រាជធានីភ្នំពេញ ៖ តារាចម្រៀងជើងចាស់មួយចំនួនផលិតចម្រៀងចង្វាក់ប្រពៃណីសម្រាប់បុណ្យចូលឆ្នាំថ្មីប្រពៃណីជាតិ ខណៈបទចម្រៀងចង្វាក់សម័យទំនើបចេញលក់នៅលើទីផ្សារជាច្រើន ។ តារាស្រីទាំងនោះខ្លះបានផលិតចម្រៀងបញ្ចូលក្នុងផលិតកម្មរបស់ខ្លួន និងខ្លះទៀតបានផលិតឡើងបែបលក្ខណៈផ្ទាល់ខ្លួន សហការជាមួយក្រុមការងារផលិតរួចបញ្ចេញតាមយូធូបនិងហ្វេសប៊ុកជាដើម ។
អ្នកនាងខាត់ សុឃីម ដែលជា រឿយៗចេញសារបង្ហោះនៅលើហ្វេសប៊ុក ហើយត្អូញត្អែរថា ផ្នែកទម្រង់បុរាណខ្មែរមានការធ្លាក់ចុះ ឯចង្វាក់ទទ្រាក់ទ្រើកបែបបរទេសវាយលុកខ្លាំងណាស់ ។ នាងបានចេញបទថ្មីមួយបទមានឈ្មោះថា«រងា» ដែលមានន័យរៀបរាប់ពីវប្បធម៌ខ្មែរមានទាំងបញ្ចូលទម្រង់ភ្លេងបុរាណខ្មែរក្នុងបទនោះសម្តៅភាពទាក់ទាញក្រើនរំលឹកយុវជនមួយចំនួនកុំឱ្យភ្លេចខ្លួន ។
អ្នកនាងទូច ស្រីលក្ខណ៍ បានចូលរួមបង្ហាញបទចម្រៀងបែបចង្វាក់ប្រពៃណីខ្មែរបង្ហោះនៅលើហ្វេសប៊ុក និងយូធូបរហូតមានការគាំទ្រច្រើនពីអ្នកគាំទ្រ ។ នាងលើកឡើងថាបើសិនជា ម្នាក់ៗផលិតតែជាបទ យេៗពេកនៅក្នុងរដូវចូលឆ្នាំនាំឱ្យបាត់ច្រើនទម្រង់ចង្វាក់របស់ខ្មែរ ។នាងមិនបានហាមបិទឡើយព្រោះបទសម័យដែលចេញមកក៏មានលក្ខណៈបញ្ចូលនូវទម្រង់ឧបករណ៍ភ្លេងបុរាណខ្មែរដែរ ។
អ្នកនាងគឹម សុគន្ឋា តារាចម្រៀងមានសំឡេងពីរោះស្រដៀងរស់ សេរីសទ្ធា បានចូលរួមដែរក្នុងការយកចង្វាក់ចម្រៀងជំនាន់ដើមមកច្រៀងតាមសម្តៅអភិរក្ស ។ នាងថាមិនទាន់មានផលិតកម្មណាច្រៀងដូចពីមុនទេ តែបំណាច់ចិត្តស្រឡាញ់នាងខំច្រៀងថតចម្រៀងពីដើម ទាំងមនោសញ្ចេតនា និងរាំវង់ រាំក្បាច់របស់អ្នកស្រីរស់ សេរីសុទ្ធា ដើម្បីគាំពារ ឬរំលឹកស្នាដៃចម្រៀងពីដើម ព្រោះចម្រៀងពីដើមចូលរួមផ្តល់ការងារជូនសិល្បករ សិល្បការិនីច្រើនណាស់ដើម្បីរួមលើកស្ទួយជីវភាព ។
អ្នកនាងឈួន សុវណ្ណឆៃ ក៏បានសហការជាមួយលោកគ្រូ អ្នកគ្រូខាងភ្លេង ហើយចេញបទចម្រៀងបែបចង្វាក់ប្រពៃណីខ្មែរបំណងអបអរបុណ្យចូលឆ្នាំថ្មីប្រពៃណីជាតិ ។
បទចម្រៀងកន្ទ្រឹម ឡាំលាវ មួយចំនួនត្រូវអ្នកនាងឈួន សុវណ្ណឆៃ ផលិតឡើងក្នុងន័យបម្រើអារម្មណ៍ប្រិយមិត្តអ្នកស្តាប់ចំក្នុងរដូវបុណ្យចូលឆ្នាំដែលគួរតែមានបទចម្រៀងលក្ខណៈជាតិ ៕
ចែករំលែកព័តមាននេះ