្រដេញបំបាំងកាយអាមេរិក ។
ឆ្នាំនេះប្រទេសទាំង២បានសម្រេចដាក់ពង្រាយឧបករណ៍យោធាអាមេរិកតិចជាងលើកមុនៗ ។ ទោះបីកងទ័ពអាមេរិកដាក់ពង្រាយនៅឧបទ្វីបកូរ៉េក្តី បណ្តាគ្រឿងឧបករណ៍ដែលត្រូវដាក់ពង្រាយនឹងពុំត្រូវបានលាតត្រដាងជាសាធារណៈឡើយ ។ ចំពោះចំនួនទាហានអាេមរិកដែលចូលរួមក្នុងសមយុទ្ធនេះនឹងមានចំនួនប្រហាក់ប្រហែលគ្នានឹងកាលពីឆ្នាំទៅមិញគឺ១២.២០០នាក់ ចូលរួមក្នុងសមយុទ្ធ KEY RESOLVE និង១១.៥០០នាក់ចូលរួមក្នុងសមយុទ្ធ FOAL EAGLE ។ ទាហានកូរ៉េខាងត្បូងប្រមាណជា២៩០.០០០នាក់នឹងចូលរួមក្នុងសមយុទ្ធទាំងនេះ ។
បណ្តាសកម្មជនសន្តិភាពកូរ៉េខាងត្បូងបានអំពាវនាវដល់ប្រទេសទាំង២ឱ្យបញ្ឈប់សមយុទ្ធយោធារួមទាំងនេះ ។ អង្គការ PEOPLE’S SOLIDARITY FOR PARTICIPATORY DEMOCRACY (PSPD) ជាអង្គការក្រៅរដ្ឋាភិបាលកូរ៉េខាងត្បូងមួយបានចេញសេចក្តីថ្លែងការណ៍មួយថា សមយុទ្ធយោធានៅបន្តក្នុងទ្រង់ទ្រាយធំ ហើយនៅតែមានចរិតឈ្លានពាន ទោះមានការកាត់បន្ថយទំហំនាឆ្នាំនេះក្តី ។ PSPD យល់ថា រាល់សកម្មភាពយោធាសំដៅលើភាគីមួយទៀតអំឡុងពេលមានការចរចានឹងជាប្រការពុំសមស្របឡើយ ។ អង្គការនេះអំពាវនាវដល់ក្រុងសេអ៊ូល និងក្រុងវ៉ាស៊ីនតោនឱ្យផ្អាកសមយុទ្ធយោធាដែលគ្រោងធ្វើសម្រាប់ឆមាសទី២នៃឆ្នាំ២០១៨ ដើម្បីសម្រួលដល់ព្រឹត្តិការណ៍សន្តិភាពនៅឧបទ្វីបកូរ៉េ ៕
ចែករំលែកព័តមាននេះ